គម្រោង INRM ត្រូវបានអនុវត្តចាប់ពីឆ្នាំ២០២០ ដល់ឆ្នាំ២០២៥ ដោយក្រសួងបរិស្ថាន ទៅលើខេត្តគោលដៅចំនួន៣ ក្នុងគោលបំណងកាត់បន្ថយការប្រើប្រាស់ដោយផ្ទាល់ទៅលើធនធានធម្មជាតិ

ភ្នំពេញ៖ លោក ឈិត សុភា មន្ត្រីសម្របសម្រួលគម្រោងការបញ្ជ្រាប ការគ្រប់គ្រងធនធានធម្មជាតិនៅក្នុងតំបន់ការពារទេសភាព និងព្រៃផលិតភាព នៃភាគខាងជើង ប្រទេសកម្ពុជា ហៅកាត់ថា INRM បានបញ្ជាក់ថា គម្រោង INRM ត្រូវបានអនុវត្តចាប់ពីឆ្នាំ២០២០ ដល់ឆ្នាំ២០២៥ ដោយក្រសួងបរិស្ថាន ទៅលើខេត្តគោលដៅចំនួន៣ ក្នុងគោលបំណងកាត់បន្ថយការប្រើប្រាស់ដោយផ្ទាល់ទៅលើធនធានធម្មជាតិ។

ថ្លែងប្រាប់ក្រុមអ្នកសារព័ត៌មាននៅថ្ងៃទី២១ ខែកុម្ភៈ ឆ្នាំ២០២៥នេះ លោក ឈិត សុភា បានលើកឡើងថា គម្រោង INRM នេះត្រូវបានអនុវត្តចាប់ពីឆ្នាំ២០២០ ដល់ឆ្នាំ២០២៥ ដោយក្រសួងបរិស្ថាន ទៅលើខេត្តគោលដៅចំនួន៣ គឺ៖ ខេត្តព្រះវិហារ, ខេត្តសៀមរាប និងខេត្តកំពង់ធំ ហើយក្នុងនោះទៅលើទីជម្រាលចំនួន៣ គឺ៖ ស្ទឹងសៀមរាប, ស្ទឹងសែន និងស្ទឹងស្ទោង។

លោក បានបញ្ជាក់ថា តាំងពីអនុវត្តគម្រោងរហូតមកដល់ពេលនេះ យើងអនុវត្តជាមួយនឹងសហគមន៍ការពារធម្មជាតិបានចំនួន២៦ ក្នុងមានសហគមន៍ព្រៃឈើចំនួន៨ និងសហគមន៍ការពារតំបន់ធម្មជាតិចំនួន១៨។

លោក បានបន្តថា គម្រោងខាងលើនេះ យើងបានធ្វើការផ្ទាល់ជាមួយសហគមន៍ ក៏ដូចជាមន្ទីរបរិស្ថានខេត្តចំនួន៣ គឺ៖ មន្ទីរបរិស្ថានខេត្តសៀមរាប, មន្ទីរបរិស្ថានខេត្តព្រះវិហារ និងមន្ទីរបរិស្ថានខេត្តកំពង់ធំ ហើយសហគមន៍គឺយើងធ្វើការក្នុងការកសាងសមត្ថភាពរបស់គាត់ ក្នុងគោលបំណងចង់ឲ្យពួកគាត់កាត់បន្ថយទៅការប្រើប្រាស់ដោយផ្ទាល់ទៅលើធនធានធម្មជាតិ មានន័យថា នៅពេលដែលជីវភាពរបស់សហគមន៍មានការកើនឡើងគឺការប្រើប្រាស់ ឬក៏ពឹងផ្អែកទាំងស្រុងទៅលើធនធានធម្មជាតិក៏ត្រូវបានកាត់បន្ថយដែរ។

លោក សង្ឃឹមថា នៅពេលដែលជីវភាពរបស់ប្រជាជនបានកើនឡើងតាមរយៈដែលយើងបានអនុវត្តកន្លងមក យើងឃើញថាប្រជាជនគឺមានសកម្មភាពខ្លាំងក្នុងការចូលរួម, ក្នុងការការពារធនធានធម្មជាតិ, ការចូលរួមដាំស្ដារ តាមអនុសាសន៍របស់ក្រសួងបរិស្ថាន ដែលព្យាយាមបង្កើនគម្របព្រៃឈើ។

លោកបានគូសបញ្ជាក់ថា គម្រោង INRM របស់យើងគឺត្រូវបញ្ចប់នៅក្នុងខែមិថុនា ឆ្នាំ២០២៥ ខាងមុខនេះ ហើយយើងសង្ឃឹមថា នឹងព្យាយាមរកធនធាន ឬក៏មូលនិធិពីដៃគូជាតិ និងអន្តរជាតិផ្សេងទៀត ដើម្បីបន្តការងារជាមួយនឹងសហគមន៍ដែលយើងបានធ្វើការកន្លងមកផងដែរ ៕