ប្រសិនបើលោក ត្រាំ ដំឡើងពន្ធលើទំនិញ និងសេវាកម្មនាំចូលពីកាណាដា នោះរដ្ឋធានីអូតាវ៉ា នឹងចាត់វិធានការតបតវិញជាមួយវិធានការក្ដៅ
អូតាវ៉ា៖ ប្រសិនបើប្រធានាធិបតីជាប់ឆ្នោតសហរដ្ឋអាម៉េរិក លោក ដូណាល់ ត្រាំ ដំឡើងពន្ធលើទំនិញ និងសេវាកម្មនាំចូលពីកាណាដា នោះរដ្ឋធានីអូតាវ៉ានឹងចាត់វិធានការតបតវិញជាមួយវិធានការក្ដៅ តាមរយៈការដំឡើងពន្ធលើការនាំចូលទំនិញពីសហរដ្ឋអាម៉េរិកដែលមានតម្លៃដល់ទៅ១០៥ពាន់លានដុល្លារ។ នេះបើតាមប្រភពដែលដឹងអំពីបញ្ហានេះបានទម្លាយចេញ កាលពីថ្ងៃពុធទី១៥ ខែមករា។
ប្រភពបាននិយាយថា កាណាដាបានរៀបចំបញ្ជីគោលដៅទំនិញដែលនឹងត្រូវយកពន្ធរួចរាល់ហើយ ប៉ុន្តែវានឹងត្រូវឆ្លងកាត់ការពិគ្រោះយោបល់ជាសាធារណៈមុនពេលធ្វើសកម្មភាព ខណៈវិសាលភាពនៃប្រតិកម្មនឹងអាស្រ័យលើអ្វីដែលលោក ត្រាំ ធ្វើ។ កាសែត The Toronto Star គឺជាស្ថាប័នព័ត៌មានដំបូងគេដែលរាយការណ៍ពីផែនការតបតរបស់កាណាដាប្រឆាំងនឹងសហរដ្ឋអាម៉េរិក។ ប្រភពដែលបានស្នើសុំមិនបញ្ចេញឈ្មោះ បាននិយាយថា លោកនាយករដ្ឋមន្ត្រី ចាស្ទីន ទ្រូដូ (Justin Trudeau) បានជួបជាមួយចាហ្វាយខេត្តចំនួន១០របស់ប្រទេសកាណាដា ដើម្បីពិភាក្សាអំពីរបៀបប្រតិកម្មចំពោះការដំឡើងពន្ធរបស់សហរដ្ឋអាម៉េរិក និងរបៀបសងសឹក។
ប្រភពបន្តថា វិធានការតបតនឹងត្រូវបែងចែកជាបីក្រុម។ ប្រសិនបើការដាក់ពន្ធរបស់លោក ត្រាំ បង្កការគំរាមកំហែងតិចតួច កាណាដានឹងកំណត់គោលដៅភ្លាមៗទៅលើទំនិញមួយក្រុមតូច រួមទាំងទឹកក្រូចពីរដ្ឋផ្លរីដា ជាកន្លែងដែលគាត់រស់នៅ។ លោក ទ្រូដូ បាននិយាយបន្ទាប់ពីបានជួបជាមួយចាហ្វាយខេត្តថា យើងនឹងចាត់វិធានការតបត ប្រសិនបើសហរដ្ឋអាម៉េរិកបន្តរឹងទទឹងឈានទៅមុខជាមួយនឹងការដំឡើងពន្ធទាំងនេះ។ លោកបន្តថា៖«យើងនឹងតបតឥតខ្លាចញញើត ប៉ុន្តែបានបដិសេធមិនផ្តល់ព័ត៌មានលម្អិត ដោយសារតែវាមិនទាន់ច្បាស់ថា តើលោក ត្រាំ នឹងធ្វើអ្វីនោះទេ»។
សហរដ្ឋអាម៉េរិក និងកាណាដា គឺជាដៃគូពាណិជ្ជកម្មកំពូលរបស់គ្នាទៅវិញទៅមក ហើយប្រទេសភូមិផងរបងតែមួយទាំងពីរ បានផ្លាស់ប្ដូរទំនិញ និងសេវាកម្មចំនួន២,៧ ពាន់លានដុល្លារ ឆ្លងកាត់ព្រំដែនរួមគ្នាក្នុងឆ្នាំ២០២៣។ នេះបើយោងតាមតួលេខរបស់រដ្ឋាភិបាលកាណាដា។ គួរជម្រាបថា លោក ត្រាំ ប្រកាសថា លោកចង់ដាក់ពន្ធ២៥ ភាគរយ ដើម្បីជំរុញឱ្យកាណាដារឹតបន្តឹងសន្តិសុខតាមព្រំដែនរារាំងរំហូរនៃជនចំណាកស្រុកខុសច្បាប់ និងកាត់បន្ថយការរត់ពន្ធហ្វេតានីល ជាសកម្មភាពមួយដែលហាក់ដូចជាបំពានលើកិច្ចព្រមព្រៀងពាណិជ្ជកម្មសេរី។ ទង្វើបែបនេះ នឹងបង្កបញ្ហាសេដ្ឋកិច្ចខ្លាំង ដោយសារតែកាណាដាបញ្ជូនទំនិញ និងសេវាកម្ម៧៥ភាគរយទៅកាន់សហរដ្ឋអាម៉េរិក។ ចាប់តាំងពីលោក ត្រាំ បានគម្រាមកំហែងដាក់ពន្ធ លោក ទ្រូដូ បានសង្កត់ធ្ងន់លើតម្រូវការសម្រាប់ការសន្ទនា ដើម្បីរក្សាទំនាក់ទំនងដ៏រឹងមាំរវាងកាណាដា និងសហរដ្ឋអាម៉េរិក៕
