នាយករដ្ឋមន្ត្រីថៃ ថាវិបត្តិកំហាប់ភាគល្អិតនិចល PM2.5 មិនមែនជាបញ្ហារបស់ប្រទេសណាមួយឡើយ
បាងកក៖ នាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត្រា បានអះអាងថា វិបត្តិកំហាប់ភាគល្អិតនិចល PM2.5 មិនមែនជាបញ្ហារបស់ប្រទេសណាមួយឡើយ ប៉ុន្តែជាបញ្ហាដែលទាមទារកិច្ចសហប្រតិបត្តិការអាស៊ានដើម្បីដោះស្រាយ។
ថ្លែងទៅកាន់អ្នកសារព័ត៌មានបន្ទាប់ពីត្រឡប់មកពីវេទិកាសេដ្ឋកិច្ចពិភពលោក (WEF) នៅទីក្រុងដាវ៉ូស ប្រទេសស្វីស លោកស្រី ផែថងថាន បានបញ្ជាក់ថា វិបត្តិកាន់តែអាក្រក់នេះ មិនមែនគ្រាន់តែជាកង្វល់ជាតិទៀតទេ។ ប្រទេសមួយចំនួនក្នុងតំបន់ក៏កំពុងប្រឈមនឹងបញ្ហាបំពុលឆ្លងដែនផងដែរ។
លោកស្រីបានបន្តថា រដ្ឋមន្ត្រីការបរទេស លោក ម៉ារីស សាង៉ាមវង្សា (Maris Sangiampongsa) ត្រូវបានស្នើឱ្យចរចាជាមួយបណ្តាប្រទេសអាស៊ាន ដើម្បីដោះស្រាយបញ្ហានេះ ក្រោមក្របខ័ណ្ឌដែលមានស្រាប់។
លោកស្រី ផែថងថាន បានបន្ថែមថា កិច្ចខិតខំប្រឹងប្រែងរួមគ្នាដើម្បីកាត់បន្ថយកសិកម្មព្រៃដុតនៅក្នុងប្រទេសថៃ និងប្រទេសជិតខាងត្រូវបានពិភាក្សា។ លោកស្រីបានបន្ថែមថា អាជ្ញាធរថៃបានដាក់ចេញនូវវិធានការបង្ការ រួមទាំងការដាក់ពិន័យចំពោះការដុតក្នុងវិស័យកសិកម្ម ចាប់តាំងពីខែវិច្ឆិកាឆ្នាំមុនមកម្ល៉េះ។
នាយករដ្ឋមន្ត្រីថៃរូបនេះ លើកឡើងទៀតថា ការដោះស្រាយបញ្ហានេះក៏ទាមទារឱ្យមានការចូលរួមពីប្រទេសអាស៊ានផងដែរ។ នេះមិនមែនគ្រាន់តែជាទំនួលខុសត្រូវរបស់មនុស្សម្នាក់ ឬប្រទេសមួយប៉ុណ្ណោះទេ មនុស្សគ្រប់គ្នាត្រូវតែរួមចំណែកក្នុងការបង្កើតអំណាចដ៏អស្ចារ្យ ដើម្បីជួយដោះស្រាយបញ្ហា PM2.5។
លលោកស្រីបន្តថា សកម្មភាពភ្លាមៗកំពុងត្រូវបានធ្វើដើម្បីកាត់បន្ថយកម្រិតការបំពុល ខណៈយុទ្ធសាស្ត្រពាក់កណ្តាល និងរយៈពេលវែងកំពុងត្រូវបានរៀបចំ។
នៅពេលសួរអំពីការអនុវត្តគោលនយោបាយធ្វើការងារពីផ្ទះនៅទូទាំងប្រទេស លោកស្រីបើកចំហចំពោះគំនិតនេះ ដោយនិយាយថា បុគ្គលិកដែលអាចធ្វើការពីចម្ងាយដោយមិនរំខានដល់ប្រតិបត្តិការរបស់ក្រុមហ៊ុនអាចជួយកាត់បន្ថយការបំភាយឧស្ម័នពុលដែលទាក់ទងនឹងចរាចរណ៍។ កិច្ចពិភាក្សាបន្ថែមទៀតនឹងត្រូវធ្វើឡើងជាមួយភ្នាក់ងាររាជរដ្ឋាភិបាល ថាតើពួកគេអាចចេញសេចក្តីណែនាំស្តីពីការងារពីចម្ងាយដែរឬទេ?
គួរបញ្ជាក់ថា គណៈកម្មាធិការប្រយុទ្ធប្រឆាំងនឹង PM2.5 ត្រូវបានបង្កើតឡើងដោយរដ្ឋមន្ត្រីក្រសួងមហាផ្ទៃ លោក អានូទិន ច័ន្ទវីរ៉ាគុល(Anutin Charnvirakul)។ គុណភាពខ្យល់នៅរាជធានីបាងកកនៅតែអាក្រក់ ដោយតំបន់ចំនួន២៣ ត្រូវបានចាត់ថ្នាក់ជា តំបន់ក្រហម ដោយសារតែកម្រិត PM2.5 មិនមានសុវត្ថិភាពកាលពីថ្ងៃសៅរ៍។
