សម្តេចធិបតី ហ៊ុន ម៉ាណែត ប្រាប់ដល់ក្រុមប្រឆាំង កុំយកបូរណភាពទឹកដី ទៅបង្កបញ្ហាធំនាំឱ្យប៉ះពាល់ដល់ឧត្តមប្រយោជន៍ជាតិ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា អ្នកនយោបាយដែលគិតពីផលប្រយោជន៍ជាតិ ត្រូវគិតពីអ្វីដែលបានធ្វើកុំឱ្យប៉ះពាល់ដល់ផលប្រយោជន៍ជាតិ ពីព្រោះការស្រលាញ់ជាតិ ដូចតែគ្នាទេ។

ក្នុងឱកាសអញ្ជើញបិទសន្និបាតបូកសរុបលទ្ធផលការងារឆ្នាំ២០២៣ និងឆ្នាំ២០២៤ និងទិសដៅការងារឆ្នាំ២០២៥ របស់ក្រសួងរ៉ែ និងថាមពល នៅថ្ងៃទី២១ ខែវិច្ឆិកា ឆ្នាំ២០២៤ សម្តេចធិបតី ហ៊ុន ម៉ាណែត បានថ្លែងប្រាប់ក្រុមប្រឆាំងជ្រុលនិយម កុំយកបញ្ហាបូរណភាពទឹកដីប្រែក្លាយទៅជារឿងផ្សេង ដោយបន្ថែមទៅជារសជាតិ ដាក់ម្ទេស ដាក់ម្រេច ដាក់អំបិល ដើម្បីក្លាយទៅជារឿងថ្មី ធ្វើឱ្យមានការយល់ច្រឡំ ប៉ះពាល់ដល់ទំនាក់ទំនងរវាងប្រទេស និងប្រទេស ដោយគ្មានហេតុផល។

សម្តេចបានគូសរំលចថា ការដោះស្រាយបញ្ហាតំបន់ព្រំដែនកម្ពុជា-ថៃ គឺយន្តការប្រទេសទាំងពីរឯកភាពគ្នា និងបន្តចរចាតំបន់ព្រំដែនទឹក ដោយឡែកព្រំដែនគោកកម្ពុជា និងថៃ បានបោះបង្គោល ៤២ ដើម្បីកំណត់ឯកភាពគ្នា។

សម្តេចធិបតី បានសង្កត់ធ្ងន់ថា ព្រំដែនឯកភាពគ្នាហើយ បានបើកច្រកសេដ្ឋកិច្ចនៃប្រទេសទាំងពីរ ចំណែកព្រំដែនសមុទ្រ គឺបន្តចរចាគ្នាទៀត ពីព្រោះផលសេដ្ឋកិច្ចអាចជជែកគ្នាបានដោយមិនប៉ះពាល់ដល់សេដ្ឋកិច្ចជាតិ ៕