ជនបរទេសប្រហែល៤០០នាក់ត្រូវបានចាប់ខ្លួនក្នុងការវាយឆ្មក់ទ្រង់ទ្រាយធំលើមជ្ឈមណ្ឌលឆបោកតាមអ៊ីនធឺណិតនៅក្នុងរដ្ឋធានីម៉ានីល

ម៉ានីល៖ ទីភ្នាក់ងារអន្តោប្រវេសន៍ជាតិរបស់ប្រទេសហ្វីលីពីន បានរាយការណ៍ថា ជនបរទេសប្រហែល៤០០នាក់ត្រូវបានចាប់ខ្លួនកាលពីថ្ងៃពុធទី៨ ខែមករា ក្នុងការវាយឆ្មក់ទ្រង់ទ្រាយធំលើមជ្ឈមណ្ឌលឆបោកតាមអ៊ីនធឺណិតនៅក្នុងរដ្ឋធានីម៉ានីល។

អាជ្ញាធរ បាន ឆ្មក់ ចូល អគារ មួយកន្លែង ហើយ បាន រក ឃើញ បុគ្គលិកដែល បាន ចូលរួម ក្នុង ប្រតិបត្តិការ ឆបោក តាម អ៊ីនធឺណិត ដែល កំណត់ គោលដៅ លើ ជនរងគ្រោះ នៅ បរទេស។

ការព្រួយបារម្ភជាអន្តរជាតិបានកើនឡើងក្នុងប៉ុន្មានឆ្នាំថ្មីៗនេះ ជុំវិញប្រតិបត្តិការបោកប្រាស់ស្រដៀងគ្នានៅអាស៊ី ដែលជារឿយៗត្រូវបានដំណើរការដោយជនរងគ្រោះដែលត្រូវបានបោកបញ្ឆោត ឬបង្ខិតបង្ខំឱ្យវិនិយោគលើរូបិយបណ្ណក្លែងក្លាយ និងការបោកបញ្ឆោតផ្សេងទៀត។

លោក ហ្វតធ្យូណាតូ ម៉ាណាហាន (Fortunato Manahan) ប្រធានផ្នែកស៊ើបការណ៍សម្ងាត់របស់ការិយាល័យអន្តោប្រវេសន៍ បាននិយាយនៅក្នុងសេចក្តីថ្លែងការណ៍មួយដោយពណ៌នាអំពីការវាយឆ្មក់ចុងក្រោយថា៖ «ប្រតិបត្តិការរបស់ពួកគេត្រូវបានរកឃើញថា បំពានច្បាប់អន្តោប្រវេសន៍ និងបង្កហានិភ័យយ៉ាងសំខាន់ដល់សាធារណជន»។

អ្នកនាំពាក្យការិយាល័យអន្តោប្រវេសន៍ លោកស្រី ដាណា សាន់ដូវ៉ាល់ (Dana Sandoval) បានប្រាប់ទីភ្នាក់ងារសារព័ត៌មាន AFP ថា ជនបរទេសដែលភាគច្រើនជាជនជាតិចិន កំពុងស្ថិតនៅក្រោមនីតិវិធីច្បាប់ ដោយបន្ថែម ថា ពួក គេ នឹង ត្រូវ ឃុំ ខ្លួន បណ្ដោះ អាសន្ន ខណៈ កំពុង រង់ ចាំ ការ និរទេស។

ប្រធានាធិបតីហ្វីលីពីន លោក ហ្វឺឌីណាន់ ម៉ាកូស កាលពីខែកក្កដាឆ្នាំមុនបានប្រកាសហាមប្រាមលើប្រតិបត្តិករហ្គេមអនឡាញ ដែលលោកអះអាងថា វាត្រូវបានប្រើប្រាស់ដើម្បីបិទបាំងឧក្រិដ្ឋកម្មដូចជាការជួញដូរមនុស្ស ការលាងលុយកខ្វក់ ការក្លែងបន្លំតាមអ៊ីនធឺណិត ការចាប់ជំរិត និងឃាតកម្ម។

វិទ្យាស្ថានសន្តិភាពសហរដ្ឋអាម៉េរិកដែលមានមូលដ្ឋាននៅទីក្រុងវ៉ាស៊ីនតោន បានបញ្ជាក់នៅក្នុងរបាយការណ៍ខែឧសភាឆ្នាំ២០២៤ ថា អ្នកឆបោកតាមអ៊ីនធឺណិតបានកំណត់គោលដៅលើជនរងគ្រោះរាប់លាននាក់នៅជុំវិញពិភពលោក ហើយទាញយកប្រាក់ចំណូលប្រចាំឆ្នាំចំនួន៦៤ ពាន់លានដុល្លារ។

វិទ្យាស្ថានបានប៉ាន់ប្រមាណថា ឧស្សាហកម្មនេះផ្តល់ការងារដល់មនុស្សកន្លះលាននាក់ រួមទាំង១៥ ០០០ នាក់នៅក្នុងប្រទេសហ្វីលីពីន ដែលត្រូវបានជ្រើសរើសជាចម្បងតាមរយៈប្រព័ន្ធផ្សព្វផ្សាយសង្គម ហើយបន្ទាប់មកត្រូវបានគេបង្ខំឱ្យអនុវត្តការបោកប្រាស់ ដោយប្រឈមនឹងការធ្វើទារុណកម្ម ប្រសិនបើពួកគេមិនធ្វើតាមបញ្ជា៕