ឯកឧត្តម ជីវ ស៊ុនហេង អញ្ជើញបើកវេទិកាសាធារណៈ ដោះស្រាយបញ្ហាប្រឈម និងតម្រូវការនានារបស់ប្រជាពលរដ្ឋ ក្នុងឃុំកំពង់ចិនជើង ស្រុកស្ទោង ខេត្តកំពង់ធំ
ភ្នំពេញ៖ នៅព្រឹកថ្ងៃព្រហស្បតិ៍ ១០រោច ខែបុស្ស ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី២៣ ខែមករា ឆ្នាំ២០២៥នេះ ឯកឧត្តម ជីវ ស៊ុនហេង ប្រធានក្រុមការងាររាជរដ្ឋាភិបាលចុះមូលដ្ឋានឃុំកំពង់ចិនជើង ក្នុងនាមតំណាងឯកឧត្តមរដ្ឋមន្ត្រី ថោ ជេដ្ឋា អនុប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកស្ទោង បានអញ្ជើញជាអធិបតីបើកវេទិកាសាធារណៈ ដើម្បីដោះស្រាយបញ្ហាប្រឈម និងតម្រូវការនានារបស់ប្រជាពលរដ្ឋក្នុងឃុំកំពង់ចិនជើង ស្រុកស្ទោង ខេត្តកំពង់ធំ។
សូមជម្រាបថា វេទិកាសាធារណៈនាពេលនេះមានការអញ្ជើញចូលរួមពីឯកឧត្តម លោក លោកស្រី ជាអនុប្រធាន និងសមាជិកក្រុមការងាររាជរដ្ឋាភិបាលចុះមូលដ្ឋានឃុំកំពង់ចិនជើង ព្រមទាំងលោកអភិបាលនៃគណៈអភិបាលស្រុកស្ទោង សមាជិកក្រុមប្រឹក្សាឃុំ ប្រធាន អនុប្រធានភូមិ លោកគ្រូ អ្នកគ្រូ អាជ្ញាធរគ្រប់លំដាប់ថ្នាក់ និងប្រជាពលរដ្ឋ សរុបប្រមាណ ២៩៨នាក់។
ឯកឧត្តម ជីវ ស៊ុនហេង បានបញ្ជាក់ឱ្យដឹងថា ការបើកវេទិកាសាធារណៈគឺ ដើម្បីត្រួតពិនិត្យការគាំទ្រ និងជំរុញការអនុវត្តកម្មវិធីនយោបាយ និងយុទ្ធសាស្ត្របញ្ចកោណ ដំណាក់កាលទី១ និងកំណែទម្រង់នានារបស់រាជរដ្ឋាភិបាល អាណត្តិទី៧ ព្រមទាំង ដើម្បីឆ្លើយតបទៅនឹងសំណូមពរចាំបាច់នានាក្នុងមូលដ្ឋាន និងលើកនូវវិធានការដើម្បីដោះស្រាយឱ្យបានទាន់ពេលវេលា និងមានប្រសិទ្ធភាពខ្ពស់។
ថ្លែងក្នុងអង្គពិធី ឯកឧត្តម ជីវ ស៊ុនហេង បានលើកឡើងថា រាជរដ្ឋាភិបាលនីតិកាលទី៧ នៃរដ្ឋសភា ក្រោមការដឹកនាំដ៏ឈ្លាសវៃ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបានដាក់ចេញនូវគោលនយោបាយ និងយុទ្ធសាស្ត្របញ្ចកោណដំណាក់កាលទី១ ដើម្បីកំណើន ការងារ សមធម៌ ប្រសិទ្ធភាព និង ចីរភាព ដោយបានកំណត់នូវអាទិភាពគន្លឹះ ចំនួន ៥ គឺ៖ មនុស្ស ផ្លូវ ទឹក ភ្លើង និង បច្ចេកវិទ្យា សំដៅលើកកម្ពស់ជីវភាពរស់នៅរបស់ប្រជាពលរដ្ឋឱ្យកាន់តែមានភាពល្អប្រសើរឡើង កសាងមូលដ្ឋានគ្រឹះឆ្ពោះទៅសម្រេចចក្ខុវិស័យកម្ពុជាឆ្នាំ២០៣០ និងឆ្នាំ២០៥០។
ក្នុងអង្គវេទិកានេះដែរ ឯកឧត្តមប្រធានក្រុមការងាររាជរដ្ឋាភិបាលចុះមូលដ្ឋានឃុំកំពង់ចិនជើង បានអញ្ជើញដឹកនាំវេទិកា និងបានធ្វើការឆ្លើយតបចំពោះបញ្ហាប្រឈម សំណើ សំណូម និងកង្វល់នានា ដែលបងប្អូនប្រជាពលរដ្ឋស្នើឡើងដូចជា៖ ១).កង្វះប្រភពទឹក និងប្រព័ន្ធធារាសាស្ត្រ សម្រាប់ប្រជាកសិករធ្វើស្រែ, ២).ស្ទឹងរីងទឹកអស់ធ្វើឱ្យខ្វះទឹកសម្រាប់គោក្របីផឹក និងសម្រាប់ស្រោចស្រពដំណាំ, ៣).បញ្ហាក្មេងទំនើងនិងបញ្ហាគ្រឿងញៀន និង៤).ការស្នើសុំកសាងហេដ្ឋារចនាសម្ព័ន្ធនានាមាន ផ្លូវថ្នល់ ប្រឡាយទឹក និងអគារប៉ុស្តិ៍នគរបាលរដ្ឋបាល។
សូមបញ្ជាក់ថា ឃុំកំពង់ចិនជើង ជាឃុំមួយស្ថិតនៅតាមបណ្តោយផ្លូវជាតិលេខ៦ ដែលមានព្រំប្រទល់ខាងកើតទល់នឹងឃុំទ្រា ខាងជើងទល់នឹងឃុំប្រឡាយ ខាងត្បូងទល់នឹងឃុំកំពង់ចិនត្បូង ខាងលិចទល់នឹងឃុំម្សាក្រង។ ឃុំនេះមានភូមិរដ្ឋបាលចំនួន ៦ភូមិ មានគ្រួសារសរុប ១.៨០៨គ្រួសារ មានប្រជាពលរដ្ឋចំនួន ៨.៣២៧នាក់ ស្រី ៤២០២នាក់ ក្នុងនោះអាយុ ១៨ឆ្នាំឡើងមាន ៥.៥៤២នាក់ ស្រី ២៩០៣នាក់ មានផ្ទៃដីសរុប ២៤៥៥,៧៩ហិកតា ក្នុងនោះផ្ទៃដីលំនៅដ្ឋាន ២០៥,៩៣ ហិកតា និងផ្ទៃដីបង្កបង្កើនផលចំនួន ២២៤៤,៩៦ហិកតា ៕
