នាយករដ្ឋមន្ត្រីថៃ កោះប្រជុំជាបន្ទាន់ដើម្បីជជែករកដំណោះស្រាយចំពោះការធ្លាក់ចុះតម្លៃអង្ករនាពេលថ្មីៗ
បាងកក៖ លោកស្រី ផែថងថាន ស៊ីណាវ៉ាត្រា នាយករដ្ឋមន្ត្រីថៃ បានកោះប្រជុំជាមួយរដ្ឋមន្ត្រីពាណិជ្ជកម្ម លោក ភីឆៃ ណារីថាផាន (Pichai Naripthaphan) និងរដ្ឋមន្ត្រីកសិកម្ម និងសហករណ៍ លោកស្រី ណារូម៉ុន ភិនយូស៊ីនវ៉ាត់ (Narumon Pinyosinwat) នៅវិមានរដ្ឋាភិបាល កាលពីថ្ងៃព្រហស្បតិ៍ទី២០ ខែកុម្ភៈ ដើម្បីជជែករកដំណោះស្រាយចំពោះការធ្លាក់ចុះតម្លៃអង្ករនាពេលថ្មីៗ។
ការ ពិភាក្សា ធ្វើ ឡើង បន្ទាប់ ពី មាន សម្ពាធ កាន់ តែ ខ្លាំង ពីប្រជាកសិករ ដែល ទាមទារ ឱ្យ មាន អន្តរាគមន៍ ពីប្រមុខរាជ រដ្ឋាភិបាល ជា បន្ទាន់។ បន្ទាប់ពីកិច្ចប្រជុំរយៈពេលមួយម៉ោង លោក ភីឆៃ និងលោកស្រី ណារូម៉ុន បានប្រកាសថា អនុគណៈកម្មាធិការគ្រប់គ្រងគោលនយោបាយ និងទីផ្សារអង្ករជាតិ នឹងបើកសម័យប្រជុំនៅក្រសួងពាណិជ្ជកម្ម ដើម្បីបញ្ចប់ដំណោះស្រាយមុននឹងប្រកាសបន្ថែមទៀត។
លោកស្រី ណារូម៉ុន បានបញ្ជាក់ថា៖«លោកស្រីនាយករដ្ឋមន្ត្រី មានការព្រួយបារម្ភយ៉ាងខ្លាំងចំពោះប្រជាកសិករ ហើយបានណែនាំឱ្យក្រសួងកសិកម្មសហការជាមួយក្រសួងពាណិជ្ជកម្ម»។
លោកស្រីនាយករដ្ឋមន្ត្រី បានសង្កត់ធ្ងន់ថា យន្តការទាំងអស់ត្រូវតែត្រឹមត្រូវតាមច្បាប់ និងអាចធ្វើទៅបានដោយមានការណែនាំអំពីនីតិវិធីច្បាស់លាស់។ ទាំងនេះរួមបញ្ចូលការធានាកសិករដែលបានចុះបញ្ជីបញ្ជាក់ពូជស្រូវដែលពួកគេដាំដុះ ទំហំដីស្រែរបស់ពួកគេ និងកន្លែងស្តុកទុក។
ទន្ទឹមនឹងនោះ លោកស្រី ផែថងថាន បានបញ្ជាក់សាជាថ្មីពីការប្តេជ្ញាចិត្តរបស់រាជរដ្ឋាភិបាលក្នុងការជួយប្រជាកសិករ តាមរយៈការបង្ហោះនៅលើបណ្តាញសង្គមផ្ទាល់ខ្លួន ដោយបញ្ជាក់ថា រាជរដ្ឋាភិបាលតែងយកចិត្តទុកដាក់លើសហគមន៍កសិកម្ម និងប្តេជ្ញាអនុវត្តដំណោះស្រាយឱ្យបានឆាប់រហ័ស។
បញ្ហាសំខាន់ដែលកំពុងត្រួតពិនិត្យ គឺការដាំដុះយ៉ាងទូលំទូលាយនៃពូជស្រូវគុណភាពមិនល្អ ធ្វើឱ្យកសិករមិនទទួលបានទិន្នផលច្រើន និងធ្វើឱ្យតម្លៃទីផ្សារទាំងមូលធ្លាក់ចុះ។ ជាការឆ្លើយតប លោកស្រី ផែថងថាន បានផ្តាំផ្ញើដល់ក្រសួងកសិកម្ម ឱ្យពន្លឿនការអភិវឌ្ឍ និងចែកចាយពូជស្រូវគុណភាពខ្ពស់ដល់ប្រជាកសិករ។ លើសពីនោះ លោកស្រីនាយករដ្ឋមន្ត្រី ក៏បានជំរុញឱ្យប្រជាកសិករទាំងអស់រក្សាទំនុកចិត្តលើរាជរដ្ឋាភិបាលដែលកំពុងផ្តល់អាទិភាពដល់បញ្ហានេះ ហើយនឹងចាត់វិធានការយ៉ាងម៉ឺងម៉ាត់។
ដោយឡែក លោក ប្រាម៉ូត ចារើនស៊ីល (Pramote Charoensil) ប្រធានសមាគមកសិករ និងកសិកម្មថៃ បានបង្ហើបថា សមាគមបានដាក់សំណើផ្លូវការមួយទៅកាន់រដ្ឋមន្ត្រីក្រសួងកសិកម្ម និងពាណិជ្ជកម្ម ដើម្បីស្វែងរកការបំភ្លឺលើបញ្ហាសំខាន់ៗចំនួនបីទាក់ទងនឹងការធ្លាក់ចុះនៃតម្លៃអង្ករ៖ ទី១.តើ រដ្ឋាភិបាល នឹង អនុវត្ត វិធានការ អ្វីខ្លះ ដើម្បី ដោះស្រាយ ការ ធ្លាក់ ចុះ តម្លៃ អង្ករ នាពេល បច្ចុប្បន្ន? ទី២.តើ មាន ការ រីក ចម្រើន យ៉ាង ណា ចំពោះ ការ ស្នើ សុំ សំណង៥០០ បាត ក្នុង មួយ រ៉ៃ សម្រាប់ ហាម ដុត ចំបើង? និងចុងក្រោយ តើ រាជរដ្ឋាភិបាល នឹង ជួយ ដោយ របៀប ណា ដើម្បីឱ្យប្រជាកសិករទទួល បានពូជ ស្រូវល្អ និង ដោះស្រាយបែបណាចំពោះការ ឡើង ថ្លៃ ផលិតកម្ម ដូចជា ជី និង ឥន្ធនៈ?
សូមបញ្ជាក់ថា គិតត្រឹមថ្ងៃទី១៧ ខែកុម្ភៈ តម្លៃអង្ករ-សជាមធ្យម គឺ៨៦៥០បាតក្នុងមួយតោន ពោលគឺធ្លាក់ចុះ៣០ភាគរយពី១២៤៤៥បាតក្នុងមួយតោនកាលពីឆ្នាំមុន។ តម្លៃ អង្ករ ជា ច្រើន ប្រភេទ បាន ធ្លាក់ ចុះ ជា បន្តបន្ទាប់ ចាប់ តាំង ពី ខែ កញ្ញា ឆ្នាំ ២០២៤៕
