ប្រធានាធិបតីអ៊ុយក្រែន ត្រៀមខ្លួនរួចជាស្រេចក្នុងការដោះដូរទឹកដីជាមួយសន្តិភាព ពេលចរចាជាមួយរុស្ស៊ី
វ៉ាស៊ីនតោន៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី បានអះអាងថា លោកបានត្រៀមខ្លួនរួចជាស្រេចក្នុងការដោះដូរទឹកដីជាមួយសន្តិភាព ពេលចរចាជាមួយរុស្ស៊ី ខណៈរដ្ឋធានីមូស្គូបានដោះលែងអ្នកទោសជនជាតិអាម៉េរិកម្នាក់ឈ្មោះ ម៉ាក ហ្វូហ្គែល (Marc Fogel) ដែលប្រធានាធិបតីអាម៉េរិកពិរពណ៌នាទង្វើនេះថា ជាកាយវិការសុច្ឆន្ទៈក្នុងការបញ្ចប់សង្រ្គាម។
លោក ហ្សេឡេនស្គី នឹងជួបជាមួយអនុប្រធានាធិបតីអាម៉េរិក លោក ជេឌី វ៉ាន់ (JD Vance) ដែលតែងរិះគន់ចំពោះការគាំទ្រយោធារបស់សហរដ្ឋអាម៉េរិក ចំពោះអ៊ុយក្រែននៅថ្ងៃសុក្រ នៅឯសន្និសិទសន្តិសុខទីក្រុងមុយនិចនៃប្រទេសអាល្លឺម៉ង់។ កន្លងទៅ លោក ហ្សេឡេនស្គី តែងបដិសេដមិនដោះដូរទឹកដីជាមួយសន្តិភាពឡើយ។ យ៉ាងណា ពេលនេះ ហ្សេឡេនស្គី ត្រៀមខ្លួនរួចជាស្រេចដើម្បីដោះដូរទឹកដីនៅក្នុងតំបន់ឃឺសរបស់រុស្ស៊ី ដែលអ៊ុយក្រែនដណ្តើមបាននៅក្នុងការវាយលុកដ៏គួរឱ្យភ្ញាក់ផ្អើល កាលពីឆ្នាំមុន ជាមួយនឹងសន្តិភាព។
មេដឹកនាំអ៊ុយក្រែនរូបនេះអះអាងថា៖«យើងនឹងដោះដូរទឹកដីមួយនេះ ពីព្រោះអ៊ុយក្រែននឹងមិនអាចទទួលបានការធានាសន្តិសុខដោយគ្រាន់តែ មានអឺរ៉ុបជាដៃគូនោះទេ។ ការធានាសុវត្ថិភាពដោយគ្មានអាម៉េរិក មិនមែនជាការធានាសុវត្ថិភាពពិតប្រាកដនោះទេ»។
លោក ត្រាំ បានប្តេជ្ញាថា នឹងបញ្ចប់សង្រ្គាមនៅអ៊ុយក្រែនដែលអាចធ្វើទៅបាន ដោយការបង្អាក់ជំនួយពីសហរដ្ឋអាម៉េរិករាប់ពាន់លានដុល្លារ ដើម្បីបង្ខំឱ្យរដ្ឋធានីកៀវធ្វើសម្បទានទឹកដីជាថ្នូរនឹងសន្តិភាព។ ពាក់ព័ន្ធនឹងការដោះលែងអ្នកទោសពីសំណាក់រុស្ស៊ី លោក ត្រាំ បានប្រាប់អ្នកយកព័ត៌មានថា៖«យើងត្រូវបានយកចិត្តទុកដាក់ បានយ៉ាងល្អដោយប្រទេសរុស្ស៊ី។ ខ្ញុំសង្ឃឹមថា នោះជាការចាប់ផ្តើមនៃទំនាក់ទំនង ដែលយើងអាចឈានដល់ការបញ្ចប់សង្រ្គាម»។ គួររំឭកថា លោក ត្រាំ នៅក្នុងបទសម្ភាសជាមួយសារព័ត៌មាន Fox News ដែលបានចាក់ផ្សាយកាលពីថ្ងៃចន្ទ និយាយថា អ៊ុយក្រែនអាចក្លាយរបស់រុស្ស៊ីនៅថ្ងៃណាមួយ៕
