ប្រធានសេវាសន្តិសុខប្រធានាធិបតី ស្ថិតនៅក្រោមការស៊ើបអង្កេតជុំវិញការរារាំងកាតព្វកិច្ចផ្លូវការ ក្នុងការចាប់ខ្លួនប្រធានាធិបតី យូន ស៊ុកយ៉ុល 

សេអ៊ូល៖ ប្រធានសន្តិសុខរបស់ប្រធានាធិបតីកូរ៉េខាងត្បូង បានលើកឡើងនៅថ្ងៃសុក្រទី១០ ខែមករាថា លោកប្រធានាធិបតី យូន ស៊ុកយ៉ុល ដែលប្រឈមមុខនឹងការចាប់ខ្លួន ជុំវិញការស៊ើបអង្កេតឧក្រិដ្ឋកម្មលើការប្រើច្បាប់អាជ្ញាសឹកកាលពីថ្ងៃទី៣ ខែធ្នូឆ្នាំ២០២៤ កំពុងប្រឈមការប្រព្រឹត្តដោយអយុត្តិធម៌ចំពោះមេដឹកនាំដែលកាន់អំណាច ហើយបានព្រមានថា ការបង្ហូរឈាមត្រូវតែជៀសវាង។

ប្រធានសេវាសន្តិសុខប្រធានាធិបតី លោក ផាក ជុងជុន (Park Chong-jun) ក៏ស្ថិតនៅក្រោមការស៊ើបអង្កេតផងដែរជុំការរារាំងកាតព្វកិច្ចផ្លូវការ ទាក់ទងនឹងការប្រឈមមុខដាក់គ្នារយៈពេល៦ ម៉ោងកាលពីសប្តាហ៍មុន រវាងភ្នាក់ងារសន្តិសុខប្រធានាធិបតី និងអ្នកស៊ើបអង្កេតដែលព្យាយាមអនុវត្តដីកាចាប់ខ្លួនលោក យូន។ យ៉ាងណា លោក ផាក ដែលជាអតីតមន្ត្រីប៉ូលិសជាន់ខ្ពស់ផងនោះបានលើកឡើងថា ការប៉ុនប៉ងដើម្បីចាប់ខ្លួនប្រធានាធិបតីដែលកំពុងកាន់អំណាចគឺខុស ហើយលោក យូន សមនឹងទទួលបានការឱ្យតម្លៃក្នុងនាមជាមេដឹកនាំរបស់ប្រទេស។

លើសពីនេះ លោក ផាក បានប្រាប់អ្នកសារព័ត៌មានថា ៖«ខ្ញុំជឿថានឹងមិនមានការប៉ះទង្គិចគ្នាខាងរាងកាយ ឬការបង្ហូរឈាមក្នុងកាលៈទេសៈណាមួយនោះទេ»។

គេនៅចាំបានថា ភ្នាក់ងារសន្តិសុខប្រធានាធិបតីរាប់រយនាក់ត្រូវបានដាក់ពង្រាយនៅបរិវេណវិមានប្រធានាធិបតី និងរារាំងអ្នកស៊ើបអង្កេតដែលព្យាយាមចាប់ខ្លួនលោក យូន។ គ្រានោះ ក្រុមអ្នកស៊ើបអង្កេតបានដកថយវិញ ដោយសារតែហានិភ័យនៃការប៉ះទង្គិចគ្នា។

សូមរំឭកថា ក្រុមអ្នកស៊ើបអង្កេតទទួលបានដីកាចាប់ខ្លួនសាជាថ្មីនៅសប្តាហ៍នេះ ក្រោយដីកាចាស់ហួសសុពលភាព។ យ៉ាងណា មេធាវី របស់លោក យូន បាន ប្រតិកម្មថា ដីកា ចាប់ ខ្លួនលោក យូន គឺ «ខុស ច្បាប់ និង គ្មាន សុពលភាព»៕