មេបញ្ជាការរងយោធភូមិភាគទី៥ អញ្ជើញចុះត្រួតពិនិត្យ ការបាញ់គ្រាប់ពិតរបស់សិក្ខាកាមវគ្គហ្វឹកហ្វឺនបំប៉នពង្រឹងវរសេនាតូចលេខ៥២១ កងពលតូចថ្មើរជើងលេខ៥២

ភ្នំពេញ៖ ឧត្តមសេនីយ៍ទោ ច័ន្ទ រដ្ឋា មេបញ្ជាការរង តំណាងដ៏ខ្ពង់ខ្ពស់ ឯកឧត្តម មេបញ្ជាការរងកងទ័ពជើងគោក មេបញ្ជាការយោធភូមិភាគី៥ នាថ្ងៃទី៣០ ខែតុលា ឆ្នាំ២០២៤ បានអញ្ជើញចុះត្រួតពិនិត្យ ការបាញ់គ្រាប់ពិត ប្រភេទអាវុធAK47 និងអាវុធPKM របស់សិក្ខាកាមវគ្គហ្វឹកហ្វឺនបំប៉នពង្រឹងវរសេនាតូចលេខ៥២១ កងពលតូចថ្មើរជើងលេខ៥២ នៅទីលានភ្នំវាលចាប ស្ថិតក្នុងភូមិសាស្ត្រ ភូមិភ្ជាវ ឃុំត្រែង ស្រុករតនមណ្ឌល ខេត្តបាត់ដំបង។

ឧត្តមសេនីយ៍ទោ ច័ន្ទ រដ្ឋា បានធ្វើការកោតសរសើរ ដល់សិក្ខាកាមទាំងអស់ដែលខិតខំប្រឹងប្រែងសិក្សារៀនសូត្រ រហូតទទួលលទ្ធផលល្អក្នុងការហ្វឹកហ្វឺនបាញ់គ្រាប់ពិតនាពេលនេះ និងបានធ្វើការផ្ដាំផ្ញើឲ្យសិក្ខាកាមទាំងអស់បន្តយកចិត្តទុកដាក់សិក្សារៀនសូត្រ ពីយោធាចារ្យបន្ថែមទៀតដើម្បីយកចំណេះដឹងដែលទទួលបានពីសាលាទៅបម្រើអង្គភាព និងមាតុភូមិ។

សូមបញ្ជាក់ថា វគ្គហ្វឹកហ្វឺននេះមានសិក្ខាកាម ចំនួន ៨០នាក់ ហ្វឹកហ្វឺនរយៈពេល ៣ខែ ហើយលំហាត់បាញ់គ្រាប់ពិតនាពេលនេះ ត្រូវបានអនុវត្តបាញ់តាម៣កាយវិការគឺ កាយវិការក្រាបបាញ់ កាយវិការលុតជង្គង់បាញ់ និងកាយវិការឈរបាញ់។ ក្រោយពេលបញ្ចប់លទ្ធផលទទួលបានរួមមាន៖ ចំណាត់ថ្នាក់ល្អ ចំនួន ១៥នាក់ ចំណាត់ថ្នាក់បង្គួរ មានចំនួន ២៥នាក់ និងចំណាត់ថ្នាក់មធ្យម មានចំនួន ៤០នាក់ ៕