រដ្ឋមន្រ្តីក្រសួងវប្បធម៌៖ ប្រវត្តិសាស្រ្តកត់ត្រា «អ្នកមានស្នាដៃ» មិនមែនអ្នកមានទ្រព្យច្រើនជាងគេទេ

ភ្នំពេញ៖ លោកជំទាវ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ ជំរុញឱ្យប្រជាជនខ្មែរចូលរួមក្នុងសកម្មភាពណាដែលមានប្រយោជន៍ដល់សង្គមជាតិ និងមានតម្លៃសម្រាប់ក្មេងៗជំនាន់ក្រោយ។ ចំពោះលោកជំទាវ អ្វីដែលបន្សល់ទុកជាកេរមរតកសម្រាប់អ្នកជំនាន់ក្រោយ មានតម្លៃជាងទ្រព្យសម្បត្តិទៅទៀត ពីព្រោះថា អ្នកបន្សល់កេរមរតកសម្រាប់អ្នកជំនាន់ក្រោយ ក៏បន្សល់កេរ្តិ៍ឈ្មោះខ្លួនឯងក្នុងប្រវត្តិសាស្រ្តផងដែរ ទោះបីបាត់បង់ជីវិតទៅហើយក៏ដោយ រីឯអ្នកមានទ្រព្យសម្បត្តិហូរហៀវិញ នឹងមិនជាប់ឈ្មោះក្នុងប្រវត្តិសាស្រ្តឡើយ ពេលបាត់បង់ជីវិត បើពុំបានបន្សល់ទុកកេរមរតសម្រាប់អ្នកជំនាន់ក្រោយ។

ធ្វើជាអធិបតីតំណាងឱ្យសម្តេចនាយករដ្ឋមន្រ្តី ហ៊ុន ម៉ាណែត ក្នុងពិធីបើកព្រឹត្តិការណ៍ស្នាមញញឹមកម្ពុជា នៅតំបន់រមណីយដ្ឋានអង្គរ នាថ្ងៃទី២៩ ខែតុលា ឆ្នាំ២០២៤នេះ លោកជំទាវ ភឿង សកុណា ផ្តល់ជាគតិយ៉ាងដូច្នេះថា «ក្នុងប្រវត្តិសាស្រ្ត យើងអត់ដែលកត់ត្រា អ្នកនេះមានទ្រព្យសម្បត្តិច្រើនជាងគេ ឬអ្នកនេះ ក្រជាងគេ ក្នុងសម័យអង្គរ យើងរកអត់ឃើញទេ តែយើងរកឃើញស្នាដៃព្រះមហាក្សត្រ [ស្នាដៃ]របស់កវីអ្នកនិពន្ធខ្មែរ អ្នកដែលទុកស្នាដៃឱ្យក្មេងៗជំនាន់ក្រោយ ឈ្មោះនេះអត់បាត់ទៅវិញទេ»។ ពិធីបើកព្រឹត្តិការណ៍ស្នាមញញឹមកម្ពុជា ត្រូវបានរៀបចំឡើងដើម្បីអបអរសាទរខួប២០ឆ្នាំនៃការយាងឡើងគ្រងព្រះបរមសិរីរាជសម្បត្តិរបស់ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រកម្ពុជា។

លោកជំទាវរដ្ឋមន្រ្តីវប្បធម៌បន្តថា ក្នុងសម័យមុនៗ ដូចជា សម័យអង្គរ សម័យលង្វែក សម័យឧត្តុង្គ និងសម័យចតុមុខ ជាដើម មិនខ្វះសេដ្ឋី អ្នកមាន អ្នកក្រនោះទេ តែអ្នកទាំងនោះ បានរលត់ជីវិតអស់ហើយ ហើយអ្វីដែលអាចនៅសល់ក្នុងប្រវត្តិសាស្រ្ត គឺមានតែស្នាដៃប៉ុណ្ណោះ។ លោកជំទាវ សរុបសេចក្តីថា អ្វីដែលនៅក្រៅខ្លួន ដែលមិនបានផ្តល់ប្រយោជន៍ឱ្យសង្គមជាតិ នឹងត្រូវបាត់ទៅវិញ ប៉ុន្តែអ្វីដែលផ្តល់ប្រយោជន៍ឱ្យសង្គមជាតិ [នឹងមិនសាបសូន្យឡើយ]។ លោកជំទាវ លើកឧទាហរណ៍តូចមួយថា សូម្បីចំណេះអំពីការធ្វើនំបញ្ចុក និងការស្លសម្លកកូរ ក៏ផ្តល់ប្រយោជន៍ដល់ប្រជាជនដែរ ហើយលោកស្រីបំផុសស្មារតីឱ្យនាំគ្នាធ្វើសកម្មភាពដែលមានប្រយោជន៍បែបនេះ។ ជាមួយគ្នានេះ លោកជំទាវ ជំរុញឱ្យនាំគ្នាចូលរួមផ្សព្វផ្សាយអ្វីដែលជារបស់ខ្មែរ។