អ្នកការទូតកំពូលថ្មីរបស់សហរដ្ឋអាម៉េរិក លោក ម៉ាកូ រូប៊ីអូ អះអាងសាជាថ្មី អំពីការគាំទ្រឥតងាករេរបស់មហាអំណាចសហរដ្ឋអាម៉េរិកសម្រាប់អ៊ីស្រាអែល
វ៉ាស៊ីតោន៖ លោក ម៉ាកូ រូប៊ីអូ អ្នកការទូតកំពូលថ្មីរបស់សហរដ្ឋអាម៉េរិក បានអះអាងសាជាថ្មី អំពីការគាំទ្រឥតងាករេរបស់មហាអំណាចសហរដ្ឋអាម៉េរិកសម្រាប់អ៊ីស្រាអែល ប៉ុន្មានថ្ងៃបន្ទាប់ពីលោកប្រធានាធិបតី ដូណាល់ ត្រាំ ស្បថចូលកាន់តំណែងជាផ្លូវការ។
ការអះអាងនេះ ធ្វើឡើងស្របពេលដែលអ៊ីស្រាអែលវាយឆ្មក់ទ្រង់ទ្រាយធំលើតំបន់វេសប៊ែង West Bank។
នៅពេលដែលអ៊ីស្រាអែលបន្តប្រតិបត្តិការដ៏សាហាវរបស់ខ្លួននៅទីក្រុងជេនីន នៃតំបន់ វេសប៊ែង លោក រូប៊ីអូ បានធានាដល់នាយករដ្ឋមន្ត្រីអ៊ីស្រាអែល លោក បេនចាមីន នេតាន់យ៉ាហ៊ូ ពីការបន្តគាំទ្ររបស់រដ្ឋធានីវ៉ាស៊ីនតោន។ លោក រូប៊ីអូ បាននិយាយទៅកាន់លោក នេតាន់យ៉ាហ៊ូ ពីរដ្ឋធានីវ៉ាស៊ីនតោន នៅយប់ថ្ងៃពុធទី២២មករាថា ដើម្បីគូសបញ្ជាក់ពីការរក្សាការគាំទ្រយ៉ាងខ្ជាប់ខ្ជួនរបស់សហរដ្ឋអាម៉េរិកសម្រាប់អ៊ីស្រាអែល គឺជាអាទិភាពកំពូលរបស់ប្រធានាធិបតី ត្រាំ។ នេះបើតាមអ្នកនាំពាក្យក្រសួងការបរទេស លោកស្រី តាំមី ប្រ៊ូស (Tammy Bruce)។
លោកស្រី ប្រ៊ូស បញ្ជាក់ថា ប្រមុខការទូតអាម៉េរិក ក៏បានអបអរសាទរនាយករដ្ឋមន្រ្តីចំពោះជោគជ័យរបស់អ៊ីស្រាអែលប្រឆាំងនឹងក្រុមហាម៉ាស និងហេស្សបូឡាហ៍ ហើយបានសន្យាថា នឹងធ្វើការដោយមិននឿយហត់ ដើម្បីជួយដោះលែងចំណាប់ខ្មាំងដែលកំពុងជាប់ឃុំនៅហ្កាហ្សាទាំងអស់។
កាលពីថ្ងៃអាទិត្យទី១៩ ខែមករា អ៊ីស្រាអែល និងក្រុមហាម៉ាស បានចាប់ផ្តើមអនុវត្តបទឈប់បាញ់ បន្ទាប់ពីការប្រយុទ្ធគ្នាអស់រយៈពេល១៥ខែ ដែលរួមមាន៖ ការផ្លាស់ប្ដូរចំណាប់ខ្មាំង និងអ្នកទោស។ នៅក្នុងសកម្មភាពដំបូងបន្ទាប់ពីឡើងកាន់តំណែង លោក ត្រាំ បានបញ្ចប់ការដាក់ទណ្ឌកម្មលើអ្នកតាំងលំនៅនៅតំបន់វេសប៊ែង ជាជនជាតិអ៊ីស្រាអែលជ្រុលនិយម ដែលដាក់ដោយលោក បៃឌិន ជុំវិញការវាយប្រហាររបស់ពួកគេលើជនជាតិប៉ាឡេស្ទីន។
គួររំឭកផងដែរថា ក្នុងអំឡុងពេលអាណត្តិដំបូងរបស់គាត់នៅក្នុងសេតវិមាន លោក ត្រាំ បានដាក់ចេញនូវផែនការសន្តិភាពដែលគាត់ និងអ្នកគាំទ្រហៅថា «កិច្ចព្រមព្រៀងប្រចាំសតវត្សន៍» ដែលនឹងរួមការបញ្ចូលឧបសម្ព័ន្ធសំខាន់ៗរបស់អ៊ីស្រាអែលនៅតំបន់វេសប៊ែង។
ខណៈលោក រូប៊ីអូ និងលោក នេតាន់យ៉ាហ៊ូ ជួបពិភាក្សាគ្នា ប្រតិបត្តិការរបស់អ៊ីស្រាអែលនៅតំបន់វេសប៊ែង ត្រូវបានគេហៅថា ជញ្ជាំងដែក កំពុងដំណើរការ។ យោធាអ៊ីស្រាអែលអះអាងបានសម្លាប់ភេរវករជាង១០នាក់ ខណៈក្រសួងសុខាភិបាលប៉ាឡេស្ទីនបង្ហាញថា ប្រតិបត្តិការនេះបានសម្លាប់មនុស្ស១០នាក់ និងបណ្តាលឱ្យមនុស្ស៣៥នាក់ផ្សេងទៀតរងរបួស។
អភិបាលក្រុងជេនីន លោក កាម៉ាល់ អាប៊ូ អាល់រូប (Kamal Abu al-Rub) បានបញ្ជាក់ថា កងកម្លាំងអ៊ីស្រាអែលបានឃាត់ខ្លួនមនុស្សប្រហែល២០នាក់ ចាប់តាំងពីប្រតិបត្តិការបានចាប់ផ្តើមកាលពីថ្ងៃអង្គារ។ ទន្ទឹមនឹងនោះ អ្នកឆ្លើយឆ្លងព័ត៌មានរបស់ទីភ្នាក់ងារសារព័ត៌មាន AFP ម្នាក់បានរាយការណ៍ថា បានឭសំឡេងកាំភ្លើង និងការផ្ទុះចេញពីជំរំជនភៀសខ្លួននៅភាគខាងជើងនៃទីក្រុង ជាកន្លែងដែលកងកម្លាំងអ៊ីស្រាអែល វាយឆ្មក់ម្ដងហើយម្ដងទៀត។
អ្នកនាំពាក្យយោធាអ៊ីស្រាអែល លោក ណាដាវ សូសានី (Nadav Shoshani) បាននិយាយនៅក្នុងសន្និសីទសារព័ត៌មានមួយថា ការវាយឆ្មក់នៅទីក្រុងជេនីនមានគោលបំណងប្រឆាំងនឹងការវាយប្រហារភេរវកម្ម។
លោកបង្ហាញថា ចាប់តាំងពីការចាប់ផ្តើមនៃសង្រ្គាមហ្កាហ្សា អ៊ីស្រាអែលជួបប្រទះការប៉ុនប៉ងវាយប្រហារភេរវកម្មជាង២០០០ លើកពីតំបន់វេសប៊ែង ដោយបន្ថែមថា កងទ័ពបានសម្លាប់ភេរវករប្រហែល៨០០នាក់។
លោកនាយក រដ្ឋមន្ត្រី នេតាន់យ៉ាហ៊ូ ថា ការ វាយ ឆ្មក់ នេះ មាន គោល បំណង លុបបំបាត់ អំពើ ភេរវកម្ម នៅក្រុងជេនីន។ លោកបានភ្ជាប់ប្រតិបត្តិការនេះទៅនឹងយុទ្ធសាស្ត្រដ៏ទូលំទូលាយនៃការប្រឆាំងអ៊ីរ៉ង់ នៅតំបន់ហ្កាហ្សា លីបង់ ស៊ីរី យេម៉ែន និងតំបន់វេសប៊ែង៕
