អគ្គនាយកធនាគារ ARDB និងសហព័ន្ធស្រូវអង្ករកម្ពុជា ចុះពិនិត្យតម្លៃស្រូវ លក់ឲ្យរោងម៉ាស៊ីន៣កន្លែង នៅស្រុកថ្មគោល

ភ្នំពេញ៖ នៅរសៀលថ្ងៃទី១០ ខែតុលានេះ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាល ទទួលបន្ទុកជាអគ្គនាយកធនាគារអភិវឌ្ឍន៍ជនបទនិងកសិកម្ម(ARDB) និងសហព័ន្ធស្រូវអង្ករកម្ពុជា បានអញ្ជើញចុះ ពិនិត្យតម្លៃស្រូវដែលរោងម៉ាស៊ីន ឡាយ សែ រោងម៉ាស៊ីន សៀ ហេង និង រោងម៉ាស៊ីនកិនស្រូវ ក្រុមហ៊ុនបៃតង របស់លោកឧកញ៉ា ភូ ពុយ ដែលបានប្រមូលទិញស្រូវពីកសិករស្ថិតនៅឃុំ គោកឃ្មុំ ស្រុកថ្មគោល ខេត្តបាត់ដំបង។

ការអញ្ជើញចុះពិនិត្យផ្ទាល់ពីតម្លៃស្រូវនៅតាមរោងម៉ាស៊ីនរបស់ ឯកឧត្តមបណ្ឌិត កៅ ថាច បានចាប់ផ្តើម កាលពីព្រឹកថ្ងៃទី ៩ខែតុលា រហូតដល់ថ្ងៃទី១០តុលា ឆ្នាំ២០២៤ តាមបណ្តោយបឹងទន្លេសាប ក្នុងនោះមាននៅខេត្តកំពង់ចាម កំពង់ធំ បាត់ដំបង បន្ទាយមានជ័យ ស្របពេលដែលកសិករកំពុង តែជិតបង្ហើយដៃនៃការប្រមូលផលស្រូវ OM 5451 ស្រូវស្រង៉ែ ស្រូវសែនក្រអូប។

តម្លៃស្រូវជាក់ស្តែងនៅក្នុងខេត្តបាត់ដំបង ដែលរោងម៉ាស៊ីនចំនួន៣ កំពុងតែទិញ គឺតម្លៃ ស្រូវ សែនក្រអូប ទិញ ១៣១០រៀល និងស្រូវស្រង៉ែ តម្លៃ ១០៧០ រៀល ក្នុង១គីឡូក្រាម។

បន្ទាប់ពីបញ្ចប់ការចុះពិនិត្យមើលតម្លៃតាមបណ្តារោងម៉ាស៊ីនរួច ឯកឧត្តមបណ្ឌិត កៅ ថាច និងសហការី ក៏បានដឹកនាំកិច្ចប្រជុំពិភាក្សារការងារ រវាងធនាគារអភិវឌ្ឍន៍ជនបទ និងកសិកម្ម ជាមួយ ម្ចាស់រោងម៉ាស៊ីនកិនស្រូវក្នុងតំបន់រួមមាន បាត់ដំបង បន្ទាយមានជ័យ ពោធិ៍សាត់ និងតំណាងខាងសហព័ន្ធស្រូវអង្ករកម្ពុជា (CRF)។

នៅក្នុងកិច្ចប្រជុំនោះដែរ គឺបានពិភាក្សាអំពីតំលៃស្រូវ ការទិញស្រូវពីកសិករក្នុងតំលៃតាមទីផ្សារ និងដែលកសិករអាចទទួលយកបាន ការបន្តឥណទាន និងការទំលាក់ឥណទានរបស់ ARDB សម្រាប់ការទិញស្រូវ ក្នុងអត្រាការប្រាក់ទាបដល់វិស័យស្រូវអង្ករ។

ឯកឧត្តមបណ្ឌិត កៅ ថាច ក៏បានវាយតម្លៃដែរថា មួយរយៈចុងក្រោយនេះ វិស័យស្រូវអង្ករកម្ពុជាយើងមិនមានអ្វីប៉ះពាល់នោះទេ គឺការសំខាន់ការផលិតរបស់កសិករឲ្យបានច្រើន កុំឲ្យខ្វះ និងតម្លៃចុះថោក ហើយការនាំចេញទៅប្រទេសថៃក៏មានបរិមាណច្រើនដែរ ប៉ុន្តែត្រូវគិតអំពី សន្តិសុខស្បៀងរបស់យើងកុំឲ្យអស់ស្រូវពីស្តុក ធ្វើយ៉ាងណាត្រូវគិតពីការផ្គត់ផ្គង់ក្នុស្រុកផងដែរ៕