បច្ចុប្បន្នកម្ពុជា មានសត្វស្មោញ ៦០០០គូ កំពុងបន្តពូជពងកូន នៅតំបន់រ៉ាមសារព្រែកទាល់
ភ្នំពេញ៖ បើតាមហ្វេសប៊ុក ក្រសួងបរិស្ថាន នាថ្ងៃទី១១ មករានេះ បានឲ្យដឹងថា បច្ចុប្បន្នកម្ពុជា មានស្មោយ ចំនួន ៦០០០គូ កំពុងបន្តពូជពងកូន នៅតំបន់រ៉ាមសារព្រែកទាល់ (បឹងទន្លេសាប)។ ស្មោញ មានឈ្មោះភាសាអង់គ្លេស៖ Oriental Darter និងមានឈ្មោះវិទ្យាសាស្ត្រ៖ Anhinga melanogaster។
សូមបញ្ជាក់ជូនថា កម្ពុជាបានបង្កើនការអភិរក្សសត្វស្មោញ ដែលស្ថិតនៅក្នុងបញ្ជីក្រហមរបស់អង្គការ IUCN ជាប្រភេទជិតរងគ្រោះនៅលើពិភពលោក ដែលក្រសួងបរិស្ថាន និងអង្គការដៃគូ បង្កើនការថែរក្សាអភិរក្សប្រភេទសត្វនេះ ឱ្យនៅគង់វង្ស។
ស្មោញ គឺជាបក្សីមួយប្រភេទមានមាឌធំ រហូតដល់៨៥-៩៧សង់ទីម៉ែត្រ ជាបក្សីមួយប្រភេទ ដែលមានលក្ខណ:ពិសេស ដែលអាចហែល និងមុជទឹក មើលទៅដូចជាសត្វពស់ ។ បក្សីនេះមានកវែងដូចពស់ ចំពុះរបស់វាស្រួចដូចដាវ សម្បុរពណ៌ខ្មៅ កន្ទុយវែង ឆូតសវែងៗនៅផ្នែកខ្នង ។ វារស់ នៅតាមតំបន់ បឹងវាលភក់ និងទន្លេធំៗ
ចំពោះជីវសាស្ត្ររស់នៅវិញ បក្សីនេះពូកែមុជទឹកចាប់ត្រីជាអាហារ ព្រមទាំងធ្វើការបន្តពូជចាប់ពីខែមិថុនាដល់ខែមីនា និងមានពងចំនួនចន្លោះពី៤ទៅ៦ពង ក្នុងមួយរដូវបន្តពូជ ។ ក្នុងមួយរដូវ សត្វស្មោញពងបាន៤ទៅ៦ ស៊ុត និងញាស់ក្នុងរយៈពេល ២៥ទៅ៣០ថ្ងៃ ។ ពេលកើត មកភ្លាម កូនញាស់មានរោម សំឡីពណ៌ស ហើយប្ដូរពណ៌បន្តិចម្ដងៗទៅជាពណ៌ត្នោត ។ វាដុះរោមពេញខ្លួននៅអាយុ៧សប្ដាហ៍ពេលនោះទើបវាអាចហើរបាន ។
សត្វនេះគេសង្កេតឃើញថា មានវត្ត មានពេញមួយឆ្នាំ និងមានបន្ទាយពងកូនដ៏ធំនៅតំបន់ព្រែកទាល់ បឹងទន្លេសាប និងតំបន់តូចមួយចំនួននៅភាគខាងជើងនៃប្រទេសកម្ពុជា ។ វារស់នៅជាហ្វូង ដែលអាចងាយស្រួលក្នុងការពារ និងរាប់ចំនួនសំបុករបស់វា ។ វត្តមានរបស់វានៅតំបន់រ៉ាមសារព្រែកទាល់ ដែលជាតំបន់ស្នូល និងជាតំបន់លិចទឹកនៃឋបនីយជីវមណ្ឌលបឹងទន្លេសាប ៕
