ពលរដ្ឋងាយរងគ្រោះបំផុតចំនួន ៧គ្រួសារ ក្នុងសង្កាត់រកាធំ ក្រុងច្បារមន ខេត្តកំពង់ស្ពឺ ទទួលអំណោយមនុស្សធម៌ពីកាកបាទក្រហមកម្ពុជា
ភ្នំពេញ៖ ឆ្លៀតក្នុងដំណើរបេសកកម្មនាខេត្តកំពង់ស្ពឺ នៅព្រឹកថ្ងៃទី៨ ខែកុម្ភៈ ឆ្នាំ២០២៥ លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា និងវត្តមានចូលរួមពីឯកឧត្តម ទ្រី វ៉ាន់ឌី អនុប្រធានគណៈកម្មាធិការសាខា ក្រុមប្រតិបត្តិសាខា និងមន្ត្រីថ្នាក់កណ្តាល អញ្ជើញចុះសួរសុខទុក្ខនិងនាំយកអំណោយមនុស្សធម៌របស់កាកបាទក្រហមកម្ពុជា ជូនដល់ប្រជាពលរដ្ឋងាយរងគ្រោះបំផុតចំនួន៧គ្រួសារនៅតាមខ្នងផ្ទះ ស្ថិតក្នុងសង្កាត់រកាធំ ក្រុងច្បារមន ខេត្តកំពង់ស្ពឺ។
នាឱកាសនោះ លោកជំទាវ អគ្គលេខាធិការរងទី១ កាកបាទក្រហមកម្ពុជា បានពាំនាំការផ្ដាំផ្ញើសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលសម្តេចតែងតែមានក្ដីនឹករលឹក អាណិតអាសូរចំពោះប្រជាពលរដ្ឋទាំងអស់។
ជាមួយគ្នានេះ លោកជំទាវ បញ្ជាក់បន្ថែមថា «កាកបាទក្រហមកម្ពុជា ដែលមាន ហ្លួងម៉ែ នរោត្តម មុនិនាថ សីហនុ ជាព្រះប្រធានកិត្តិយស និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន តែងតែផ្តាំផ្ញើដល់មន្ត្រីក្រោមឱវាទពេលមានដំណើរបេសកកម្មទៅទីណាកន្លែងណា ត្រូវឆ្លៀតពេលចុះមើលនិងសួរសុខទុក្ខចំពោះចាស់ជរាឥតទីពឹង ស្រ្តីមេម៉ាយ កុមារកំព្រា អ្នករស់នៅជាមួយមេរោគអេដស៍ និងជនងាយរងគ្រោះគ្រប់ប្រភេទនៅទូទាំងប្រទេសដែលមានការលំបាកខ្វះខាតផ្នែកជីវភាព ដែលត្រូវការឱ្យជួយ»។
ទន្ទឹមនឹងនេះ លោកជំទាវ បានពាំនាំនូវការផ្តាំផ្ញើពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានអំពាវនាវសូមឱ្យបងប្អូនប្រជាពលរដ្ឋទាំងអស់ ត្រូវថែរក្សាអនាម័យបរិស្ថានឱ្យបានល្អ សម្អាតជុំវិញផ្ទះឱ្យបានស្អាត ដោយប្រកាន់យកការហូបស្អាត ផឹកស្អាត និងរស់នៅស្អាត ដើម្បីឱ្យការរស់នៅស្អាតមានសុខភាពល្អ ជៀសផុតពីជំងឺផ្សេងៗ និងមិនខាតបង់ថវិកាក្នុងការព្យាបាលជំងឺ។
សូមជម្រាបជូនថាប្រជាពលរដ្ឋងាយរងគ្រោះទទួលបានអំណោយមនុស្សធម៌ពីកាកបាទក្រហមកម្ពុជាក្នុងមួយគ្រួសារទទួលបាន ៖ អង្ករ ២៥គីឡូក្រាម, ឃីត១កញ្ចប់, មី១កេស, ត្រីខ១០កំប៉ុង, ទឹកស៊ីអ៊ីវ១យួរ និងថវិកា៥ម៉ឺនរៀល។ ដោយឡែកគ្រួសារលោកតា៩៥ឆ្នាំនិងលោកយាយ៨៥ឆ្នាំ និងគ្រួសារដែលមានកូនភ្លោះពិការ ទទួលបានថវិកា១០ម៉ឺនរៀលក្នុងមួយគ្រួសារផងដែរ ៕
