អាវរងាអំណោយដ៏ថ្លៃថ្លារបស់ សម្តេចតេជោនិងសម្តេចកិត្តិព្រឹទ្ធបណ្ឌិត, សម្តេចធិបតី និងលោកជំទាវបណ្ឌិត បើកចែកជូន យោធិន ទូទាំងតំបន់ប្រតិបត្តិការសឹករងឧត្តរមានជ័យ
ភ្នំពេញ៖ លោកឧត្តមសេនីយ៍ទោ តន់ ញាន មេបញ្ជាការ តំបន់ប្រតិបត្តិការសឹករងឧត្តរមានជ័យ នាថ្ងៃទី១ ខែវិច្ឆិកា ឆ្នាំ២០២៤ បានអញ្ជើញជាអធិបតីក្នុងពិធីបើកចែក អាវរងាជាអំណោយដ៏ថ្លៃថ្លារបស់ សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន, សម្តេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ជូនដល់ នាយ-ពលទាហាន ទូទាំងតំបន់ប្រតិបត្តិការសឹករងឧត្តរមានជ័យ។
ថ្លែងក្នុងឱកាសនោះដែរ លោកមេបញ្ជាការ មានប្រសាសន៍លើកឡើងថា ជារៀងរាល់ឆ្នាំ កងទ័ព តែងតែទទួលបាននូវអំណោយឧបត្ថម្ភជា អាវភ្លៀង អាវរងា សម្ភារៈប្រើប្រាស់ និងថវិកាជាដើម បន្ថែមលើគោលរបបដែលទទួលបាន ពីសំណាក់សម្តេចទាំងទ្វេ ក៏ដូចជាប្រមុខរាជរដ្ឋាភិបាល នីតិកាលទី៧ ដែលដឹកនាំដោយ សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលសកម្មភាពទាំងនេះបានឆ្លុះបញ្ចាំងឱ្យឃើញនូវ ការយកចិត្តទុកដាក់គិតគូរយ៉ាងខ្លាំងពីសុខទុក្ខ សុខមាលភាព និងជីវភាពរស់នៅរបស់ កងទ័ព និងគ្រួសារកងទ័ព ដែលបានលះបង់គ្រប់បែបយ៉ាង ដើម្បីការពារថែរក្សាសុខសន្តិភាព ស្ថិរភាពសង្គម និងសណ្តាប់ធ្នាប់សាធារណៈជូនប្រទេសជាតិ និងប្រជាជន ។
លោកមេបញ្ជាការ ក៏បានក្រើនរំលឹកថា ក្នុងនាមជាកងទ័ព ត្រូវគោរពវិន័យ បទបញ្ជា ជៀសឱ្យឆ្ងាយពីគ្រឿងញៀន និងស្មោះត្រង់ដាច់ខាតចំពោះ ជាតិ សាសនា ព្រះមហាក្សត្រ ការពាររាជរដ្ឋាភិបាលស្របច្បាប់ គាំទ្រដល់ការអនុវត្តកម្មវិធីគោលនយោបាយ និងកិច្ចការងារកំណែទម្រង់របស់រាជរដ្ឋាភិបាល ឱ្យទទួលបានលទ្ធផលល្អប្រសើរ។
មេបញ្ជាការ មេបញ្ជាការរង នាយទាហាន នាយទាហានរង និងពលទាហាន ទូទាំងតំបន់ប្រតិបត្តិការសឹករងឧត្តរមានជ័យ សូមគោរពសម្តែងនូវការគុណយ៉ាងជ្រាលជ្រៅ និងសូមបួងសួងដល់គុណបុណ្យព្រះរតនត្រ័យ វត្ថុស័ក្តិសិទ្ធិទាំងឡាយក្នុងលោក សូមជួយប្រោះព្រំសព្ទសាធុការ សិរីសួស្តី ជ័យមង្គល វិបុលសុខ បវរមហាប្រសើរ ជូនចំពោះ សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត, សម្តេចធិបតី ហ៊ុន ម៉ាណែត និងលោកជំទាវបណ្ឌិត ព្រមទាំងបុត្រា បុត្រី សូមបានប្រកបដោយពុទ្ធពរទាំង បួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕
