មន្ទីរអភិវឌ្ឍន៍ជនបទខេត្តស្ទឹងត្រែង រៀបចំសិក្ខាសាលាឆ្លុះបញ្ចាំងពីលទ្ធផលបញ្ចប់ការបន្ទោបង់ពាសវាលពាសកាល
ភ្នំពេញ៖ ដើម្បីទទួលបានពានជ័យលាភីជាខេត្ត បញ្ចប់ការបន្ទោបង់ពាសវាលពាសកាល (ODF) យ៉ាងពិតប្រាកដ ដែលនឹងប្រព្រឹត្តទៅនៅពេលឆាប់ៗខាងមុខនេះ ក្រុមការងារដែលរៀបចំដោយ រដ្ឋបាលខេត្តស្ទឹងត្រែង ក្រសួងអភិវឌ្ឍន៍ជនបទ គាំទ្រដោយអង្គការភ្លេន និងធ្វើការសម្របសម្រួលដោយមន្ទីរអភិវឌ្ឍន៍ជនបទ នាថ្ងៃទី១២ ខែធ្នូ ឆ្នាំ២០២៤ នៅសាលាខេត្តស្ទឹងត្រែង បានធ្វើសិក្ខាសាលាឆ្លុះបញ្ចាំងស្តីពីលទ្ធផលផ្ទៀងផ្ទាត់ស្ថានភាពបញ្ចប់ការបន្ទោបង់ពាសវាលពាសកាល(ODF)ខេត្តស្ទឹងត្រែង។
ផ្អែកតាមលទ្ធផលដែលក្រុមការងារបានចុះអង្កេតជាក់ស្តែងតាមខ្នងផ្ទះនៅតាមភូមិ បង្ហាញថាប្រជាពលរដ្ឋក្នុងខេត្តស្ទឹងត្រែងបានផ្លាស់ប្តូរឥរិយាបថប្រតិបត្តិអនាម័យល្អ មានបង្គន់ដែលមានការកែលម្អសម្រាប់ប្រើប្រាស់ផ្ទាល់ខ្លួន៩៣ភាគរយ និងទុកដាក់សំរាមសមរម្យក្នុងបរិវេណផ្ទះ។
ឯកឧត្តម យឹម ជុង រដ្ឋលេខាធិការ ក្រសួងអភិវឌ្ឍន៍ជនបទ ជាអធិបតីក្នុងពិធីបើកសិក្ខាសាលាលទ្ធផលផ្ទៀងផ្ទាត់ស្ថានភាពបញ្ចប់ការបន្ទោបង់ពាសវាលពាសកាល(ODF) និងមានការចូលរួមពី ឯកឧត្តម ធូ ចាន់ពៅ អភិបាលរង នៃគណៈអភិបាលខេត្ត លោកវេជ្ជបណ្ឌិត លន់ សាយតេង លោក ព្រំ ចាន់ថា ប្រធានមន្ទីរអភិវឌ្ឍន៍ជនបទខេត្ត លោក យី គឹមថាន នាយករងអង្គការភ្លេនអន្តរជាតិ និងជាតំណាងអង្គការដៃគូ ដែលមានអាជ្ញាស្រុក ក្រុង ឃុំ សង្កាត់ចូលរួម បទបង្ហាញនៅក្នុងអង្គសិក្ខាសាលា ក្រុមការងារចុះផ្ទៀងផ្ទាត់ODF ថ្នាក់ជាតិ បានបង្ហាញពីស្ថានភាព អនាម័យ និងបរិស្ថាននៅខេត្តស្ទឹងត្រែង មានលក្ខណៈល្អបង្គួរ ជាពិសេសតាមរយៈនៃការចុះផ្ទៀងផ្ទាត់ មិនមានខ្នងផ្ទះណាមួយត្រូវបានរកឃើញ នៅបន្តបន្ទោបង់ពាសវាលពាសកាលនោះទេ ។
នៅក្នុងសិក្ខាសាលា បានបញ្ចាក់ថា បានឯកភាពនិងទទួលយកលទ្ធផល និងការចុះផ្ទៀងផ្ទាត់ដោយក្រុមការងារថ្នាក់ជាតិ និងអង្គការដៃគូ ដែលសម្រេចជាឯកឆន្ទជូនខេត្តស្ទឹងត្រែង ក្លាយជាខេត្តទទួលបានជ័យលាភី បញ្ចប់ការបន្ទោបង់ពាសវាលពាសកាល(ODF)ចាប់ពីថ្ងៃទី១២ ខែធ្នូ ឆ្នាំ២០២៤នេះទៅ។
ហើយការប្រកាសជ័យលាភី និងប្រព្រឹត្តទៅនៅថ្ងៃទី១៦ ខែធ្នូ ឆ្នាំ២០២៤ ក្រោមអធិបតីភាពដ៏ខ្ពង់ខ្ពស់ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ និងមានការចូលរួមពីរដ្ឋបាលខេត្ត ក្រុងស្រុកទាំង៦ និងឃុំសង្កាត់ទាំង៣៤។
ស្ថានភាពអនាម័យតាមស្ថាប័ន អង្គភាព និងគ្រិះស្ថានផ្តល់សេវាទាំងសាធារណៈ ទាំងឯកជន អារាមសាសនា និងបង្គន់សាធារណៈតាមតំបន់សួនច្បារតាមដងទន្លេកម្សាន្ត ផ្អែកតាមការអង្គេតជាក់ស្តែងមានស្ថានភាព អនាម័យល្អ ដោយទទួលបានពិន្ទុរហូតដល់៨៨ភាគរយ ខណៈបើតាមគោលការណ៍៥០ភាគរយ ជាប់ODF និង៨៥ភាគរយឡើងទទួលបានODF ភ្លើស៕
