ឧត្តមសេនីយ៍ឯក បណ្ឌិត តុប នេត អញ្ជើញបើកសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ របស់អគ្គនាយកដ្ឋានអត្តសញ្ញាណកម្ម

ភ្នំពេញ៖ នៅទីស្ដីការក្រសួងមហាផ្ទៃ នាព្រឹកថ្ងៃព្រហស្បតិ៍ ទី២៦ ខែធ្នូ ឆ្នាំ២០២៤ ឯកឧត្តម ឧត្តមសេនីយ៍ឯក បណ្ឌិត តុប នេត អគ្គនាយក នៃអគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ បានអញ្ជើញបើកសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ របស់អគ្គនាយកដ្ឋានអត្តសញ្ញាណកម្ម។

កិច្ចប្រជុំនេះ មានការអញ្ជើញចូលរួមពី ឯកឧត្តម លោកជំទាវ អគ្គនាយករង ថ្នាក់ដឹកនាំនាយកដ្ឋាន និងមន្រ្តីពាក់ព័ន្ធគ្រប់ការិយាល័យជំនាញ នៃអគ្គនាយកដ្ឋានអត្តសញ្ញាណកម្ម ថ្នាក់ដឹកនាំមកពីបណ្តារដ្ឋបាល ស្នងការរាជធានី ខេត្ត តំណាងអង្គការ និងដៃគូអភិវឌ្ឍន៍ ព្រមទាំងមន្រ្តីជំនាញ នៃអគ្គនាយកដ្ឋានអត្តសញ្ញាណកម្ម ជាច្រើនរូបទៀត។

ឯកឧត្តម ឧត្តមសេនីយ៍ឯក បណ្ឌិត តុប នេត អគ្គនាយក នៃអគ្គនាយកដ្ឋានអត្តសញ្ញាណកម្ម បានមានប្រសាសន៍ស្វាគមន៍ និងសម្តែងនូវការកោតសរសើរ ព្រមទាំងវាយតម្លៃខ្ពស់ ចំពោះថ្នាក់ដឹកនាំ មន្ត្រីគ្រប់លំដាប់ថ្នាក់ និងដៃគូសហការ ដែលបានរួមចំណែកក្នុងការបំពេញភារកិច្ចយ៉ាងសកម្ម លើការអនុវត្តការងារអត្តសញ្ញាណកម្ម សំដៅគ្រប់គ្រងអត្តសញ្ញាណប្រជាពលរដ្ឋ និងផ្តល់សេវារដ្ឋបាលដល់ប្រជាពលរដ្ឋ ដើម្បីធានាឱ្យបាននូវសិទ្ធិ និងផលប្រយោជន៍ស្របច្បាប់ជាមូលដ្ឋានរបស់បុគ្គល និងជំរុញការអភិវឌ្ឍសេដ្ឋកិច្ចជាតិ។

ឯកឧត្តម ឧត្តមសេនីយ៍ឯក បណ្ឌិត បានមានប្រសាសន៍ថា អគ្គនាយកដ្ឋានអត្តសញ្ញាណកម្ម កំពុងស្ថិតក្នុងដំណាក់កាលចុងក្រោយនៃការអនុវត្ត «ផែនការយុទ្ធសាស្រ្តជាតិស្តីពីអត្តសញ្ញាណកម្ម ២០១៧-២០២៦» ដែលមានគោលដៅរៀបចំក្របខណ្ឌច្បាប់ និងលិខិតបទដ្ឋានគតិយុត្តលើការងារអត្តសញ្ញាណកម្ម កសាងប្រព័ន្ធរួមអត្តសញ្ញាណប្រជាជន (IPIS) ដោយផ្តើមចេញពីការចុះបញ្ជីអត្រានុកូលដ្ឋាន និងអត្តសញ្ញាណពលរដ្ឋ តាមប្រព័ន្ធបច្ចេកវិទ្យាអនឡាញពីថ្នាក់មូលដ្ឋានឃុំ សង្កាត់ និងកែសម្រួលរបៀបរបបការងារ និងដាក់ឱ្យដំណើរការប្រព័ន្ធអេឡិចត្រូនិក សម្រាប់ផ្តល់សេវាជូនប្រជាពលរដ្ឋប្រកបដោយប្រសិទ្ធភាព។

ឆ្លៀតក្នុងឱកាសខាងលើ ឯកឧត្តម ឧត្តមសេនីយ៍ឯក បណ្ឌិត អគ្គនាយក ក៏បានជម្រាបទៅអង្គពិធីទាំងមូលឱ្យបានដឹងផងដែរថា បច្ចុប្បន្ន អគ្គនាយកដ្ឋានអត្តសញ្ញាណកម្ម បាននឹងកំពុងបន្តរៀបចំ «ផែនការយុទ្ធសាស្រ្តជាតិស្តីពីអត្តសញ្ញាណកម្ម» ដំណាក់កាលទី២ សម្រាប់រយៈពេល ១០ឆ្នាំបន្ត គឺពីឆ្នាំ២០២៦-២០៣៥ ដោយដំណាក់កាលទី២ នេះ គឺមានទិសដៅដូចគ្នាទៅនឹងដំណាក់កាលទី ១ដដែល ប៉ុន្តែគឺជាដំណាក់កាលនៃការធ្វើទំនើបកម្មបន្ថែមទៅលើគោលដៅក្នុងដំណាក់កាលទី១។

ឯកឧត្តម ឧត្តមសេនីយ៍ឯក សាយ ម៉េងឈាង អគ្គនាយករង នៃអគ្គនាយកដ្ឋានអត្តសញ្ញាណកម្ម បានអញ្ជើញអានរបាយការណ៍ ស្តីពីការបូកសរុបលទ្ធផលការងារឆ្នាំ២០២៤ និងលើកទិសដៅការងារ ឆ្នាំ២០២៥ របស់អគ្គនាយកដ្ឋានអត្តសញ្ញាណកម្ម ជូនគណៈអធិបតី និងអង្គពិធីទាំងមូលបានជ្រាប។

បន្ទាប់ពីរបៀបវារៈខាងលើ ថ្នាក់ដឹកនាំមកពីរដ្ឋបាល និងស្នងការរាជធានី ខេត្ត បានអញ្ជើញធ្វើបទអន្តរាគមន៍លើការងារជំនាញទាក់ទងនឹងអត្តសញ្ញាណកម្ម ហើយក្រៅពីនេះ ក៏មានការរៀបចំបែងចែកជាក្រុមពិភាក្សា ដើម្បីបើកឱកាសឱ្យសមាសភាពចូលរួមក្នុងអង្គសន្និបាត អាចធ្វើការជជែក ពិភាក្សា និងស្វែងយល់បន្ថែមទៀតពីការងារអត្តសញ្ញាណកម្មផងដែរ។

ជាថ្មីម្តងទៀត ឯកឧត្តម ឧត្តមសេនីយ៍ឯក បណ្ឌិត តុប នេត អគ្គនាយក នៃអគ្គនាយកដ្ឋានអត្តសញ្ញាណកម្ម បានអញ្ជើញថ្លែងចំណាប់អារម្មណ៍លើការអនុវត្តការងារអត្តសញ្ញាណកម្ម ដែលអគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ សម្រេចបាន និងបានលើកទឹកចិត្តដល់ថ្នាក់ដឹកនាំ និងមន្ត្រីក្នុងអគ្គនាយកដ្ឋាន ថ្នាក់ដឹកនាំមកពីបណ្តារដ្ឋបាល ស្នងការរាជធានី ខេត្ត ព្រមទាំងតំណាងអង្គការ និងដៃគូអភិវឌ្ឍន៍ទាំងអស់ដែលមានវត្តមានក្នុងអង្គពិធី ឱ្យបន្តចូលរួម សហការ និងទទួលខុសត្រូវក្នុងការអនុវត្តភារកិច្ចរបស់ខ្លួនលើការការងារអត្តសញ្ញាណកម្ម។

សូមជម្រាបជូនដែរថា អគ្គនាយកដ្ឋានអត្តសញ្ញាណកម្ម នឹងរៀបចំពិធីបិទនាពេលរសៀល ក្រោមអធិបតីភាព ឯកឧត្តម ប៉ាវ ហម ផាន រដ្ឋលេខាធិការ ក្រសួងមហាផ្ទៃ ទទួលបន្ទុកអគ្គនាយកដ្ឋានអត្តសញ្ញាណកម្ម តំណាងដ៏ខ្ពង់ខ្ពស់ ឯកឧត្តមអភិសន្តបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ៕