ឯកឧត្តម អឿង ចន្ថា៖ ក្រសួងធនធានទឹក កំពុងជួយលើការងារផ្តល់ព័ត៌មានកសិឧតុនិយម និងការបណ្តុះបណ្តាលផ្នែកឧតុនិយម ដើម្បីជួយពង្រឹងដល់វិស័យកសិកម្ម
នាថ្ងៃទី២៣ ខែធ្នូ ឆ្នាំ២០២៤នេះ ឯកឧត្តមសាស្រ្តាចារ្យបណ្ឌិត អឿង ចន្ថា អនុរដ្ឋលេខាធិការ និងជាសមាជិកគណៈកម្មាធិការតម្រង់ទិសគម្រោង PEARL ក្នុងនាមតំណាងដ៏ខ្ពង់ខ្ពស់ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម រួមជាមួយលោកបណ្ឌិត ឈិន រតនា ជំនួយការក្រសួង បានអញ្ជើញចូលរួមក្នុងកិច្ចប្រជុំគណៈកម្មាធិការតម្រង់ទិសគម្រោងលើកទី៣ សម្រាប់គម្រោងភាពជាដៃគូរវាងរដ្ឋ សហគមន៍ និងវិស័យឯកជនដើម្បីកសិកម្មមានលក្ខណៈភាតរបរិស្ថាន និងជីវភាពប្រជាជនមានភាពធន់នៅខាងជើងបឹងទន្លេសាប (គម្រោង PEARL) នៅទីស្តីការក្រសួងកសិកម្ម រុក្ខាប្រមាញ់ និងនេសាទ។
សូមជម្រាបថា កិច្ចប្រជុំគណៈកម្មាធិការតម្រង់ទិសគម្រោងនេះមានការចូលរួមពីសហប្រធានក្រសួងកសិកម្ម រុក្ខាប្រមាញ់ និងនេសាទ និងតំណាងអង្គការស្បៀងនិងកសិកម្មនៃសហប្រជាជាតិប្រចាំកម្ពុជា ព្រមទាំងសមាជិកគណៈកម្មាធិការតម្រង់ទិសគម្រោងរួមមាន ក្រសួងធនធានទឹក និងឧតុនិយម ក្រសួងបរិស្ថាន ក្រសួងពាណិជ្ជកម្ម ធនាគារអភិវឌ្ឍន៍ជនបទនិងកសិកម្ម និងសមាគមតំណាងឱ្យវិស័យឯកជន និងកសិករ។
ឯកឧត្តមអនុរដ្ឋលេខាធិការបានបញ្ជាក់ឱ្យដឹងថា គោលបំណងនៃកិច្ចប្រជុំនេះគឺដើម្បី (១) ឆ្លុះបញ្ចាំងពីការងារសម្រចបាន និងបញ្ហាប្រឈមក្នុងឆ្នាំ២០២៤ (២) ផែនការសកម្មភាព និងថវិកាឆ្នាំ២០២៥ និងផែនការសកម្មភាពសម្រាប់ ៦ ខែដំបូង និង (៣) ការផ្តល់យោបល់ ការធ្វើបច្ចុប្បន្នភាព និងការផ្តល់ធាតុចូលលើគម្រោង។ ទន្ទឹមនឹងនេះ ឯកឧត្តមអនុរដ្ឋលេខាធិការបញ្ជាក់បន្ថែមថា ក្រសួងធនធានទឹក និងឧតុនិយមកំពុងជួយលើការងារផ្តល់ព័ត៌មានកសិឧតុនិយម និងការបណ្តុះបណ្តាលផ្នែកឧតុនិយម ដើម្បីជួយពង្រឹងដល់វិស័យកសិកម្ម។
សូមបញ្ជាក់ថា គម្រោងភាពជាដៃគូរវាងរដ្ឋ សហគមន៍ និងវិស័យឯកជនដើម្បីកសិកម្មមានលក្ខណៈភាតរបរិស្ថាន និងជីវភាពប្រជាជនមានភាពធន់នៅខាងជើងបឹងទន្លេសាប (គម្រោង PEARL) ជាគម្រោងដែលទទួលបានហិរញ្ញប្បទានពីមូលនិធិអាកាសធាតុបៃតង(GCF) ដើម្បីអនុវត្តនៅក្នុងប្រទេសកម្ពុជា ហើយនឹងត្រូវអនុវត្តរួមគ្នាដោយក្រសួងកសិកម្ម រុក្ខាប្រមាញ់ និងនេសាទ និងក្រសួងបរិស្ថាន ព្រមជាមួយនឹងអង្គការស្បៀង និងកសិកម្មនៃសហប្រជាជាតិ(FAO)។ គម្រោងនេះត្រូវបានអនុម័តដោយមូលនិធិអាកាសធាតុបៃតង នៅក្នុងកិច្ចប្រជុំក្រុមប្រឹក្សាភិបាលលើកទី៣៥ កាលពីខែមីនា ឆ្នាំ២០២៣កន្លងទៅ៕
