ភ្នំពេញ៖ នៅព្រឹកថ្ងៃទី៧ ខែវិច្ឆិកា ឆ្នាំ២០២៤ នៅសាលប្រជុំក្រុមប្រឹក្សាខេត្ត ឯកឧត្តម ហឿ សុីយ៉ែម ប្រធានក្រុមប្រឹក្សាខេត្ត និងឯកឧត្តម សួស សេរីសួស្តី អភិបាលរងខេត្ត តំណាងឯកឧត្តម វ៉ា ថន អភិបាលខេត្ត អញ្ជើញដឹកនាំកិច្ចប្រជុំសាមញ្ញលើកទី៦ អាណត្តិទី៤ របស់ក្រុមប្រឹក្សាខេត្ត។ ដោយមានការចូលរួមពីឯកឧត្តម សមាជិកក្រុមប្រឹក្សាខេត្ត ប្រធានក្រុមប្រឹក្សាក្រុងស្រុក ប្រធានមន្ទីរអង្គភាពជុំវិញខេត្ត នាយក នាយករងរដ្ឋបាលខេត្ត នាយកទីចាត់ការ ប្រធានអង្គភាព និងមន្ត្រីពាក់ព័ន្ធផងដែរ។
ឯកឧត្តម ហឿ ស៊ីយ៉ែម ប្រធានក្រុមប្រឹក្សាខេត្ត បានមានប្រសាសន៍កោតសរសើរ និងវាយតម្លៃខ្ពស់ចំពោះលោកគ្រូអ្នកគ្រូ ពិសេសក្មួយសិស្សានុសិស្ស ដែលទើបនឹងបញ្ចប់ការប្រឡងសញ្ញាបត្រមធ្យសិក្សាទុតិយភូមិ នាសម័យប្រឡងឆ្នាំសិក្សា២០២៣-២០២៤ ដោយទទួលបានលទ្ធផលល្អគួរជាទីមោទនៈ ចំពោះនិទ្ទេស A មានការកើនឡើង បើបៀបធៀបនឹងឆ្នាំ២០២៣ ដែលទាំងអស់នេះបានបញ្ជាក់ឱ្យឃើញ ពីការប្តេជ្ញាចិត្តរបស់លោកគ្រូអ្នកគ្រូ និងសិស្សានុសិស្ស ក្នុងការបង្រៀននិងរៀន ដែលបានរួមចំណែកលើកមុខមាត់ខេត្ត ជាពិសេសការលើកកម្ពស់នូវវិស័យអប់រំនៅកម្ពុជាផងដែរ និងសូមបន្តពង្រឹងការងារទាំងអស់នេះនៅឆ្នាំបន្តបន្ទាប់ទៀត។
ទន្ទឹមនឹងនោះដែរ ឯកឧត្តម ហឿ ស៊ីយ៉ែម ក៏បានស្នើរដល់ ១. មន្ទីរអប់រំ សូមចុះពិនិត្យទីតាំងអន្ទេវាសិកដ្ឋាន នៅតាមសាលាមួយចំនួនដែលទទួលបាន និងបានទុកចោល សូមធ្វើការបោសសម្អាតជាប្រចាំ និងថែទាំរក្សាកែលម្អសោភ័ណ្ឌភាព ដើម្បីប្រយោជន៍យូរអង្វែងដល់ក្មួយសិស្សានុសិស្ស ២. ជំរុញលើកទឹកចិត្តឱ្យមន្រ្តីសុខាភិបាល បន្តពង្រឹងនិងពង្រីកចំណេះដឹង ជំនាញបន្ថែម លើវិជ្ជាជីវៈរបស់ខ្លួន ដើម្បីលើកម្ពស់វិស័យសុខាភិបាល ប្រកបដោយគុណភាព ស្របតាមឌីជីថល ៣. ការងារទេសចរណ៍ខេត្ត សូមចុះពិនិត្យសណ្តាប់ធ្នាប់តាមរមណីយដ្ឋាន និងរក្សានូវគុណភាពវប្បធម៌ផលិតផលសហគមន៍ ដើម្បីជាការប្រគួតប្រជែង និងពង្រីកការផ្សព្វផ្សាយ ៤. មន្ទីរធម្មការ និងសាសនា ចុះពិនិត្យពិភាក្សាកែសម្រួល និងសម្អាតសោភណ្ឌភាពបរិស្ថានជាប្រចាំ នៅគ្រប់ទីអារាម ដើម្បីជាភាពទាក់ទាញដល់ប្រជាពុទ្ធបរិស័ទ។
ឯកឧត្តមបន្តថា តាមការព្យាករណ៍របស់ក្រសួង និងមន្ទីរធនធានទឹក និងឧតុនិយមខេត្ត កម្ពុជាក៏ដូចជានៅខេត្តក្រចេះ នៅទទួលរងសម្ពាធខ្យល់ព្យុះចំនួន៣ទៀត ដូច្នេះសូមពង្រីកការផ្សព្វផ្សាយឱ្យបានទំលាយ ដល់បងប្អូនប្រជាពលរដ្ឋមូលដ្ឋាន ដើម្បីមានការប្រុងប្រយ័ត្នលើសុខភាព និងការងាររបរប្រចាំថ្ងៃ៕
