អាមេរិក ត្រៀមខ្លួនរួចជាស្រេច ដើម្បីដាក់សម្ពាធលើរុស្ស៊ី ក្នុងការបញ្ចប់សង្គ្រាមនៅអ៊ុយក្រែន

មុយនិច៖ អនុប្រធានាធិបតីសហរដ្ឋអាមេរិក លោក ជេឌី វ៉ាន បានឲ្យដឹងនៅថ្ងៃសុក្រទី១៤ ខែកុម្ភៈថា សហរដ្ឋអាមេរិក បានត្រៀមខ្លួនរួចជាស្រេច ដើម្បីដាក់សម្ពាធលើប្រទេសរុស្ស៊ីក្នុងការបញ្ចប់សង្គ្រាមនៅអ៊ុយក្រែន មុនពេលកិច្ចប្រជុំជាមួយប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី។

លោក វ៉ាន បានស្វែងរកការធានាឡើងវិញចំពោះបណ្តាប្រទេសអឺរ៉ុបដែលមានការព្រួយបារម្ភអំពីអវត្តមាននៃកិច្ចពិភាក្សាស្ដីពីការបញ្ចប់ជម្លោះជិតបីឆ្នាំ ដោយបញ្ជាក់ថា ពិតណាស់ ពួកគេគួរមានវត្តមានក្នុងតុចរចា។

លោក វ៉ាន ក៏បានឲ្យដឹងផងដែរថា រដ្ឋធានីវ៉ាស៊ីនតោនមានឥទ្ធិពលយោធា ដែលអាចប្រើបានប្រឆាំងនឹងរុស្ស៊ី ហើយថា លោកបានគាំទ្រអធិបតេយ្យភាពរបស់អ៊ុយក្រែន។

បន្ថែមពីនោះ អនុប្រធានាធិបតីសហរដ្ឋអាមេរិករូបនេះ បានលើកឡើងថា វាលឿនពេកក្នុងការនិយាយថា តើទឹកដីអ៊ុយក្រែនប៉ុន្មាននឹងនៅតែស្ថិតក្នុងដៃរបស់រុស្ស៊ី ឬការធានាសន្តិសុខអ្វីដែលអាម៉េរិក និងសម្ព័ន្ធមិត្តលោកខាងលិចអាចផ្ដល់ជូនរដ្ឋធានីកៀវ។

ថ្លែងមុនពេលជួបជាមួយលោក វ៉ាន នៅទីក្រុងមុយនិច លោក ហ្សេឡេនស្គី បានឲ្យដឹងថា លោកបានត្រៀមខ្លួនរួចជាស្រេចសម្រាប់កិច្ចពិភាក្សាដោយផ្ទាល់ជាមួយរុស្ស៊ី នៅពេលដែលរដ្ឋធានីកៀវឈានដល់ជំហររួមមួយជាមួយសហរដ្ឋអាម៉េរិក និងអឺរ៉ុបស្ដីពីរបៀបបញ្ចប់សង្គ្រាម។

លោកបន្តថា យើងត្រៀមខ្លួនសម្រាប់ការសន្ទនាណាមួយជាមួយអាម៉េរិក និងសម្ព័ន្ធមិត្តរបស់យើង។ ប្រសិនបើពួកគេផ្តល់ឱ្យយើងនូវចម្លើយជាក់លាក់ចំពោះសំណើជាក់លាក់ពីពួកយើង និងការយល់ដឹងទូទៅអំពីភាពគ្រោះថ្នាក់របស់មេដឹកនាំរុស្ស៊ី ជាមួយនឹងការយោគយល់រួមរបស់យើង យើងនឹងត្រៀមខ្លួនដើម្បីពិភាក្សាជាមួយប្រជាជនរុស្ស៊ី។

សន្និសីទទីក្រុងមុយនិចត្រូវបានគ្របដណ្ដប់ដោយការព្រួយបារម្ភយ៉ាងខ្លាំងដែលថារដ្ឋធានីវ៉ាស៊ីនតោន និងមូស្គូកំពុងធ្វើការឆ្ពោះទៅរកកិច្ចព្រមព្រៀងសន្តិភាពដ៏អាក្រក់សម្រាប់អ៊ុយក្រែន ដែលរដ្ឋធានីកៀវនឹងត្រូវប្រគល់ទឹកដីឱ្យរុស្ស៊ី និងឈប់ចង់ក្លាយជាសមាជិកអង្គការណាតូ។ រដ្ឋធានីវ៉ាស៊ីនតោនក៏បានជំរុញដៃគូអង្គការណាតូឱ្យបង្កើនការចំណាយយោធាដល់៥ ភាគរយនៃផលិតផលក្នុងស្រុកសរុប។