គណៈកម្មការទី៨ នៃរដ្ឋសភា ចុះពិនិត្យស្វែងយល់លើការងារបណ្តុះបណ្តាលវិជ្ជាជីវៈ និងបច្ចេកទេស នៅមជ្ឈមណ្ឌលបណ្តុះបណ្តាលវិជ្ជាជីវ:ខេត្តមណ្ឌលគីរី

ភ្នំពេញ៖ ដោយមានការអនុញ្ញាតពីសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា គណៈប្រតិភូគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី នៃរដ្ឋសភា (គណៈកម្មការទី៨) ដឹកនាំដោយឯកឧត្តមបណ្ឌិត ឈុន ស៊ីរុន លេខាធិការគណៈកម្មការ បានអញ្ជើញចុះពិនិត្យស្វែងយល់ការបណ្តុះបណ្តាលវិជ្ជាជីវៈ និងបច្ចេកទេស នៅមជ្ឈមណ្ឌលបណ្តុះបណ្តាលវិជ្ជាជីវ:ខេត្តមណ្ឌលគីរី នាព្រឹកថ្ងៃទី១៤ ខែតុលា ឆ្នាំ២០២៤។

រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃ និងប្រកបដោយកិត្តិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បាននិងកំពុងយកចិត្តទុកដាក់យ៉ាងខ្លាំង លើវិស័យបណ្តុះបណ្តាលវិជ្ជាជីវៈ និងបច្ចេកទេសដល់យុវជនក្រីក្រ និងយុវជនគ្រួសារងាយរងហានិភ័យ ១,៥លាននាក់ ទទួលបានការបណ្តុះបណ្តាលមួយ ដែលមានលក្ខណៈច្បាស់លាស់ និងស្របតាមតម្រូវការទីផ្សារ ដែលធ្វើយ៉ាងណា រៀនឱ្យចប់ ឱ្យចេះ ឱ្យមានការងារធ្វើ ដើម្បីរួមចំណែកក្នុងការកាត់បន្ថយភាពក្រីក្រ លើកស្ទួយជីវភាពក្រុមគ្រយសារ ឱ្យមានការរីកចម្រើន ស្របតាមយុទ្ធសាស្រ្តបញ្ចកោណ ដំណាក់កាលទី១របស់រាជរដ្ឋាភិបាលនីតិកាលទី៧។

តាមសេចក្តីរាយការណ៍របស់លោក កោ គីម អាន នាយកមជ្ឈមណ្ឌលបណ្តុះបណ្តាលវិជ្ជាជីវ:ខេត្ត បានជម្រាបជូនគណ:ប្រតិភូថា មជ្ឈមណ្ឌលបានខិតខំធ្វើការផ្សព្វផ្សាយដល់ក្រុមគោលដៅ ដោយសហការជាមួយអាជ្ញាធរមូលដ្ឋាន ដែលក្នុងឆ្នាំ២០២៤ មានអ្នកចុះឈ្មោះចូលរៀនបានចំនួន២៤៩នាក់ ក្នុងនោះក្រុមគោលដៅ១,៥លាននាក់ចុះឈ្មោះបាន ១៨២នាក់ ទន្ទឹមនឹងនោះ ចំពោះការបណ្តុះបណ្តាលនេះ ឃើញថាជួបបញ្ហាប្រឈមមួយចំនួនផងដែរដូចជាខ្វះគ្រូបច្ចេកទេស ខ្វះកន្លែងស្នាក់នៅសម្រាប់គ្រូ និងសិស្ស ខ្វះសំភារៈបច្ចេកទេស និងប្រាក់ឧបត្ថម្ភនៅមានចំនួនតិច ដែលលំបាកក្នុងហូបចុក និងតម្រូវការគ្រួសារ ។ បច្ចុប្បន្ន មជ្ឈមណ្ឌលក៏បានខិតខំបន្តផ្សព្វផ្សាយដល់គ្រប់ក្រុមគោលដៅ ជំរុញកំណើនចុះឈ្មោះចូលរៀន ដើម្បីសម្រេចតាមផែនការ ជាពិសេស បង្កើនទំនាក់ទំនងភាពជាដៃគូរជាមួយវិស័យឯកជន និងអង្គការនានា ដើម្បីស្វែងរកប្រភពមូលធនផ្សេងៗគាំទ្រដល់យុវជន នៅក្នុងអំឡុងពេលរៀន និងក្រោយបញ្ចប់ការសិក្សា។

ឆ្លៀតក្នុងឱកាសនោះ ឯកឧត្តមបណ្ឌិត ឈុន ស៊ីរុន លេខាធិការគណៈកម្មការទី៨ នៃរដ្ឋសភា បានថ្លែងការកោតសរសើរ និងវាយតម្លៃខ្ពស់ ចំពោះការខិតខំរបស់មជ្ឈមណ្ឌល លោកគ្រូបង្គោលទាំងអស់ ដែលបានខិតខំប្រឹងប្រែងចុះផ្សព្វផ្សាយផង បណ្តុះបណ្តាលផង ធ្វើយ៉ាងណាឱ្យគោលនយោបាយបណ្តុះបណ្តាលដែលបានដាក់ចេញ ១,៥លាននាក់ ទទួលបានជោគ ជ័យ ស្របតាមយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលកម្ពុជា ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា៕