អាជីវករផ្សារបឹងឈូកប្រមាណជិត១០០នាក់ បាននាំគ្នាធ្វើការប្រមូលផ្តុំនៅខាងមុខផ្សារ ទាមទារស្នើសុំអាជ្ញាធរចូលក្នុងផ្សារពិនិត្យតូបលក់ដូរ និងរកដំណោះស្រាយ ក្រោយមានអគ្គីភ័យឆាបឆេះតូប
ភ្នំពេញ៖ អាជីវករម្នាក់ដែលបានប្រមូលផ្តុំគ្នាបានលើកឡើងថា លោកមកថ្ងៃនេះ គឺគោលបំណងដើម្បីស្នើសុំទៅដល់អាជ្ញាធរឱ្យលោកចូលផ្សារទៅពិនិត្យមើលសម្ភារនានា នៅក្នុងតូប ដែលបានរងការខូចខាត ឬសេសសល់។
លោកបញ្ជាក់ថា៖«ខ្ញុំមកនេះគោលបំណងគឺចង់មកពិនិត្យស្ថានភាពក្នុងផ្សារ ព្រោះអីវ៉ាន់មួយចំនួននៅជាន់ក្រោមមិនទាន់យកអស់ទេ ប៉ុន្តែលិចទឹក ប៉ុន្តែជាបញ្ហាតូចតាចទេហ្នឹង បញ្ហាធំតូបខាងលើឃើញឆេះអស់»។ មួយវិញទៀត គឺចង់រកដំណោះស្រាយក្រោយការខាតបង់ ពិសេសលោកចង់ស្នើសុំមេធាវីរបស់សម្តេចឱ្យចុះមកជួយលោក និងអាជីវករផ្សេងទៀត។
លោកថា៖«អ៊ីចឹងខ្ញុំត្រូវរកមេធាវីសម្តេច មកជួយពួកខ្ញុំ ដើម្បីឱ្យពួកខ្ញុំនេះទទួលបាននូវអ្វី ក្រោយពីសភាពការ ដែលវាបានស្រាកស្រាន្ដហើយ នេះកុំឱ្យមានការខាតលើខាតតទៅទៀត។ វាជាគោលបំណងរបស់ខ្ញុំជាអាជីវករ»។
អភិបាលក្រុងបាត់ដំបង លោក លាង វាសនា នៅព្រឹកថ្ងៃអង្គារទី៥ ដូចគ្នានេះ បានប្រាប់ទៅអាជីវករផ្សារបឹងឈូកទាំងអស់ឱ្យស្ងប់អារម្មណ៍សិន ខណៈគណៈកម្មការថ្នាក់ជាតិ និងថ្នាក់ខេត្ត កំពុងរកដំណោះស្រាយ និងធ្វើការប្រជុំពិនិត្យជាក់ស្តែង វាយតម្លៃអំពីទំហំនៃការខូចខាតនៃសំណង់ផ្សារដែលទទួលរងការឆាបឆេះកាលពីកន្លងទៅ ដើម្បីបង្ការគ្រោះថ្នាក់ជាយថាហេតុណាមួយ។
អគ្គិភ័យ បានឆាបឆេះផ្សារបឹងឈូកជាន់ទី២ កាលពី ថ្ងៃទី ៣ ខែ វិច្ឆិកា ឆ្នាំ ២០២៤ វេលា ម៉ោង ប្រមាណ១០:៣០ នាទី យប់ ស្ថិតក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ។
លោកលាង វាសនាបន្តថា ក្រោយមានអគ្គិភ័យឆាបឆេះ ជាលទ្ធផលក្នុងការចុះពិនិត្យ និងវាយតម្លៃជាបឋមឃើញមានការខូចខាតតូបនៅជាន់ទី២ ចំនួន១៣៩តូប ក្នុងចំណោមតូបចំនួន១៤៨ ភាគច្រើនជាតូបលក់ក្រណាត់វាំងនន កម្រាលពូក ខណៈតូបចំនួន៣ទៀត នៅមិនទាន់អាចបើកបាន ដោយសារស្ថានភាពនៅជាន់ទី១ នៅមានសភាពគ្រោះថ្នាក់ ប្រេះស្រាំសរសៃដែក និងបេតុងដែលនូវរងកម្តៅខ្លាំងងាយនឹងបង្កគ្រោះថ្នាក់ជាយថាហេតុ។ រីឯ តូបលក់ដូរផ្នែកជាន់ផ្ទាល់ដី មានចំនួន២៨៤តូប មិនមានផលប៉ះពាល់ដោយសារអគ្គិភ័យឡើយ។ យ៉ាងណា លោកថា ចំពោះឧបទ្ទេវហេតុនៃការឆេះនេះនៅមិនទាន់ដឹងនៅឡើយ ក្រុមការងារកំពុងស្រាវជ្រាវលម្អិត អំពីមូលហេតុដែលបណ្តាលឱ្យឆេះផ្សារមួយនេះឡើង៕
