មនុស្សជាង ៣៧០០០នាក់ ដែលរងផលប៉ះពាល់ដោយទឹកជំនន់នៅម៉ាឡេស៊ី ត្រូវបានជម្លៀសចេញទៅទីទួលមានសុវត្ថិភាព

គូឡាឡាំពួ៖ នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បានបង្ហាញនៅថ្ងៃទី២៨ ខែវិច្ឆិកាថា មនុស្សជាង៣៧០០០នាក់បានរងផលប៉ះពាល់ដោយទឹកជំនន់បង្កឡើងដោយភ្លៀងធ្លាក់ខ្លាំងនៅក្នុងរដ្ឋចំនួន៦របស់ប្រទេសម៉ាឡេស៊ី ក្នុងសប្តាហ៍នេះ។

លោក អាន់វ៉ា បានប្រាប់សភាថា ជម្រកបណ្តោះអាសន្នចំនួន៣២២ ត្រូវបានបើកនៅក្នុងរដ្ឋដែលរងផលប៉ះពាល់ទាំង៦ រូមមានរដ្ឋ Kelantan, Terengganu, Kedah, Perlis, Johor និង Perak ដើម្បីផ្តល់ជម្រកដល់ជនភៀសខ្លួនដោយទឹកជំនន់។ លោក អាន់វ៉ា បានឱ្យដឹងថា រដ្ឋ Kelantan ភាគឦសានជាប់ព្រំដែនប្រទេសថៃ បានរងការវាយប្រហារយ៉ាងធ្ងន់ធ្ងរបំផុត ដោយមានមនុស្សចំនួន៣០៥៨២នាក់ មកពី ៩២២៣គ្រួសាររងផលប៉ះពាល់។ ទឹកជំនន់ គឺជារឿងធម្មតានៅលើឆ្នេរសមុទ្ទភាគខាងកើតនៃប្រទេសម៉ាឡេស៊ីក្នុងរដូវខ្យល់មូសុងប្រចាំឆ្នាំចាប់ពីខែតុលាដល់ខែមីនា ដោយមនុស្សរាប់ពាន់នាក់ត្រូវផ្លាស់ទីលំនៅជារៀងរាល់ឆ្នាំ។

សារក្នុងហ្វេសប៊ុករបស់ទីភ្នាក់ងារគ្រប់គ្រងគ្រោះមហន្តរាយជាតិរបស់ប្រទេសនេះ បានបង្ហាញបុគ្គលិកចូលរួមក្នុងកិច្ចខិតខំប្រឹងប្រែងជួយសង្គ្រោះសម្រាប់អ្នកដែលរងផលប៉ះពាល់នៅក្នុងរដ្ឋ Kelantan។ នាយកដ្ឋានឧតុនិយមបានចេញការព្រមានពណ៌ក្រហមសម្រាប់ភ្លៀងធ្លាក់ខ្លាំងជាបន្តបន្ទាប់ ដែលបង្ហាញពីកម្រិតនៃភ្លៀងធ្លាក់ដ៏គ្រោះថ្នាក់នៅក្នុងរដ្ឋ Kelantan, Pahang និងរដ្ឋ Terengganu។ វារំពឹងថា ភ្លៀងនឹងបន្តរហូតដល់ថ្ងៃសុក្រ។

លោក អាន់វ៉ា បាននិយាយថា ទីភ្នាក់ងារគ្រប់គ្រងគ្រោះមហន្តរាយជាតិត្រូវបានដឹកនាំឱ្យចល័តភ្នាក់ងារសហព័ន្ធ និងរដ្ឋទាំងអស់ ដើម្បីធានាសុវត្ថិភាពរបស់អ្នករងគ្រោះដោយទឹកជំនន់ និងអ្នកស្រុកពេញមួយរដូវភ្លៀងធ្លាក់។