ឯកឧត្តម ចាន់ ស៊ីណាត អញ្ជើញចុះពិនិត្យ ការងារ គ្រប់គ្រង និង ប្រើ ប្រាស់ទឹក របស់សហគមន៍ កសិករប្រើប្រាស់ទឹក នៃ ប្រព័ន្ធធារាសាស្រ្ត ព្រែកពោធិ ខេត្តកំពង់ចាម

ភ្នំពេញ៖ ឯកឧត្តម ចាន់ ស៊ីណាត រដ្ឋ លេខាធិការ តំណាងដ៏ខ្ពង់ខ្ពស់របស់ឯកឧត្តម ថោ ជេដ្ឋា រដ្ឋមន្ដ្រីក្រសួងធនធានទឹក និងឧតុនិយម បានអញ្ជើញ ដឹកនាំក្រុមការងារ បច្ចេកទេសក្រសួង ចុះពិនិត្យការងារ គ្រប់គ្រង និងប្រើប្រាស់ទឹក របស់សហគមន៍ កសិករប្រើប្រាស់ទឹក (សកបទ) នៃ ប្រព័ន្ធធារាសាស្រ្តព្រែកពោធិ ស្ថិត ក្នុងស្រុកស្រីសន្ធរ ខេត្តកំពង់ចាម។

ឯកឧត្តមរដ្ឋលេខាធិការ បានបញ្ជាក់ឱ្យដឹងថា ប្រព័ន្ធធារាសាស្ត្រមួយ នេះ បាន អនុវត្តនូវគម្រោងនៃការធ្វើទំនើបកម្មវិស្វកម្ម ដោយបានទទួលហិរញ្ញប្បទានពីធនាគារអភិវឌ្ឍន៍អាស៊ី (ADB) ក្រោមកិច្ចសហការប្រកប ដោយស្មារតីយកចិត្តទុកដាក់ខ្ពស់ ពីសំណាក់ក្រសួងសេដ្ឋកិច្ច និងហិរញ្ញវត្ថុ។

ទន្ទឹមនឹងនេះ ឯកឧត្តម រដ្ឋលេខាធិការ បាន បញ្ជាក់បន្ថែមថា ប្រព័ន្ធធារាសាស្រ្តព្រែកពោធិមាន បំពាក់ទៅ ដោយឧបករណ៍ទំនើប និងមានហេដ្ឋារចនាសម្ព័ន្ធពាក់ព័ន្ធគ្រប់ប្រភេទបម្រើឱ្យ ការ បញ្ចេញបញ្ចូលទឹកដល់ស្រែរបស់ប្រជាកសិករដែលជាសមាជិកសហគមន៍កសិករប្រើ ប្រាស់ទឹក (សកបទ) គ្របដណ្ដប់លើ ផ្ទៃដីប្រមាណ ៨ពាន់ហិកតា ព្រមទាំង ធ្វើការពង្រឹង និងពង្រីកជាបន្តបន្ទាប់ ដើម្បីឈានទៅអនុវត្តយុទ្ធសាស្រ្ត និងច្បាប់ស្ដីពី ភាពជាដៃគូរវាងរដ្ឋនិង ឯកជន (PPP) ឱ្យបានល្អប្រសើរបន្ថែមទៀតនាពេលខាងមុខ៕