រដ្ឋមន្ត្រីអប់រំ ដឹកនាំកិច្ចប្រជុំស្តីពី ការត្រៀមរៀបចំប្រារព្ធទិវាជាតិអំណានលើកទី១០ នៅថ្ងៃទី១១ ខែមីនា ឆ្នាំ២០២៥

ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នាថ្ងៃទី៣ ខែមករា ឆ្នាំ២០២៥ បានដឹកនាំកិច្ចប្រជុំ ស្តីពីការត្រៀមរៀបចំប្រារព្ធទិវាជាតិអំណានលើកទី១០ នៅថ្ងៃទី១១ ខែមីនា ឆ្នាំ២០២៥ និងមានការចូលរួមពី ឯកឧត្តម លោកជំទាវ ថ្នាក់ដឹកនាំក្រសួង តំណាងដៃគូអភិវឌ្ឍ និងមន្ត្រីពាក់ព័ន្ធក្រោយឱវាទក្រសួង។

កិច្ចប្រជុំនេះរៀបចំឡើងក្នុងគោលបំណង ពិភាក្សាផ្លាស់ប្តូរមតិយោបល់លើការរកំណត់យកប្រធានបទ និងពាក្យស្លោកក្នុងកម្មវិធីទិវាជាតិអំណានលើកទី១០ ទីតាំងប្រារព្ធពិធី លំហូរការប្រព្រឹត្តទៅនៃកម្មវិធីទិវាជាតិអំណានទាំងមូល។

ដើម្បីឱ្យកម្មវិធីប្រព្រឹត្តទៅដោយរលូន និងប្រកបដោយផ្លែផ្កា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានណែនាំដល់ក្រុមការងារពាក់ព័ន្ធ លើកឡើងនូវមតិយោបល់ ដើម្បីពិភាក្សា និងយកចិត្តទុកដាក់បន្ថែមលើកិច្ចការងារតាមជំនាញ កំណត់ជ្រើសរើសប្រធានបទ និងពាក្យស្លោកសម្រាប់កម្មវិធីស្របតាមចក្ខុវិស័យវិស័យអប់រំ ឆ្លើយតបនឹងយុគសម័យឌីជីថល និងបញ្ញាសិប្បនិម្មិត(AI) រៀបចំក្រុមការងារប្រឡងតែងនិពន្ធ និងស្មូតកំណាព្យរបស់សិស្សានុសិស្ស និងការប្រកួតប្រជែងប្រលោមលោកខ្នាតខ្លី បង្កើនការផ្សព្វផ្សាយដើម្បីទាក់ទាញការចូលរួមពីសាធារណៈជននិងស្ថាប័នផ្សេងៗ បន្តតាមដានដំណើរការ និងយកចិត្តទុកដាក់ជាបន្តបន្ទាប់ដើម្បីសម្រួលនិងដោះស្រាយបញ្ហាដែលអាចកើតមានក្នុងការរៀបចំនិងកម្មវិធីជាក់ស្តែង ធានា និងរក្សាបាននូវសណ្តាប់ធ្នាប់ សុវត្ថិភាព របៀបរៀបរយ និងសម្រេចបានលទ្ធផលល្អប្រសើរ ជាពិសេសបង្ហាញឱ្យឃើញពីសារៈសំខាន់នៃការអានសម្រាប់ការអភិវឌ្ឍសង្គម។

គួរបញ្ជាក់ថា ទិវាជាតិអំណានត្រូវបានប្រារព្ធឡើងនៅថ្ងៃទី១១ ខែមីនា ជារៀងរាល់ឆ្នាំ ដែលជាថ្ងៃប្រសូត្ររបស់សម្តេចព្រះសង្ឃរាជ ជួន ណាត ដើម្បីរំលឹកដល់ស្នាដៃ និងការចូលរួមអភិរក្សភាសាខ្មែរ និងចងក្រងវចនានុក្រមខ្មែរ ដែលមានការទទួលស្គាល់ និងប្រើប្រាស់មកដល់ពេលបច្ចុប្បន្ន ក៏ដូចជាមានគោលបំណង បន្តបណ្ដុះទម្លាប់អាននិងសរសេរ ជំរុញវប្បធម៌អាន លើកកម្ពស់សមត្ថភាពអាន ស្មូតកំណាព្យ និងការតែងនិពន្ធ សំដៅរួមចំណែកការពារ និងពង្រឹងវប្បធម៌ អរិយធម៌ខ្មែរ ដល់សិស្ស និស្សិត មន្ត្រីរាជការ ប្រជាជនគ្រប់រូប ក្នុងប្រទេសកម្ពុជា ឈានទៅសម្រេចគោលដៅអភិវឌ្ឍប្រកបដោយចីរភាព ដែលធានាគុណភាពអប់រំប្រកបដោយសមធម៌ បរិយាបន្ន និងលើកកម្ពស់ការសិក្សាពេញមួយជីវិតសម្រាប់ទាំងអស់គ្នា៕