វៀតណាម កោតសរសើរ និងវាយតម្លៃខ្ពស់ចំពោះសមិទ្ធផលដែលមានការរីកចម្រើនយ៉ាងឆាប់រហ័សក្នុងខេត្តស្ទឹងត្រែង

ភ្នំពេញ៖ នៅរសៀលថ្ងៃអង្គារ៍ ទី១៥ ខែតុលា ឆ្នាំ២០២៤ ឯកឧត្តម សរ សុពុត្រា អភិបាលនៃគណៈអភិបាលខេត្តស្ទឹងត្រែង បានទទួលជួបសម្តែងការគួសម និងពិភាក្សាការងារជាមួយ គណៈប្រតិភូជាន់ខ្ពស់នៃក្រុមប្រឹក្សាប្រជាជនខេត្តកន្ទូម ដឹកនាំដោយ ឯកឧត្តម យឿង វ៉ាន់ចាង សមាជិក គណៈកម្មាធិការមជ្ឈិមបក្សកុម្មុយនិស្តវៀតណាម លេខាគណៈកម្មាធិការបក្សខេត្ត និងជាប្រធានក្រុមប្រឹក្សាប្រជាជនខេត្ត និងសមាជិកចំនួន ២២រូប មកបំពេញទស្សនកិច្ចជាមិត្តភាព ដើម្បីផ្លាស់ប្តូរបទពិសោធន៍ការងាររបស់ក្រុមប្រឹក្សា ប្រជាជនក្នុងខេត្តរតនគិរី និងស្ទឹងត្រែង នៃព្រះរាជាណាចក្រកម្ពុជា។

ក្នុងឱកាសនៃជំនួប ឯកឧត្តមប្រធានគណៈប្រតិភូ បានលើកឡើងថា ខេត្តកន្ទូម របស់លោកតែងតែមានទំនាក់ទំនងល្អ និងកិច្ចសហប្រតិបត្តិការជាមួយនឹងខេត្តស្ទឹងត្រែង នៃព្រះរាជាណាចក្រកម្ពុជា ជាយូរមកហើយ។ ហើយសម្រាប់ថ្ងៃនេះផងដែរ លោកបានដឹកនាំគណៈប្រតិភូគឺដើម្បីមកបំពេញទស្សនកិច្ចសិក្សាក៏ឆ្លៀតជួបសំដែងការគួរសម និងមានមតិសំណេះសំណាល ហើយក៏បានកោតសរសើរ និងវាយតម្លៃខ្ពស់ចំពោះសមិទ្ធផលដែលមានការរីកចម្រើនយ៉ាងឆាប់រហ័សក្នុងខេត្តស្ទឹងត្រែងផងដែរ ជាពិសេសខេត្តស្ទឹងត្រែងមានវារីអគ្គិសនីទំហំធំដែលអាចផលិតអគ្គិសនីបានយ៉ាងច្រើន និងមានសមិទ្ធផលធំៗជាច្រើនទៀតដែលជាការរីកចម្រើនគួរអោយកត់សំគាល់។

ក្នុងឱកាសនោះដែរ ឯកឧត្តម សរ សុពុត្រា បានមានប្រសាសថា ការជួបសម្តែងការគួសមនេះបង្ហាញឲ្យឃើញអំពីចំណងសាមគ្គីភាពគ្នាដែលបានបន្សល់ទុកតាំងពីដំណាក់កាលថ្នាក់ដឹកនាំជំនាន់មុនរបស់យើងរហូតមកដល់បច្ចុប្បន្ន។ ហើយស្មារតីជាបងប្អូននៃប្រទេសទាំងពីរ និងខេត្តទាំងពីរ យើងនៅតែមានភាពជឿជាក់ថាគ្មានអនុភាពប្រតិកិរិយាណាដែលអាចមកបំបែកបានទេ ដរាបណាពួកយើងរួបរួមនឹងសាមគ្គីភាពគ្នាល្អ នឹងយោងទៅលើស្មារតីជាបងប្អូននេះហើយដែលធ្វើឲ្យប្រទេសរបស់យើងតែងតែជួយជ្រុំជ្រែងគ្នាទាំងលើវេទិកាអន្តរជាតិនិងវេទិកាតំបន់ក៏ដូចជាការជួយគ្នាគ្រប់កាលៈទេសៈនិងគ្រប់ស្ថានភាព។

ឯកឧត្តមអភិបាលខេត្តស្ទឹងត្រែង បានបន្តថា ភាគីកម្ពុជាយើងខ្ញុំតែងតែដឹងគុណនិងមិនដែលបំភ្លេចនូវគុណឧបក្ការៈ បក្ស រដ្ឋ ប្រជាជន កងទ័ពស្ម័គ្រចិត្តវៀតណាមដែលបានលះបង់សាច់ស្រស់ឈាមស្រស់នៅដំណាក់កាលដែលប្រទេសយើងខ្ញុំធ្លាក់ក្នុងដំណាក់កាល វិបត្តិនៃសង្គ្រាមផ្ទៃក្នុង។

ជាចុងក្រោយនៃជំនួបរវាងគណៈប្រតិភូជាន់ខ្ពស់ខេត្តកន្ទូម នៃសាធារណរដ្ឋសង្គមនិយមវៀតណាម និងថ្នាក់ដឹកនាំខេត្តស្ទឹងត្រែង ក៏បានផ្តល់នូវវត្ថុអនុស្សាវរីយ៍ជូនគ្នាទៅវិញទៅមក ជាចំណងដៃបង្ហាញពីមិត្តភាព និងកិច្ចសហប្រតិបត្តិការយូអង្វែង និងសាមគ្គីភាពគ្នាផងដែរ ៕