ភ្នំពេញ៖ ដោយឈរលើមូលដ្ឋានកាន់តែរឹងមាំ សហគ្រិនខ្មែរ (KE) បានរៀបចំទិវា ប្រព័ន្ធអេកូឡូស៊ីសហគ្រិនភាពជាលើកដំបូងរបស់ខ្លួនរយៈពេល២ថ្ងៃ គឺនៅថ្ងៃទី២៤ និង២៥ ខែវិច្ឆិកា ឆ្នាំ២០២៤ នៅមណ្ឌលសន្និបាត និងពិព័រណ៍កោះពេជ្រ ក្រោមអធិបតីភាព ឯកឧត្តមអគ្គបណ្ឌិត សភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងមានការចូលរួមពីភាគីពាក់ព័ន្ធក្នុងប្រព័ន្ធអេកូឡូ ស៊ីសហគ្រិនភាព ដើម្បីអបអរសមិទ្ធផល និងបន្តលើកកម្ពស់ការ អភិវឌ្ឍសហគ្រិភាពនៅកម្ពុជា។
ទិវាប្រព័ន្ធអេកូឡូស៊ីសហគ្រិនភាពមានស្តង់ផលិតផលចូលរួមជាង២០០ស្តង់ និងមានកម្មវិធីសំខាន់ៗ ដូចជាការប្រកួតប្រជែងសង្វៀនរ៉ូបូត (BATTLEBOTX), ពិធីសម្ពោធកម្មវិធីសហគ្រិនមហាវិទ្យាល័យ រដូវកាលទី៣, កម្មវិធីប្រកួតគំរូធុរកិច្ច Y2B HACKATHON, វេទិកា ផ្សារភ្ជាប់អ្នកផលិតនិងទីផ្សារ, សន្និសីទវិនិយោគប្រកប ដោយ និរន្តភាព, សន្និសីទប្រព័ន្ធអេកូឡូស៊ីសហគ្រិនភាព និងពិធី ប្រគល់ពាន រង្វាន់សហគ្រិនខ្មែរ ឆ្នាំ២០២៤។
ទាក់ទងនឹងទិវាប្រព័ន្ធអេកូឡូស៊ីសហគ្រិនភាពលើកដំបូងនេះ ឯកឧត្តម អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី បានរំលេចនូវ តួនាទីដ៏សំខាន់នៃសហគ្រិនភាពក្នុងការជំរុញសកម្មភាពសេដ្ឋកិច្ច និងផ្តល់អត្ថប្រយោជន៍ជាច្រើនដល់ប្រជាជន ដូចជា បង្កើតការងារ មុខរបរ បង្កើនប្រាក់ចំណូល កាត់បន្ថយចំណាកស្រុក ជួយប្រជាជន ងាយរងគ្រោះឱ្យមានលំនឹងជីវភាព ជំរុញការអភិវឌ្ឍសេដ្ឋកិច្ចជាតិ និងស្ថិរភាពសង្គម។ការពង្រឹងប្រព័ន្ធអេកូឡូស៊ីសហគ្រិនភាព កាន់តែមានសារៈសំខាន់ និងកាន់តែបន្ទាន់ ក្នុងការជំរុញសន្ទុះកំណើន សេដ្ឋកិច្ច តាមរយៈការអភិវឌ្ឍសមត្ថភាព និងស្តង់ដារផលិតកម្ម ក្នុងន័យពង្រីកទីផ្សារក្នុងស្រុក និងអន្តរជាតិ ដើម្បីកាត់បន្ថយការនាំចូល និងជំរុញការនាំចេញ។
តាមការបញ្ជាក់របស់ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្ត្រី សហគ្រិនភាពដើរតួនាទីយ៉ាងសំខាន់សម្រាប់ការអភិវឌ្ឍសង្គម-សេដ្ឋកិច្ច កម្ពុជា ។ សហគ្រិនភាព មានឥទ្ធិពលគ្របដណ្តប់សកម្មភាព សេដ្ឋកិច្ចគ្រប់ប្រភេទ និងមានអត្ថប្រយោជន៍ជាច្រើនចំពោះប្រជាជន និងជាឆ្អឹងខ្នងដ៏រឹងមាំនៃសង្គម-សេដ្ឋកិច្ច ដែលបាន និងកំពុងចូលរួម ចំណែកយ៉ាងសំខាន់ក្នុងការបង្កើតការងារ និងមុខរបរ, ការបង្កើនប្រាក់ ចំណូល, ការកាត់បន្ថយភាពក្រីក្រ, និងការជំរុញការអភិវឌ្ឍប្រកប ដោយចីរភាព, បរិយាបន្ន, និង ភាពធន់ ។ ហេតុនេះហើយ, ទើបរាជ រដ្ឋាភិបាល តែងផ្តោតចិត្តទុកខ្ពស់លើការអភិវឌ្ឍសហគ្រិនភាព, ពិសេស ធុរកិច្ចថ្មី និងសហគ្រាសធុនមីក្រូ, តូច និងមធ្យម តាមរយៈការកសាងប្រព័ន្ធអេកូឡូស៊ីរស់រវើក និងគ្រប់ជ្រុងជ្រោយ។
ឯកឧត្តមឧបនាយករដ្ឋមន្ត្រី បានចាត់ទុកការប្រារព្ធនូវ «ទិវាប្រព័ន្ធ អេកូឡូស៊ីសហគ្រិនភាព» បានបង្ហាញច្បាស់ពីការចាត់ទុកវិស័យសហគ្រិនភាពជាចន្ទល់មួយដ៏សំខាន់ក្នុងការបង្កើតការងារ និងក្នុងការជំរុញកំណើនសេដ្ឋកិច្ចជាតិ ក៏ដូចជា បានបង្ហាញនូវឆន្ទៈមោះមុតរបស់កម្ពុជា ក្នុងការបន្តលើកស្ទួយការអភិវឌ្ឍ សហគ្រិនភាព, ជាពិសេស ធុរកិច្ចថ្មី និងសហគ្រាសធុនមីក្រូ, តូច និង មធ្យមឱ្យកាន់តែខ្លាំងឡើងបន្ថែមទៀត ។
អញ្ជើញចូលរួមក្នុងកម្មវិធីនេះ ឯកឧត្តម ហែម វណ្ណឌី រដ្ឋមន្ត្រី ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាប្រធានក្រុមប្រឹក្សាបរធនបាលនៃសហគ្រិនខ្មែរបានបញ្ជាក់«ទិវា ប្រព័ន្ធអេកូឡូស៊ីសហគ្រិនភាពមានគោលដៅផ្តល់ភាពអង់អាច និងជំរុញទឹកចិត្តសហគ្រិនជំនាន់ថ្មីរបស់កម្ពុជា ដោយផ្តល់ឱកាស កសាងបណ្តាញធុរកិច្ច ចែករំលែកចំណេះដឹង ដាក់តាំងបង្ហាញផលិតផល និងសេវាកម្មដែលកើតចេញពីនវានុវត្តន៍ និងគំនិតច្នៃ ប្រឌិតរបស់សហគ្រិន»។
សូមជម្រាបថា គិតមកត្រឹមឆ្នាំ២០២៤ សហគ្រិនខ្មែរ បានចូលរួមយ៉ាង សកម្មក្នុងការអភិវឌ្ឍប្រព័ន្ធអេកូឡូស៊ីសហគ្រិនភាព ដោយបានអនុវត្ត កម្មវិធីចំនួន៣៧៩, ប្រើប្រាស់ថវិកាសរុបប្រមាណ១៥លានដុល្លារ, និងទាក់ទាញថវិកាពីដៃគូសរុបប្រមាណ២៥លានដុល្លារ។ អ្នកទទួលផលដោយផ្ទាល់ពីកម្មវិធីមានចំនួន ប្រមាណ៥,៧ម៉ឺននាក់ និងអ្នកទទួលបានថវិកាគាំទ្រមានចំនួនប្រមាណ៧៧០នាក់ រួមមានសិស្សថ្នាក់វិទ្យាល័យ និស្សិតថ្នាក់សាកលវិទ្យាល័យ ធុរកិច្ចថ្មី និងសហគ្រាសធុនមីក្រូ តូច និងមធ្យមនៅទូទាំងប្រទេស។ ទន្ទឹម នឹងនេះ សហគ្រិនខ្មែរបានផ្តល់ថវិកាគាំទ្រសរុបប្រមាណ ៣លានដុល្លារ និងទាក់ទាញថវិកាពីវិស័យឯកជនក្នុងទម្រង់ជាឥណ ទានប្រមាណ ១២លានដុល្លារ និងក្នុងទម្រង់ជាការវិនិយោគ ប្រមាណ ២៥លាន ដុល្លារ។
