ឯកឧត្តម សរ សុពុត្រា ជួបសំណេះសំណាល និងជូនដំណើរយោធិន នៃកងរាជអាវុធហត្ថ ទើបជ្រើសរើសថ្មី ទៅហ្វឹកហ្វឺននៅ មជ្ឈមណ្ឌលហ្វឹកហ្វឺនកងរាជអាវុធហត្ថ ភ្នំជុំសែនរីករាយ

ភ្នំពេញ៖ នៅព្រឹកថ្ងៃទី០៤ ខែធ្នូ ឆ្នាំ២០២៤ នៅបញ្ជាការដ្ឋានកងរាជអាវុធហត្ថខេត្តស្ទឹងត្រែង បានរៀបចំពិធីសំណេះសំណាល និងជូនដំណើរយោធិន នៃកងរាជអាវុធហត្ថ ទើបជ្រើសរើសថ្មី (ជាប់ជាស្ថាពរ) ចូលហ្វឹកហ្វឺននៅ មជ្ឈមណ្ឌលហ្វឹកហ្វឺនកងរាជអាវុធហត្ថ ភ្នំជុំសែនរីករាយ ក្រោមអធិបតីភាព ឯកឧត្តម សរ សុពុត្រា អភិបាល នៃគណ:អភិបាលខេត្តស្ទឹងត្រែង និងលោកឧត្តមសេនីយ៍ត្រី សេង សុភាព មេបញ្ជាការកងរាជអាវុធហត្ថខេត្តស្ទឹងត្រែង ព្រមទាំងមានការអញ្ជើញចូលរួមពីលោកឧត្តមសេនីយ៍ត្រី ស្នងការរង ស្នងការនគរបាលខេត្ត លោកវរសេនីយ៍ឯក មេបញ្ជាការរង តំបន់ប្រតិបត្តិការសឹករងខេត្ត លោកឧត្តមអគ្គានុរក្ស ប្រធានពន្ធនាគារខេត្ត អភិបាល ក្រុង-ស្រុក នាយទាហាន នាយទាហានរង នៃកងរាជអាវុធហត្ថខេត្តស្ទឹងត្រែង និងក្រុមគ្រួសារ មាតាបីតា អាណាព្យាបាល របស់យោធិន នៃកងរាជអាវុធហត្ថទើបជ្រើសរើសថ្មី បានអញ្ជើញមកចូលរួមក្នុងពិធីនេះផងដែរ។

ក្នុងឱកាសនោះ ឯកឧត្តមអភិបាលខេត្ត ក៏បានផ្តាំផ្ញើដល់ យោធិនជ្រើសរើសថ្មី ឱ្យខិតខំប្រឹងប្រែងរៀនសូត្រ គោរពវិន័យ មានសាមគ្គីភាព ថែទាំសុខភាព សុវត្ថិភាពឱ្យបានល្អ និងបានឧបត្ថម្ភថវិកាចំនួន ២,៣០០,០០០រៀល, ភួយចំនួន ២៣ភួយ, ខោអាវកីឡាចំនួន ២៣កំប្លេរ, លោកឧត្តមសេនីយ៍ត្រី មេបញ្ជាការ ឧបត្ថម្ភថវិកាចំនួន ២,៧០០,០០០រៀល និងលោកអភិបាលក្រុងស្ទឹងត្រែង ឧបត្ថម្ភថវិកាចំនួន ១,១៥០,០០០រៀល សរុបស្មើនឹងចំនួន ៦,១៥០,០០០រៀល ដល់យោធិនជ្រើសរើសថ្មី ចំនួន ២១នាក់ និងគ្រូ ០២នាក់។ ក្នុងនោះយោធិនម្នាក់ៗ ទទួលបានថវិកាចំនួន ២៥០,០០០រៀល, ភួយ០១, ខោអាវកីឡា០១ កំប្លេរ និងគ្រូ ០២នាក់ ដោយម្នាក់ៗ​ទទួលបានថវិកាចំនួន ៤៥០,០០០រៀល ភួយ០១ និងខោអាវកីឡា ០១កំប្លេរ ៕