កាកបាទក្រហមកម្ពុជា រៀបចំយុទ្ធនាការសុវត្ថិភាពចរាចរណ៍ស្តីពី “យុវជនការលើកកម្ពស់សុវត្ថិភាពចរាចរណ៍ផ្លូវគោកក្នុងសន្តិភាព”
ភ្នំពេញ៖ ដើម្បីទប់ស្កាត់គ្រោះថ្នាក់ចរាចរណ៍ ជាពិសេសក្នុងឱកាសព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ដែលនឹងឈានមកដល់នាពេលខាងមុខនេះ នៅព្រឹកថ្ងៃទី១២ ខែវិច្ឆិកា ឆ្នាំ២០២៤ កាកបាទក្រហមកម្ពុជាទីស្នាក់ការកណ្តាល បានរៀបចំយុទ្ធនាការសុវត្ថិភាពចរាចរណ៍ស្តីពី “យុវជនការលើកកម្ពស់សុវត្ថិភាពចរាចរណ៍ផ្លូវគោកក្នុងសន្តិភាព” ក្រោមអធិបតីភាព លោកជំទាវ ពុំ ចន្ទីនី អគ្គលេខាធិការ, លោកជំទាវ ម៉ែន នារីសោភ័គ្គ អគ្គលេខាធិការរងទី១កាកបាទក្រហមកម្ពុជា និង មានចូលរួមពីមន្ត្រីអគ្គស្នងការរាជធានីភ្នំពេញ ក្រុមប្រតិបត្តិថ្នាក់កណ្តាល អនុសាខាកាកបាទក្រហមកម្ពុជា ខណ្ឌសែនសុខ និងយុវជនកាកបាទក្រហមកម្ពុជាមកពី២៥សាកលវិទ្យាល័យ ក្នុងរាជធានីភ្នំពេញ។
យុទ្ធនាការនេះបានហែរដោយថ្មើជើងដោយថ្នាក់ដឹកនាំ និងយុវជនទាំងអស់ចំនួន១៩២នាក់ ចេញពីទីស្នាក់ការកណ្តាលកាកបាទក្រហមកម្ពុជា ទៅគោលដៅស្ពានអាកាស៧មករា ដើម្បីបន្តចែកខិតបណ្ណអប់រំផ្សព្វផ្សាយពីអត្ថប្រយោជន៍នៃការពាក់មួកសុវត្ថិភាពឱ្យបានត្រឹមត្រូវជូនប្រជពលរដ្ឋដែលធ្វើដំណើរឆ្លងកាត់ស្តុបស្ពានអាកាស៧មករា ក្នុងខណ្ឌសែនសុខ រាជធានីភ្នំពេញ។
ក្នុងឱកាសនោះដែរ លោកជំទាវអគ្គលេខាធិការ បានពាំនាំប្រសាសន៍ផ្តាំផ្ញើសួរសុខទុក្ខរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងថ្លែងអំណរគុណចំពោះការចូលរួមក្នុងយុទ្ធនាការនេះ។
លោកជំទាវអគ្គលេខាធិការ បន្តទៀតថា “ក្នុងនាមក្មួយៗយុវជនកាកបាទក្រហមកម្ពុជា សូមបន្តចូលរួមធ្វើសកម្មភាពមនុស្សធម៌ ដើម្បីក្លាយជាមូលធនមនុស្សប្រកបដោយភាពសកម្មនិងចូលរួមការងារសង្គមបានច្រើនឡើងៗថែមទៀត។ ទោះបីជាប្រទេសកម្ពុជាមានសន្តិភាពពេញលេញ មានស្ពាន ផ្លូវថ្នល់ល្អ ប៉ុន្តែគ្រោះថ្នាក់ចរាចរណ៍នៅតែបន្តឆក់យកអាយុជីវិតប្រជាពលរដ្ឋរបស់យើងស្លាប់និងរងបួសជាច្រើននាក់ ជារៀងរាល់ថ្ងៃ ដូច្នេះហើយសម្តេចកិត្តិព្រឹទ្ធបណ្ឌិតប្រធាន បានជំរុញលើកទឹកចិត្តឱ្យយុវជនកាកបាទក្រហមកម្ពុជា ធ្វើសកម្មភាពមិត្តអប់រំមិត្ត មិត្តជួយមិត្តក្នុងគ្រឹះស្ថានសិក្សារបស់ខ្លួន និងចុះអប់រំផ្សព្វផ្សាយ រំលឹក ដល់បងប្អូនប្រជាពលរដ្ឋរបស់យើងឱ្យចូលរួមគោរពច្បាប់ចរាចរណ៍ទាំងអស់គ្នាដើម្បីចូលរួមកាត់បន្ថយការគ្រោះថ្នាក់ចរាចរណ៍នៅកម្ពុជា។
ជាមួយគ្នានេះដែរក្នុងយុទ្ធនាការនេះ ក៏មានរៀបចំកម្មវិធីសួរ-ឆ្លើយយករង្វាន់មួកសុវត្ថិភាព និងរង្វាន់លើកទឹកចិត្តជាច្រើនរង្វាន់ ស្តីពី ច្បាប់ចរាចរណ៍ផ្លូវគោក ការផាកពិន័យ និងដកពិន្ទុលើបណ្ណបើកបរយានយន្តចំពោះអំពើល្មើសនឹងច្បាប់ចរាចរណ៍ផ្លូវគោក ជាមួយប្រជាពលរដ្ឋដែលបានរស់នៅ និងធ្វើដំណើរឆ្លងកាត់ទីតាំងស្តង់សំណួរ-ចម្លើយរបស់កាកបាទក្រហមកម្ពុជា នាព្រឹកមិញនេះ៕
