ពលរដ្ឋរងគ្រោះខ្យល់កន្រ្តាក់ចំនួន ៧៤គ្រួសារ មកពីឃុំចំនួន២ ក្នុងស្រុកកំពង់សីលា ទទួលបានអំណោយពីសាខាកាកបាទក្រហមកម្ពុជា ខេត្តព្រះសីហនុ

ភ្នំពេញ៖ នារសៀលថ្ងៃទី៩ ខែកុម្ភៈ ឆ្នាំ២០២៥ ឯកឧត្តម ម៉ាង ស៊ីណេត ប្រធានគណៈកម្មាធិការសាខាកាកបាទក្រហមកម្ពុជា ខេត្តព្រះសីហនុ បានអញ្ជើញចែកអំណោយសង្គ្រោះជូនប្រជាពលរដ្ឋរងគ្រោះខ្យល់កន្រ្តាក់ចំនួន ៧៤គ្រួសារ មកពីឃុំចំនួន២ ក្នុងស្រុកកំពង់សីលា នៅក្នុងបរិវេណវត្តចំប៉ា ឃុំកំពង់សីលា ស្រុកកំពង់សីលា ខេត្តព្រះសីហនុ មានការចូលរួមពីអ្នកតំណាងរាស្ត្រមណ្ឌលខេត្តព្រះសីហនុ មន្ត្រីសាខា អ្នកស្ម័គ្រចិត្តសាខា និងសប្បុរសជន។

ជាមួយគ្នានេះដែរ ឯកឧត្តម ម៉ាង សុីណេត បានពាំនាំការសួរសុខទុក និងសេចក្តីនឹករលឹកពីសម្តេចកិ្តតិព្រឹទ្ធបណ្ឌិត ប៉ុន រ៉ានី ហ៊ុនសែន ប្រធានកាកបាទក្រហ មកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា សម្តេចទាំងទ្វេរតែងតែយកចិត្តទុកដាក់ផ្នែកមនុស្សធម៌ និងបានធ្វើការណែនាំឱ្យសាខាខេត្ត យកចិត្តទុក ដាក់ដល់បងប្អូនប្រជាពលរដ្ឋរងគ្រោះធម្មជាតិគ្រប់រូបភាព។

ក្នុងឱកាសនោះ ឯកឧត្តមប្រធានគណៈកម្មាធិការសាខា បានថ្លែងអំណរគុណប្រធានអនុសាខាកាកបាទក្រហមស្រុកកំពង់សីលា មន្ត្រីសាខា និងអ្នកស្ម័គ្រចិត្តរបស់យើងដែលបានចូលរួមយ៉ាងសកម្មគ្រប់សកម្មភាពមនុស្សធម៌ជាស្មារតីទទួលខុសត្រូវ ព្រោះទីណាមានការលំបាក ទីនោះមានកាកបាទក្រហមនៅជាមួយបងប្អូនប្រជាពលរដ្ឋជានិច្ច ដោយមិនប្រកាន់ វណ្ណៈ ពូជសាសន៍ ឬគណបក្សនយោបាយនោះទេ។

ឯកឧត្តមបានបញ្ជាក់ថា រាជរដ្ឋាភិបាលកម្ពុជា ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត បានដាក់ចេញនូវយុទ្ធសាស្ត្របញ្ចកោណដំណាក់កាលទី១ នៃរដ្ឋសភា ក្នុងការជំរុញខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណង និងបានដាក់ចេញនូវគោលនយោបាយលើកទឹកចិត្តជំរុញការវិនិយោគនៅខេត្តព្រះសីហនុ ឆ្នាំ២០២៤ និងបន្ត២០២៥ ក្នុងនោះសម្តេចបានធ្វើការផ្សព្វផ្សាយកម្មវិធីវិនិយោគទៅដល់អ្នកវិនិយោគក្នុង និងក្រៅប្រទេស ស្តីពីការអភិវឌ្ឍន៍ និងស្ថេរភាពនយោបាយរបស់កម្ពុជា ពិសេសគោលនយោ បាយយុទ្ធសាស្ត្របញ្ចកោណ តំណាក់កាលទី១ ដោយផ្តោតសំខាន់ទៅលើមនុស្ស ផ្លូវ ទឹក ភ្លើង និងបច្ចេកវិទ្យា។

អំណោយដែលចែកជូនប្រជាពលរដ្ឋរងគ្រោះខ្យល់កន្រ្តាក់ចំនួន ៧៤គ្រួសារ ក្នុងមួយគ្រួសារទទួលបាន៖ អង្ករ ២៥គីឡូក្រាម, មី ១កេស, ត្រីខ ១០កំប៉ុង, ទឹកត្រី ១យួរ, កន្ទេល១, ឃីត១ (សារុង១, ក្រមា១, មុង១, ភួយ១) និងថវិកា ៥០.០០០រៀល។ បន្ទាប់មក ឯកឧត្តមក៏បានប្រគេនអង្ករ ៤បាវ, មី ៤កេស, ត្រីខ ៤យួរ, ទឹកបរិសុទ្ធ ៤កេស និងបច្ច័យមួយចំនួន ដល់ព្រះចៅអធិកាវត្តចំប៉ាផងដែរ ៕