CNN ចេញផ្សាយពីគម្រោងស្ថាបត្យកម្មចំនួន១១ ដែលនឹងមានកិត្យានុភាព ជុំវិញពិភពលោក ក្នុងនោះក៏មាន «អាកាសយានដ្ឋានអន្តរជាតិតេជោ ក្រុងតាខ្មៅ»
បរទេស៖ សារព័ត៌មានដ៏ល្បីល្បាញជុំវិញពិភពលោកនេះ បានសរសេររៀបរាប់ថា «ប្រទេសកម្ពុជាកំពុងជំនួសអាកាសយានដ្ឋានអន្តរជាតិរាជធានីភ្នំពេញ ជាមួយនឹងអាកាសយានដ្ឋានថ្មីដែលមានលទ្ធភាពទទួលភ្ញៀវទេសចរបានច្រើនជាង៦ ដង។ គម្រោងប្រកបដោយមហិច្ឆតានេះនឹងជួយជំរុញចំនួនទេសចរណ៍កាន់តែច្រើន និងក្លាយជាមជ្ឈមណ្ឌលអាកាសចរណ៍ក្នុងតំបន់។ អាកាសយានដ្ឋានអន្តរជាតិតេជោថ្មី មានសមត្ថភាពទទួលអ្នកដំណើរប្រចាំឆ្នាំចំនួន១៣ លាននាក់ ហើយនឹងកើនឡើងជាលំដាប់ដល់៣០ លាននាក់»។
សារព័ត៌មានដដែលរាយរាប់បន្តថា អគារស្ថានីយអ្នកដំណើរនឹងក្លាយជាអគារមួយក្នុងចំណោមអគារធំបំផុតនៅអាស៊ីអាគ្នេយ៍។ យោងតាមក្រុមហ៊ុនស្ថាបត្យកម្ម Foster + Partners គម្រោងនេះនឹងប្រើថាមពលដែលបង្កើតឡើងក្នុងកសិដ្ឋានថាមពលពន្លឺព្រះអាទិត្យ ដែលធ្វើឱ្យស្ថាបត្យកម្មដ៏មហស្ចារ្យនេះស្ថិតក្នុងចំណោមស្ថាបត្យកម្មបៃតងបំផុតរបស់ពិភពលោក។ ជាមួយនឹងទម្រង់ដែលត្រូវបានបំផុសគំនិតដោយការរចនាបែបប្រពៃណីរបស់ខ្មែរ ដំបូលអគារស្ថានីយត្រូវបានទ្រដោយសសររាងដើមឈើ។
មែនទែនទៅ នេះមិនមែនជាលើកដំបូងឡើយដែលអាកាសយានដ្ឋានអន្តរជាតិតេជោ ក្រុងតាខ្មៅលេចវត្តមានក្នុងសារព័ត៌មានល្បីៗរបស់ពិភពលោក។ ជាក់ស្តែង កាលពីចុងខែសីហាឆ្នាំមុន សារព័ត៌មានអង់គ្លេសThe Sun បានចុះផ្សាយថា អាកាសយានដ្ឋានអន្តរជាតិតេជោ ក្រុងតាខ្មៅនឹងស្រូបទាញអ្នកទេសចរពីចក្រភពអង់គ្លេស មកកម្ពុជាកាន់តែច្រើន។ ប្រទេសកម្ពុជាតែងតែត្រូវបានមើលរំលងដោយអ្នកទេសចរមកពីចក្រភពអង់គ្លេស ប៉ុន្តែវាអាចនឹងផ្លាស់ប្ដូរក្នុងពេលឆាប់ៗនេះ ដោយសារអាកាសយានដ្ឋានអន្តរជាតិដ៏ធំមួយដែលគ្រោងនឹងបើកដំណើររការនៅដំណាក់កាលដំបូងនាឆ្នាំក្រោយ។ នេះជាសំណេរដែលសារព័ត៌មានអង់គ្លេស The Sun បានចុះផ្សាយនាពេលនោះ។ អាកាសយានដ្ឋានថ្មីដ៏ធំសម្បើមមួយកំពុងបង្អួតខ្លួនបណ្តើរៗនៅក្នុងប្រទេសគោលដៅទេសចរណ៍ ដែលពិភពលោកតែងមើលរំលង បើទោះបីជាប្រទេសអច្ឆរិយៈមួយនេះ សម្បូរដេដាស់ទៅដោយកន្លែងកម្សាន្តដ៏ពេញនិយមជាច្រើនក៏ដោយ។
អាកាសយានដ្ឋានដ៏ប្រណិតនេះ ត្រូវបានប្រកាសសាងសង់ជាលើកដំបូងនៅឆ្នាំ២០១៨ លើផ្ទៃដីទំហំប្រមាណ២៦០០ហិកតា នឹងមានកម្ពស់៤ជាន់ និងចំណតអ្នកដំណើររកណ្តាលដ៏ធំមួយ រួមជាមួយនឹងច្រកទ្វារចំនួន២២ ដែលអាចដាក់យន្តហោះបានដល់ទៅ៤០គ្រឿង និងមានសួនច្បារកណ្តាលដ៏ធំមួយផងដែរ។ វាស្ថិតនៅក្នុងក្រុងតាខ្មៅ និងស្រុកកណ្តាលស្ទឹង ខេត្តកណ្តាល និងដីខ្លះស្ថិតនៅក្នុងស្រុកបាទី ខេត្តតាកែវ។ អាកាសយានដ្ឋានអន្តរជាតិថ្មីនេះ ជាគម្រោងដ៏ធំសម្បើមនៅក្នុងប្រទេសកម្ពុជា ដែលមានការវិនិយោគក្នុងទឹកប្រាក់ប្រមាណ១៥០០លានដុល្លារ។ អាកាសយានដ្ឋានអន្តរជាតិតេជោជាប្រភេទ 4F គឺប្រភេទព្រលានយន្តហោះធំ ដែលអាចស្រូបយក និងទទួលបានការហោះហើរពីចម្ងាយឆ្លងទ្វីប ដែលអាចឱ្យប្រភេទយន្តហោះធុនយក្ស រហូតដល់ Airbus A380-800 និងយន្តហោះ Boeing 747-800 ចុះចតបាន។ ក្រុមហ៊ុនវិនិយោគមានមហិច្ឆតាអភិវឌ្ឍន៍ជាព្រលានយន្តហោះថ្មីឱ្យធំ និងទំនើបជាងគេនៅតំបន់អាស៊ី។
ព្រលានយន្តហោះនេះ គ្រោងនឹងបើកដំណើរការជាបីដំណាក់កាល។ ដំណាក់កាលដំបូងគ្រោងនឹងដាក់សម្ពោធជាផ្លូវការក្នុងអំឡុងខែកក្កដាឆ្នាំ២០២៥ នេះ នឹងទទួលអ្នកដំណើរររហូតដល់១៣លាននាក់។ នេះនឹងបន្តដោយការបង្កើនសមត្ថភាពដល់អ្នកដំណើររ៣០លាននាក់នៅឆ្នាំ២០៣០ និងអ្នកដំណើររ ៥០លាននាក់នៅឆ្នាំ២០៥០។ ជាពិសេស អាកាសយាដ្ឋាននេះ នឹងក្លាយជាព្រលានយន្តហោះធំជាងគេទីប្រាំបួននៅលើពិភពលោក នៅពេលវាត្រូវបានបើកដំណើររការ។ ក្រុមហ៊ុនស្ថាបត្យកម្ម Foster + Partners ដែលបានរចនាព្រលានយន្តហោះនេះបញ្ជាក់ថា៖«ព្រលានយន្តហោះថ្មីនេះ ត្រូវបានបំផុសគំនិតដោយបេតិកភណ្ឌ និងប្រវត្តិសាស្ត្រដ៏សម្បូរបែបរបស់ប្រទេសកម្ពុជា និងបូកបញ្ចូលនូវវប្បធម៌សហសម័យរបស់កម្ពុជាទៀតផង»។ គម្រោងនេះសង្ឃឹមថា នឹងធ្វើឱ្យប្រសើរឡើងនូវការតភ្ជាប់របស់កម្ពុជាជាមួយពិភពលោកទាំងមូល៕
