ឧបនាយករដ្ឋមន្ត្រី ហង់ជួន ណារ៉ុន ដឹកនាំកិច្ចប្រជុំស្តីពី ការអនុវត្តតេស្តស្តង់ដានៅថ្នាក់ទី៦

ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្រ្តីក្រសួងអប់រំ យុវជន និងកីឡា នាថ្ងៃទី១៦ ខែតុលា ឆ្នាំ២០២៤ បានដឹកនាំកិច្ចប្រជុំស្តីពី ការអនុវត្តតេស្តស្តង់ដានៅថ្នាក់ទី៦ ដោយមានការចូលរួមពីសំណាក់ ឯកឧត្តម លោកជំទាវ ថ្នាក់ដឹកនាំ និងមន្ត្រីពាក់ព័ន្ធក្រោមឱវាទ។

មុនឈានចូលដល់កិច្ចពិភាក្សា មន្ត្រីជំនាញបានរាយការណ៍ជូនអង្គប្រជុំអំពី របាយការណ៍លទ្ធផលនៃការប្រឡង និងកម្រិតលំបាកនៃតេស្តស្តង់ដាកន្លងមក ដោយគូសបញ្ជាក់ថាការអនុវត្តតេស្តរង្វាយតម្លៃនៅកម្រិតសាលារៀន គឺជាផ្នែកមួយដ៏សំខាន់ក្នុងការពង្រឹងគុណភាពអប់រំ នៅតាមគ្រឹះស្ថានសិក្សាអប់រំចំណេះទូទៅសាធារណៈ ឆ្លើយតបការអនុវត្តកម្មវិធីកំណែទម្រង់វិស័យអប់រំក្នុងការពង្រឹងប្រសិទ្ធភាពនៃការអនុវត្តស្តង់ដាសាលារៀនគំរូ។

ដើម្បីឱ្យការអនុវត្តតេស្តរង្វាយតម្លៃនៅកម្រិតសាលារៀនបានហ្មត់ចត់ និងត្រឹមត្រូវ ព្រមទាំងធានាបាននូវសង្គតិភាពជាមួយនឹងការអនុវត្តតេស្តរង្វាយតម្លៃលទ្ធផលសិក្សារបស់សិស្សថ្នាក់ជាតិ តំបន់ និងអន្តរជាតិ ក្រសួងអប់រំ យុវជន និងកីឡា បានធ្វើការណែនាំដល់មន្ទីរអប់រំ យុវជន និងកីឡារាជធានី ខេត្ត ការិយាល័យអប់រំ យុវជន និងកីឡានៃរដ្ឋបាលក្រុង ស្រុក ខណ្ឌ និងគ្រឹះស្ថាន សិក្សាចំណេះទូទៅសាធារណៈគ្រប់កម្រិតទាំងអស់ នូវយន្តការបច្ចេកទេស ៖ (១). យន្តការរៀបចំវិញ្ញាសាតេស្ត (២). យន្តការគ្រប់គ្រងដំណើរការតេស្ត (៣). ការប្រើប្រាស់លទ្ធផលតេស្ត (៤). ភារកិច្ច និងការទទួលខុសត្រូវរបស់ គណៈគ្រប់គ្រងសាលារៀន គ្រូបង្រៀន (៥). វិធានការកែលម្អការសិក្សារបស់សិស្ស (៦). ការអនុវត្តតេស្តស្តង់ដា៖ តេស្តស្តង់ដាប្រចាំខែ ត្រីមាស និងឆមាស តេស្តស្តង់ដាល្បឿនអំណាន និងគណិតវិទ្យា តេស្តស្តង់ដានៅដំណាច់កម្រិតបឋមសិក្សា។

ក្នុងឱកាសនេះដែរ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានផ្តល់អនុសាសន៍ ឱ្យក្រុមការងារបន្តយកចិត្តទុកដាក់អនុវត្តការងារតាមផែនការដែលគ្រោងទុក ដោយត្រូវមានការវាយតម្លៃជាប្រចាំ ផ្តោតលើការសិក្សាច្បាស់លាស់ បន្តវិភាគទិន្នន័យលទ្ធផលតេស្តដើម្បីកំណត់បញ្ហាឈានទៅរកដំណោះស្រាយប្រកបដោយប្រសិទ្ធភាពខ្ពស់ និងត្រូវចាត់វិធានឱ្យតាមសាលាចាប់ផ្តើមបំប៉នសិស្សរៀនខ្សោយដើម្បីអាចឡើងថ្នាក់ ទន្ទឹមនឹងនេះក៏ត្រូវមានវិធានការលើកទឹកចិត្តមាតាបិតា អ្នកអាណាព្យាបាលសិស្ស ក៏ដូចជាលោកគ្រូ អ្នកគ្រូ ប្រឹងប្រែងជំរុញសិស្សឱ្យរៀនបន្ថែមដោយខ្លួនឯងផងដែរ ហើយការរៀនបំប៉ននេះគឺជាយុទ្ធសាស្ត្រមួយក្នុងការឈានទៅរកការរៀនពេញមួយថ្ងៃ៕