ក្នុងខែមករា ឆ្នាំ២០២៥នេះ កម្លាំងនៃស្នងការដ្ឋាននគរបាលខេត្តក្រចេះ ធ្វើការបង្ក្រាបឃាត់ខ្លួនក្មេងទំនើង ៣៥នាក់ មួយចំនួនកំពុងកសាងសំណុំរឿងបញ្ជូនទៅតុលាការ
ភ្នំពេញ៖ តបតាមអនុសាសន៍ដ៏ខ្ពង់ខ្ពស់ របស់សម្ដេចមហារបវរធិបតី ហ៊ុន ម៉ាណែត ប្រមុខដឹកនាំនៃរាជរដ្ឋាភិបាលកម្ពុជា បានដាក់ចេញនូវបទបញ្ជា ឱ្យសមត្ថកិច្ចបង្ក្រាបក្មេងទំនើង ដោយបញ្ជូនទៅកាត់ទោស និងឃុំខ្លួនក្នុងពន្ធនាគារ ពោលគឺគ្មានការអប់រំអ្វីទៀតនោះឡើយ ជាស្តែងសម្រាប់ខេត្តក្រចេះ ក្នុងដើមខែមករា ឆ្នាំ២០២៥នេះ កម្លាំងជំនាញនៃអធិការដ្ឋាននគរបាលក្រុងស្រុក នៃស្នងការដ្ឋាននគរបាលខេត្តក្រចេះ បានធ្វើការបង្ក្រាបសកម្មភាពក្មេងទំនើង ចំនួន០៥ លើក ហើយមួយចំនួនបាននឹងកំពុងកសាងសំណុំរឿងបញ្ចូនទៅតុលាការ។ នេះបើតាមការបញ្ជាក់ពីលោកឧត្តមសេនីយ៍ទោ អ៊ូ សុបុណ្ណា ស្នងការ នៃស្នងការដ្ឋាននគរបាលខេត្តក្រចេះ។
លោកឧត្តមសេនីយ៍ទោ អ៊ូ សុបុណ្ណា បានបន្តថា ករណីចុះបង្ក្រាបសកម្មភាពក្មេងទំនើងទាំង៥លើកនេះ បានឃាត់ខ្លួនក្មេងទំនើងចំនួន ៣៥នាក់ ជាក្មេងប្រុស ដោយនៅក្រុងក្រចេះ ៤លើក និងស្រុកសំបូរ ១លើក ក្នុងនោះពាក់ព័ន្ធនឹងសកម្មភាពបង្កហិង្សា ១លើក ឃាត់ខ្លួនក្មេងទំនើង ៣នាក់ប្រុស និងបានកសាងសំណុំរឿងបញ្ជូនទៅតុលាការ និងពាក់ព័ន្ធសកម្មភាពចរាចរណ៍អាណាធិបតេយ្យ ៤លើក ក្នុងក្រុងក្រចេះ ៣លើក និងស្រុកសំបូរ ១លើក ឃាត់ខ្លួនក្មេងទំនើង ៣២នាក់ប្រុស ក្នុងនោះដែរសមត្ថកិច្ច ក៏បានបានធ្វើការអប់រំ និងធ្វើកិច្ចសន្យាប្រគល់ជូនអាណាព្យាបាល ដើម្បីអប់រំបន្ត។
ពាក់ព័ន្ធទៅនឹងការចុះបង្រ្កាបនេះដែរ លោកឧត្តមសេនីយ៍ទោ អ៊ូ សុបុណ្ណា បានបញ្ជាក់ថា កម្លាំងនៃស្នងការរដ្ឋាននគរបាលខេត្ត និងសម្លាំងនៃអធិការរដ្ឋាននគរបាលក្រុងស្រុក បាននឹងកំពុងបន្តតាមដាន យាមល្បាតជាប្រចាំនៅតាមទីតាំងកំណត់ ដើម្បីកំណត់មុខសញ្ញានៃក្រុមក្មេងទំនើងទាំងអស់នោះ និងបានស្នើសុំដល់អាណាព្យាបាល និងសាធារណៈជន សូមចូលរួមជាមួយសមត្ថកិច្ចក្នុងការអប់រំណែនាំកូនចៅ និងរាយការណ៍អំពីសកម្មភាពមិនប្រក្រតីនៃក្រុមទាំងនោះ ដើម្បីមានវិធានការទប់ស្កាត់កុំឲ្យប៉ះពាល់ដល់កិត្តិយស ទ្រព្យសម្បតិ្ត និងប្រយោជន៍សាធារណៈ ហើយសម្រាប់យុវជនផ្ទាល់ សូមបញ្ឈប់នូវសកម្មភាពទំនើងទាំងនោះ ព្រមជាមួយនិងការចូលរួមផ្សព្វផ្សាយ និងគោរពច្បាប់បទដ្ឋាននានា រួមមាន៖ ច្បាប់ចរាចរណ៍ផ្លូវគោក, ច្បាប់ប្រយុទ្ធប្រឆាំងគ្រឿងញៀន ជាពិសេសគោលនយោបាយភូមិឃុំសង្កាត់មានសុវត្ថិភាព ៕
