មេដឹកនាំជប៉ុន ហ្វីលីពីន និងអាមេរិក ប្តេជ្ញាពង្រឹងទំនាក់ទំនងបន្ថែមទៀត ក្រោមការរៀបចំត្រីភាគី ដើម្បីប្រឈមមុខនឹងភាពតានតឹងកំពុងកើនឡើង
ម៉ានីល៖ មេដឹកនាំជប៉ុន ហ្វីលីពីន និងសហរដ្ឋអាម៉េរិក បានប្តេជ្ញាពង្រឹងទំនាក់ទំនងរបស់ពួកគេបន្ថែមទៀតក្រោមការរៀបចំត្រីភាគី ដើម្បីប្រឈមមុខនឹងភាពតានតឹងដែលកំពុងកើនឡើងនៅក្នុងដែនទឹកក្នុងតំបន់។
ការិយាល័យប្រធានាធិបតីហ្វីលីពីន លោក ហ្វឺឌីណាន់ ម៉ាកូស ជូនៀ បានបង្ហាញនៅក្នុងសេចក្ដីថ្លែងការណ៍មួយបន្ទាប់ពីកិច្ចប្រជុំតាមអនឡាញជាមួយប្រធានាធិបតីអាម៉េរិក លោក ចូ បៃឌិន និងនាយករដ្ឋមន្ត្រីជប៉ុន លោក ស៊ីហ្គេរូ អ៊ីស៊ីបា (Shigeru Ishiba) ថា ប្រទេសទាំងបីបានព្រមព្រៀងគ្នាក្នុងការពង្រឹង និងធ្វើឱ្យស៊ីជម្រៅនូវកិច្ចសហប្រតិបត្តិការសេដ្ឋកិច្ច ដែនសមុទ្រ និងបច្ចេកវិទ្យា។
លោក ម៉ាកូស បានថ្លែងនៅក្នុងអំឡុងកិច្ចប្រជុំនេះថា៖ «ខ្ញុំមានទំនុកចិត្តថា ប្រទេសរបស់យើងទាំងបីនឹងបន្តធ្វើការជាមួយគ្នាយ៉ាងជិតស្និទ្ធ ដើម្បីរក្សានូវផលប្រយោជន៍ដែលយើងទទួលបាន តាមរយៈការពង្រឹង និងធ្វើឱ្យទំនាក់ទំនងរបស់យើងកាន់តែស៊ីជម្រៅ»។ កិច្ចប្រជុំតាមប្រព័ន្ធអនឡាញនេះដើរតាមគន្លងកិច្ចប្រជុំកំពូលលើកដំបូងរបស់លោក ម៉ាកូស លោក បៃឌិន និងអតីតនាយករដ្ឋមន្ត្រីជប៉ុន លោក ហ្វូមីអូ គីស៊ីដា ក្នុងរដ្ឋធានីវ៉ាស៊ីនតោនកាលពីខែមេសាឆ្នាំ២០២៤។
ទន្ទឹមគ្នានោះ ការិយាល័យរបស់លោក ម៉ាកូស បានឱ្យដឹងថា លោក បៃឌិន ក៏បានសរសើរមេដឹកនាំហ្វីលីពីនចំពោះការឆ្លើយតបការទូតរបស់គាត់ចំពោះសកម្មភាពឈ្លានពាន និងបង្ខិតបង្ខំរបស់ចិននៅសមុទ្រចិនខាងត្បូង។ លោក បៃឌិន បាននិយាយថា លោកមានសុទិដ្ឋិនិយមអ្នកស្នងតំណែងរបស់គាត់ នឹងមើលឃើញពីតម្លៃនៃការបន្តភាពជាដៃគូនេះ។ ប្រធានាធិបតីជាប់ឆ្នោតអាម៉េរិក លោក ដូណាល់ ត្រាំ នឹងចូលកាន់តំណែងនៅថ្ងៃចន្ទសប្តាហ៍ក្រោយ។ ជប៉ុន និងហ្វីលីពីនជាប់ពាក់ព័ន្ធក្នុងជម្លោះទឹកដីដាច់ដោយឡែកពីគ្នាជាមួយចិននៅសមុទ្រចិនខាងកើត និងខាងត្បូង។
សេចក្ដីសម្រេចឆ្នាំ២០១៦ នៃសាលាក្ដីអន្តរជាតិបានចាត់ទុកជាមោឃៈនូវការទាមទារដ៏ធំរបស់រដ្ឋធានីប៉េកាំងចំពោះសមុទ្រចិនខាងត្បូង ដោយអះអាងថាមិនមានមូលដ្ឋាននៅក្រោមច្បាប់អន្តរជាតិ តែចិនបដិសេធ។ ភាពតានតឹងរវាងចិន និងហ្វីលីពីនបានផ្ទុះឡើងខ្លាំងក្នុងរយៈពេល២ ឆ្នាំចុងក្រោយនេះ ជុំវិញការប្រឈមមុខដាក់គ្នារវាងឆ្មាំឆ្នេរសមុទ្ររបស់ពួកគេនៅសមុទ្រចិនខាងត្បូង៕
