វគ្គហ្វឹកហ្វឺន ប្រចាំឆ្នាំ២០២៤ នៃតំបន់ប្រតិបត្តិការសឹករងកំបង់ស្ពឺ ត្រូវបានបិទបញ្ចប់ដោយជោគជ័យ

ភ្នំពេញ៖ ឯកឧត្តម ឧត្តមសេនីយ៍ទោ អ៊ុយ ហៀង មេបញ្ជាការយោធភូមិភាគទី៣ បានអញ្ជើញជាអធិបតីក្នុងពិធីបិទវគ្គហ្វឹកហ្វឺនបំប៉នពង្រឹងសមត្ថភាពយោធា ប្រចាំឆ្នាំ២០២៤ របស់តំបន់ប្រតិបត្តិការសឹករងកំពង់ស្ពឺ និងវត្តមានអញ្ជើញចូលរួមពីសំណាក់ ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ នាថ្ងៃទី២៦ ខែធ្នូ ឆ្នាំ២០២៤នៅបញ្ជាការដ្ឋាន តំបន់ប្រតិបត្តិការសឹករងកំពង់ស្ពឺ។

តាមរបាយការណ៍ អានដោយឧត្តមសេនីយ៍ទោ ម៉ាន់ ម៉ាច មេបញ្ជាការតំបន់ប្រតិបត្តិការសឹករង កំពង់ស្ពឺ សិក្ខាកាមបញ្ចប់វគ្គទទួលបានលទ្ធផល ៖
-និទ្ទេសល្អ ចំនួន ៣៤នាក់ ស្មើនឹង ៦៨%
-និទ្ទេសល្អបង្គួរ ចំនួន ១២នាក់ ស្មើនឹង ២៤%
-និទ្ទេសមធ្យម ចំនួន ៤នាក់ ស្មើនឹង ៨%
មានមតិសំណេះសំណាលក្នុងឱកាសនោះ

ឯកឧត្តមបណ្ឌិត ជាម ច័ន្ទសោភ័ណ អផិបាល នៃគណៈអភិបាលខេត្តកំពង់ស្ពឺ បានកោតសរសើរ និងវាយតម្លៃខ្ពស់ចំពោះថ្នាក់ដឹកនាំ នាយទាហាន នាយទាហានរង ពលទាហាន តំបន់ប្រតិបត្តិ ការសឹករងកំពង់ស្ពឺ ដែលកន្លងមកតែងតែយកអស់ស្មារតី ទទួលខុសត្រូវបំពេញភារកិច្ចប្រចាំថ្ងៃ ជាកម្លាំងត្រៀមអន្តរាគមន៍តាមបទបញ្ជារបស់យោធភូមិភាគទី៣ និងគណៈបញ្ជាការឯកភាពរដ្ឋបាលខេត្ត លើកិច្ចការងារជួយសង្គ្រោះប្រជាពលរដ្ឋ ការទប់ស្កាត់ បង្រាប បទល្មើសព្រៃឈើ បទល្មើស ទន្ទ្រានដីរដ្ឋដោយខុសច្បាប់ បទល្មើសផ្សេងៗ និងជាកម្លាំងដែលស្មោះត្រង់ដាច់ខាតជាមួយរាជរដ្ឋាភិបាល អន្តរាគមន៍វាយកម្ទេចរាល់កម្លាំងអមិត្ត ដែលប៉ុនប៉ងបង្កអសន្តិសុខ និងបំផ្លាញសុខសន្តិភាពសង្គម ។

ឧត្តមសេនីយ៍ទោ អ៊ុយ ហៀង មានប្រសាសន៍ថា កងយោធពលខេមរភូមិន្ទ នៅតែចាត់ទុកវិស័យហ្វឹកហ្វឺនបណ្តុះបណ្តាលធនធានមនុស្សសម្រាប់កងទ័ព ក្នុងការធ្វើកំណែទំរង់កងយោធពលខេមរភូមិន្ទ សំដៅធ្វើទំនើបកម្ម និង បង្កើនសមត្ថភាព ជំនាញ វិជ្ជាជីវៈ ដល់យោធិន ដើម្បីធានា ការពារ ប្រកបដោយប្រសិទ្ធភាព អតិបតេយ្យ បូរណភាពទឹកដី សន្តិភាព និងសណ្តាប់ធ្នាប់សាធារណៈ ក៏ដូចជាការអភិវឌ្ឍន៍គ្រប់វិស័យ។

ឧត្តមសេនីយ៍ទោ អ៊ុយ ហៀង បានបន្ថែមទៀតថា បច្ចុប្បន្នការងារហ្វឹកហ្វឺនបានដើរតួនាទី សំខាន់ សម្រាប់ពង្រឹងខឿនការពារជាតិ តាមរយៈការផ្តល់ចំណេះដឹង ចំណេះធ្វើពិតប្រាកដល់យោធិន វ័យក្មេងបន្តវេនជំនាន់ក្រោយ។ ក្នុងន័យនេះ ការងារហ្វឹកហ្វឺនត្រូវបានចាត់ទុកជាការងារ អាទិភាពចាំបាច់បំផុតដែលត្រូវដំណើរការបន្តបន្ទាប់ដូចភ្លៀងរលឹម ដើម្បីរួមចំណែកអនុវត្តយុទ្ធសាស្រ្តការពារជាតិ និង គោលនយោបាយរបស់រាជរដ្ឋាភិបាលឲ្យទទួលបានជោគជ័យ ។

យោធិនគ្រប់រូបត្រូវគោរពឱ្យបានម៉ឺងម៉ាត់ នូវប្រសាសន៍ណែនាំដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលមានខ្លឺមសារ៥ចំណុចដូចខាងក្រោម៖
១-កងទ័ពត្រូវតែកងទ័ពដែលមានវិជ្ជាជីវៈខ្ពស់ ដោយដាច់ខាតស្មោះត្រង់ចំពោះជាតិមាតុភូមិ និងប្រជាជន និងយកអស់ស្មារតីគោរពឱ្យបានម៉ឺងម៉ាត់ នូវរាល់បទប្បញ្ញាតិ សារាចរណែនាំ លក្ខន្តិកៈ នៃកងយោធពលខេមរភូមិន្ទ បទដ្ឋានគតិយុត្ត ប្រកាន់ខ្ជាប់ប្រពៃណី និងសេចក្តីថ្លៃថ្នូរ របស់កងយោធពលខេមរភូមិន្ទ និងក្លាយជាកម្លាំងពិត ដើម្បីការពារជាតិ មាតុភូមិ និងប្រជាជន។
២-គ្រប់អង្គភាពទាំងអស់ ត្រូវយកចិត្តទុកដាក់បំផុតលើការប្រើប្រាស់កម្លាំង ធនធាន និងទ្រព្យសម្បត្តិរបស់អង្គភាពឱ្យបានស្ថិរភាព និងមានប្រសិទ្ធភាព ពោលគឺសូមប្រើប្រាស់កម្លាំង ឱ្យសមស្រមទៅ និងតម្រូវការជំនាញ និងសូមគ្រប់គ្រងថែរក្សាគ្រឿងសព្វាវុធ បរិក្ខាយោធាគ្រប់បែបយ៉ាង ព្រមទាំងស្បៀងអាហារជាដើម ឱ្យបានត្រឹមត្រូវតាមលក្វណៈបច្ចេកទេស គង់វង្ស និងគ្រប់គ្រាន់។
៣-គ្រប់អង្គភាពទាំងអស់ ត្រូវបន្តពង្រឹងការហ្វឹកហ្វឺន រៀនសូត្រ និងការកសាងប្រភពធនធានមនុស្ស ទាំងបរិមាណ និងគុណភាព ដើម្បីបម្រើការពារជាតិឱ្យមានប្រសិទ្ធភាព។
៤-អង្គភាពទាំងអស់ត្រូវយកចិត្តទុកដាក់ត្រៀមកម្លាំង មធ្យោបាយ និងសម្ភារក្រប់បែបយ៉ាង ដើម្បីចូលរួមជួយសង្គ្រោះប្រជាពលរដ្ឋ ណៅពេលមានគ្រោះភ័យជាយថាហេតុណាមួយ ដោយស្មារតី បុរេសកម្ម ព្រមទាំងសហការឱ្យបានស្អិតរមួតជាមួយនឹងអាជ្ញាធរដែនដី និងក្រសួងពាក់ព័ន្ធ។
៥-ត្រូវយកចិត្តទុកដាក់ការងារធានាកិច្ចការភស្តុភារ និងសុខាភិបាលក្នុងកងទ័ព ដើម្បីធានាជីវភាពរស់នៅ និងសុខភាពរបស់កងទ័ពរបស់យើងឱ្យបានកាន់តែល្អប្រសើរ ៕