លោក Netanyahu៖ អ៉ីស្រាអែល រក្សាសិទ្ធិដើម្បីបន្តសង្រ្គាមឡើងវិញបើចាំបាច់ ក្រោមការគាំទ្រពីអាមេរិក ខណៈបទឈប់បាញ់ហ្កាហ្សា នឹងចូលជាធរមាននាថ្ងៃអាទិត្យនេះ
ហ្សេរុយហ្សាឡឹម៖ បទឈប់បាញ់នៅតំបន់ហ្គាហ្សា រវាងអ៊ីស្រាអែល និងក្រុមហាម៉ាស នឹងចូលជាធរមាននៅព្រឹកថ្ងៃអាទិត្យ ទី១៩ ខែមករានេះ ជាមួយនឹងការដោះលែងចំណាប់ខ្មាំងនៅប៉ុន្មានម៉ោងក្រោយ ដោយបើកផ្លូវឆ្ពោះទៅរកការបញ្ចប់សង្រ្គាមរយៈពេល១៥ខែ ដែលបានហែកហួរតំបន់មជ្ឈិមបូព៌ាស្ទើរក្លាយជាចម្រៀកៗ។
ប្រព័ន្ធផ្សព្វផ្សាយដែលគាំទ្រក្រុមហាម៉ាសបានរាយការណ៍ថា កងកម្លាំងអ៊ីស្រាអែលបានចាប់ផ្តើមដកខ្លួនចេញពីក្នុងតំបន់រ៉ាហ្វា ទៅកាន់ច្រករបៀង Philadelphia តាមបណ្តោយព្រំដែនរវាងអេហ្ស៊ីប និងហ្គាហ្សា។
កិច្ចព្រមព្រៀងបទឈប់បាញ់ បានធ្វើឡើងបន្ទាប់ពីមានការចរចាអស់រយៈពេលជាច្រើនខែ ដែលត្រូវបានសម្របសម្រួលដោយអេហ្ស៊ីប កាតា និងសហរដ្ឋអាម៉េរិក ហើយបានកើតឡើងមុនថ្ងៃសម្ពោធប្រធានាធិបតីជាប់ឆ្នោតសហរដ្ឋអាម៉េរិក លោក ដូណាល់ ត្រាំ នៅថ្ងៃទី២០ ខែមករា។
បទឈប់បាញ់ ៣ដំណាក់កាល នឹងចូលជាធរមាននៅម៉ោង៦ៈ៣០នាទី(ម៉ោងក្នុងស្រុក) នៅថ្ងៃអាទិត្យនេះ។ ដំណាក់កាលដំបូងនឹងមានរយៈពេល៦សប្តាហ៍ ក្នុងអំឡុងពេលនោះចំណាប់ខ្មាំង៣៣នាក់ក្នុងចំណោមចំណាប់ខ្មាំង៩៨នាក់ ដែលនៅសល់ រួមមាន៖ ស្ត្រី កុមារ បុរសអាយុលើសពី៥០ឆ្នាំ អ្នកមានជំងឺ និងរបួស នឹងត្រូវបានដោះលែងជាថ្នូរនឹងអ្នកទោស និងអ្នកជាប់ឃុំប៉ាឡេស្ទីនជិត២០០០នាក់។
ចំនួននេះរាប់បញ្ចូលទាំងអ្នកទោសប្រុស ស្រី និងក្មេងជំទង់ចំនួន ៧៣៧នាក់ ដែលខ្លះជាសមាជិកនៃក្រុមសកម្មប្រយុទ្ធ ត្រូវបានកាត់ទោសពីការវាយប្រហារដែលបានសម្លាប់ជនជាតិអ៊ីស្រាអែលជាច្រើននាក់ ក៏ដូចជាជនជាតិប៉ាឡេស្ទីនរាប់រយនាក់មកពីហ្គាហ្សា ដែលត្រូវបានឃុំឃាំងចាប់តាំងពីការចាប់ផ្តើមនៃសង្រ្គាម។ ចំណាប់ខ្មាំងស្ត្រី៣នាក់ ត្រូវបានគេរំពឹងថា នឹងត្រូវបានដោះលែងនៅរសៀលថ្ងៃអាទិត្យ តាមរយៈកាកបាទក្រហមជាថ្នូរនឹងអ្នកទោសចំនួន៩០នាក់។
អ្នកចរចាបទឈប់បាញ់អាម៉េរិក លោក Brett McGurk បានឱ្យដឹងថា កិច្ចព្រមព្រៀងនេះក៏ទាមទារឱ្យមានការដោះលែងចំណាប់ខ្មាំងស្ត្រី៤នាក់បន្ថែមទៀតក្នុងរយៈពេល ៧ថ្ងៃក្រោយ បន្ទាប់មកមានការដោះលែងចំណាប់ខ្មាំង៣នាក់បន្ថែមទៀតរៀងរាល់៧ថ្ងៃម្ដង។ ក្នុងដំណាក់កាលដំបូង កងទ័ពអ៊ីស្រាអែលនឹងដកថយពីទីតាំងមួយចំនួនរបស់ខ្លួននៅក្នុងតំបន់ហ្គាហ្សា ហើយប្រជាជនប៉ាឡេស្ទីនដែលផ្លាស់ទីលំនៅពីតំបន់នានានៅភាគខាងជើងហ្គាហ្សា នឹងត្រូវបានអនុញ្ញាតឱ្យត្រឡប់មកវិញ។
ក្រុមការងាររបស់ប្រធានាធិបតីអាម៉េរិក លោក ចូ បៃឌិន បានធ្វើការយ៉ាងជិតស្និទ្ធជាមួយនឹងបេសកជនមជ្ឈិមបូព៌ារបស់លោក ត្រាំ ពោលគឺលោក Steve Witkoff ដើម្បីជំរុញកិច្ចព្រមព្រៀងនេះ ខណៈការឡើងកាន់តំណែងរបស់លោកកាន់តែខិតជិតមកដល់។
លោក ត្រាំ បានទាមទារម្ដងទៀតថា កិច្ចព្រមព្រៀងមួយត្រូវបានធ្វើឡើងយ៉ាងឆាប់រហ័ស ដោយព្រមានម្ដងហើយម្ដងទៀតថា នឹងមានផលប៉ះពាល់ធ្ងន់ធ្ងរ ប្រសិនបើចំណាប់ខ្មាំងមិនត្រូវបានដោះលែង។
ទន្ទឹមគ្នានោះ នាយករដ្ឋមន្ត្រីអ៊ីស្រាអែល លោក ប៊េនចាមីន នេតាន់យ៉ាហ៊ូ មួយថ្ងៃមុនពេលបទឈប់បាញ់ត្រូវបានកំណត់ចូលជាធរមាន បានអះអាងថា អ៊ីស្រាអែលរក្សាសិទ្ធិក្នុងការបន្តការប្រយុទ្ធគ្នានៅតំបន់ហ្គាហ្សា ដោយមានការគាំទ្រពីសហរដ្ឋអាម៉េរិក ខណៈសន្យាថា នឹងនាំយកចំណាប់ខ្មាំងទាំងអស់ដែលឃុំខ្លួននៅក្នុងទឹកដីប៉ាឡេស្ទីនមកប្រទេសវិញ។
លោក នេតាន់យ៉ាហ៊ូ បានកត់សម្គាល់ក្នុងសេចក្តីថ្លែងការណ៍តាមទូរទស្សន៍ថា៖ យើងរក្សាសិទ្ធិក្នុងការបន្តសង្គ្រាម ប្រសិនបើចាំបាច់ ដោយមានការគាំទ្រពីអាម៉េរិក។ យើងគិតពីចំណាប់ខ្មាំងរបស់យើងទាំងអស់ ហើយខ្ញុំសន្យាថា យើងនឹងសម្រេចបាននូវគោលបំណងរបស់យើងទាំងអស់ ហើយនាំចំណាប់ខ្មាំងទាំងអស់មកវិញ។
លោកបានបន្តថា៖ ជាមួយនឹងកិច្ចព្រមព្រៀងនេះ យើងនឹងនាំបងប្អូនប្រុសស្រីរបស់យើងចំនួន៣៣នាក់មកវិញ ដែលភាគច្រើននៅមានជីវិត។ លោកបានលើកឡើងថា ដំណាក់កាលទីមួយ មានរយៈពេល៤២ថ្ងៃ ចាប់ផ្តើមនៅថ្ងៃអាទិត្យ គឺជាបទឈប់បាញ់បណ្ដោះអាសន្ន។
លោក នេតាន់យ៉ាហ៊ូ បានសង្កត់ធ្ងន់ថា ប្រសិនបើអ៊ីស្រាអ៊ែលត្រូវបង្ខំឱ្យធ្វើសង្រ្គាមឡើងវិញ យើងនឹងប្រើកម្លាំងយោធា ដោយបន្ថែមថា អ៊ីស្រាអែលបានផ្លាស់ប្ដូរមុខមាត់មជ្ឈិមបូព៌ា ចាប់តាំងពីសង្រ្គាមបានចាប់ផ្តើម។
