រដ្ឋមន្ត្រីក្រសួងផែនការ៖ ទិន្នន័យនិងព័ត៌មានបច្ចុប្បន្នភាពអំពីជនជាតិដើមភាគតិចនៅកម្ពុជា នឹងរួមចំណែកលើកកម្ពស់ការយល់ដឹងអំពីប្រពៃណី ទំនៀមទម្លាប់ និងជីវភាពរស់នៅរបស់ជនជាតិដើមភាគតិចនៅកម្ពុជា
ភ្នំពេញ៖ នាព្រឹកថ្ងៃទី១២ ខែធ្នូ ឆ្នាំ២០២៤ ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ បានអញ្ជើញជាអធិបតីក្នុងពិធីប្រកាសផ្សព្វផ្សាយ “របាយការណ៍ស្តីពី ស្ថានភាពប្រជាសាស្រ្ត និងសង្គម-សេដ្ឋកិច្ចរបស់ជនជាតិដើមភាគតិចនៅកម្ពុជា៖ បច្ចុប្បន្នភាពឆ្នាំ២០២៤” នៅសណ្ឋាគារកាំបូឌីយ៉ាណា។
ពិធីនេះ មានការអញ្ជើញចូលរួមពី ឯកឧត្តម លោក លោកស្រី នៃក្រុមការងារអន្តរស្ថាប័នផលិតទិន្នន័យសហគមន៍និងរបាយការណ៍ជនជាតិដើមភាគតិច, តំណាង UNFPA ប្រចាំកម្ពុជា, ការិយាល័យកុងស៊ុល និងសហប្រតិបត្តិការ នៃទីភ្នាក់ងារស្វីសសម្រាប់ការអភិវឌ្ឍ និងសហប្រតិបត្តិការនៅកម្ពុជា, អង្គការជនជាតិដើមភាគតិចកម្ពុជា, តំណាងចាស់ទុំជនជាតិដើមភាគតិច, តំណាងគណៈអភិបាលរាជធានី ខេត្ត, មន្ទីរពាក់ព័ន្ធ និងភ្ញៀវកិត្តិយសជាតិ និងអន្តរជាតិ ជាច្រើនរូប។
មានប្រសាសន៍ក្នុងពិធី ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ បានគូសបញ្ជាក់ថា “របាយការណ៍ស្តីពីស្ថានភាពប្រជាសាស្រ្ត និងសង្គម-សេដ្ឋកិច្ចរបស់ជនជាតិដើមភាគតិចនៅកម្ពុជា៖ បច្ចុប្បន្នភាពឆ្នាំ២០២៤” ដែលប្រកាសផ្សព្វផ្សាយនាឱកាសនេះ ត្រូវបានរៀបចំឡើងក្នុងគោលបំណង ដើម្បីឆ្លើយតបទៅនឹងតម្រូវការទិន្នន័យថ្នាក់ជាតិអំពីជនជាតិដើមភាគតិចនៅកម្ពុជា សម្រាប់ការងារអភិរក្ស និងការអភិវឌ្ឍជនជាតិដើមភាគតិចនៅកម្ពុជា។ របាយការណ៍នេះ មានផ្តល់ជូននូវព័ត៌មាន គ្រប់ជ្រុងជ្រោយ លម្អិត ច្បាស់លាស់ និងមានសង្គតិភាព សម្រាប់ការងាររៀបចំផែនការនិងសកម្មភាពការពារ អភិរក្ស និងអភិវឌ្ឍជនជាតិដើមភាគតិចនៅកម្ពុជា ឱ្យចំគោលដៅ ស្របតាមបរិបទកម្ពុជា និងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល និងសម្រាប់ចែករំលែកទូលំទូលាយដល់អ្នកមានចំណែកពាក់ព័ន្ធ និងសាធារណជន។
ឯកឧត្តមរដ្ឋមន្ត្រី បានគូសបន្ថែមថា ទិន្នន័យនិងព័ត៌មានបច្ចុប្បន្នភាពអំពីជនជាតិដើមភាគតិចនៅកម្ពុជា នឹងរួមចំណែកលើកកម្ពស់ការយល់ដឹងអំពីប្រពៃណី ទំនៀមទម្លាប់ និងជីវភាពរស់នៅរបស់ជនជាតិដើមភាគតិចនៅកម្ពុជា ស្របតាមខ្លឹមសារនៃសារលិខិតសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងឱកាសអបអរសាទរទិវាអន្តរជាតិជនជាតិដើមភាគតិចពិភពលោកទី៣០ និងលើកទី២០នៅកម្ពុជា នាថ្ងៃទី៩ ខែសីហា ឆ្នាំ២០២៤។
មានប្រសាសន៍ផងដែរ ឯកឧត្តមរដ្ឋមន្ត្រី បានគូសរំលឹកថា រាជរដ្ឋាភិបាល នីតិកាលទី៧ ក្រោមការដឹកនាំប្រកបដោយគតិបណ្ឌិតដ៏ខ្ពង់ខ្ពស់បំផុតរបស់ សម្តេចមហាបវរធិបតីនាយករដ្ឋមន្ត្រី មានការយកចិត្តទុកដាក់ខ្ពស់ទៅលើគុណភាពទិន្នន័យ។
ឯកឧត្តមរដ្ឋមន្ត្រី បានបន្ថែមថា ការយល់ដឹងច្បាស់លាស់អំពីបម្រែបម្រួលឌីណាមិកប្រជាជន និងតម្រូវការសេវាសង្គមរបស់ប្រជាពលរដ្ឋ តាមរយៈការមានទិន្នន័យប្រកបដោយបរិយាបន្ន គ្រប់ជ្រុងជ្រោយ ដែលគ្របដណ្ដប់មនុស្សគ្រប់រូប ដោយមិនប្រកាន់ទីកន្លែង ជាតិសាសន៍ ឬសាវតារសង្គម-សេដ្ឋកិច្ច ពិសេសស្ត្រីនិងក្មេងស្រី យុវជន ជនជាតិដើមភាគតិច និងជនងាយរងគ្រោះ ស្របតាមគោលការណ៍អភិវឌ្ឍន៍ប្រកបដោយចីរភាព “គ្មាននរណាម្នាក់ត្រូវបានគេបោះបង់ចោល” អាចឱ្យយើងបានស្ដាប់ឮសំឡេងពិតរបស់ពួកគេ កំណត់បាននូវគម្លាតនៃការទទួលបានសេវាសង្គម និងធានាថា តម្រូវការរបស់ពួកគេត្រូវបានបញ្ចូលទៅក្នុងគោលនយោបាយ ផែនការ និងកម្មវិធីអភិវឌ្ឍន៍នានា។
គួរបន្ថែមថា របាយការណ៍បច្ចុប្បន្នភាពឆ្នាំ២០២៤ នេះ គឺជាប្រភេទការស្រាវជ្រាវដែលប្រើប្រាស់ទិន្នន័យមានស្រាប់ ដោយមានការវិភាគបន្ថែមតាមការចាំបាច់លើប្រធានបទនីមួយៗ ទៅតាមតម្រូវការរបស់អ្នកប្រើប្រាស់។ យោងតាមទិន្នន័យជំរឿនឆ្នាំ២០១៩ ជនជាតិដើមភាគតិច មានចំនួន២២អំបូរ និងមានប្រជាជនសរុបចំនួន ១៧២ ៩៨០នាក់ (ស្មើនឹង១,១១% នៃប្រជាជនកម្ពុជាសរុប) ដែលភាគច្រើន (៩៤% នៃជនជាតិដើមភាគតិច) រស់នៅក្នុងខេត្តរតនគិរី ខេត្តមណ្ឌលគិរី ខេត្តក្រចេះ ខេត្តព្រះវិហារ ខេត្តស្ទឹងត្រែង និងខេត្តកំពង់ធំ៕
