ក្រសួងការបរទេសរុស្ស៊ី អះអាងថា កប៉ាល់ដឹកទំនិញឈ្មោះថា «Ursa Major» បានលិចនៅក្នុងសមុទ្ទមេឌីទែរ៉ាណេ

ម៉ូស្គូ៖ ក្រសួងការបរទេសរុស្ស៊ី បានអះអាងនៅថ្ងៃអង្គារទី២៤ ខែធ្នូនេះថា កប៉ាល់ដឹកទំនិញឈ្មោះថា «Ursa Major» បានលិចនៅក្នុងសមុទ្ទមេឌីទែរ៉ាណេចន្លោះប្រទេសអេស្ប៉ាញ និងអាល់ហ្សេរី ខណៈនាវិកពីរនាក់បានបាត់ខ្លួនឈឹង។

ក្រសួងសមីខាងលើ បានអះអាងនៅក្នុងសេចក្តីថ្លែងការណ៍មួយថា កប៉ាល់ដឹកទំនិញបានលិចចូលទៅក្នុងសមុទ្ទ បន្ទាប់ពីមានករណីផ្ទុះមួយកើតឡើងនៅត្រង់កន្លែងផ្ទុកម៉ាស៊ីនរបស់វា ហើយសមាជិកនាវិកចំនួន១៤នាក់ក្នុងចំណោម១៦នាក់ ត្រូវបានជួយសង្គ្រោះ និងស្រង់យកទៅកាន់ប្រទេសអេស្ប៉ាញ។ ជាអកុសល នាវិក២នាក់កំពុងបាត់ស្រមោលឈឹងគ្មានតម្រុយទាល់តែសោះ។

គួរជម្រាបថា កប៉ាល់ដឹកទំនិញមួយនេះ បានចាកចេញពីកំពង់ផែរុស្ស៊ី នៃទីក្រុង Saint Petersburg កាលពីថ្ងៃទី១១ ខែធ្នូ ហើយត្រូវបានគេឃើញថា បានបញ្ជូនសញ្ញាអាសន្នចុងក្រោយកាលពីថ្ងៃចន្ទទី២៣ ខែធ្នូ នៅចន្លោះប្រទេសអាល់ហ្សេរី និងអេស្ប៉ាញ។

សូមរំឭកថា កាលពីថ្ងៃអាទិត្យទី១៥ធ្នូ កន្លងទៅ នាវាដឹកប្រេងរុស្ស៊ី២គ្រឿងរងការខូចខាតយ៉ាងដំណំ ដោយសារខ្យល់ព្យុះ ខណៈនាវាមួយក្នុងចំណោមនោះ បានដាច់រហែកចេញពីគ្នាជាពីរកំណាត់ បណ្តាលឱ្យប្រេងរាប់សិបតោនកំពប់ធ្លាយចូលទៅក្នុងសមុទ្ទ Kerch ធ្វើឱ្យផ្ទៃទឹកប្រែទៅជាខ្មៅ៕