លោកជំទាវ ជា សិរី៖ ចំពោះការកត់ត្រាប្រវត្តិព័ត៌មាន នៃការរៀបចំឥណទានឡើងវិញ របស់អតិថិជននីមួយៗនៅក្នុង CBC គឺរក្សាទុកតែ ១២ខែប៉ុណ្ណោះ
ភ្នំពេញ៖ លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា បានបញ្ជាក់ថា ចំពោះការកត់ត្រាប្រវត្តិព័ត៌មាននៃការរៀបចំឥណទានឡើងវិញ របស់អតិថិជននីមួយៗនៅក្នុង CBC គឺរក្សាទុករយៈពេលតែ ១២ខែប៉ុណ្ណោះ។ ក្រោយពី១២ខែនេះទៅទិន្នន័យនេះ នឹងលែងមាននៅក្នុង CBC ទៀតហើយ ហេតុដូច្នេះហើយ បញ្ហានេះ មិនមែនជាឧបសគ្គក្នុងការរារាំងអតិថិជនឱ្យទៅស្នើកម្ចីថ្មីទៀតនោះទេ។
ក្នុងសន្និសីទសារព័ត៌មាន ស្តីពី «ស្ថានភាពវិស័យធនាគារនៅកម្ពុជា ពិសេសប្រយោជន៍នៃការរៀបចំឥណទានឡើងវិញ និងផលប៉ះពាល់ការប្រើប្រាស់ឥណទានក្រៅផ្លូវការ» នាល្ងាចថ្ងៃទី៨ ខែតុលា ឆ្នាំ២០២៤ លោកជំទាវ ជា សិរី បានលើកឡើងថា «សមាគមតំណាងធនាគារទាំងអស់ ក៏គាត់លើកដែរថា ការរៀបចំឥណទានឡើងវិញនេះ មិនមែនមានន័យថា លើកក្រោយគាត់ចង់បានទុនទៅ ហើយធនាគារឃើញថា គាត់ធ្លាប់រៀបចំឥណទានឡើងវិញ ធនាគារអត់ឱ្យគាត់ មិនមែនបានន័យអីចឹងទេ។ ហើយអម្បិញមិញខាង CBC ក៏បានលើកឡើងដែរថា ការរៀបចំឥណទានឡើងវិញនេះ មិនមែនបានន័យយើងមិនកត់ត្រាទេ យើងកត់ត្រាទុក ដើម្បីឱ្យធនាគារដទៃទៀត គាត់បានដឹងលឺដែរ ថាអាចជួយអតិថិជនម្នាក់នេះបានកម្រិតណា»។
លោកជំទាវ ជា សិរី បន្ថែមថា ការរៀបចំឥណទានឡើងវិញនេះ គឺដើម្បីជួយទៅដល់អ្នកជាប់កម្ចី ដែលមានបញ្ហាជាក់ស្តែង ព្រោះអ្នកខ្លះអត់មានបញ្ហាក៏មកសុំដែរ ក្នុងពេលហ្នឹងពេលធនាគារអត់ឱ្យ ក៏មានការលើកឡើងថា មិនមើលប្រកាសរបស់ធនាគារជាតិដែលគេឱ្យធ្វើ។ ប៉ុន្តែក្នុងហ្នឹងយើងបញ្ជាក់ដែរថា គឺជួយអ្នកដែលមានបញ្ហាជាក់ស្តែង ។
លោក អឿ សុធារ័ត្ន ប្រធាននាយកប្រតិបត្តិក្រុមហ៊ុនក្រេឌីត ប្យូរ៉ូ (CBC) បានលើកឡើងនៅក្នុងសន្និសិទនេះដែរថា ជាទូទៅ ប្រវត្តិឥណទានអវិជ្ជមានរបស់អតិថិជនដែលបានកត់ត្រា ត្រូវរក្សាទុករយៈពេល៣ឆ្នាំ ប៉ុន្តែករណីព័ត៌មានស្នើសុំឥណទានឡើងវិញ គឺរក្សាទុកត្រឹមតែ ១២ខែប៉ុណ្ណោះ ដោយមិនរក្សាទុករហូតដល់ ៣ឆ្នាំឬ ៥ឆ្នាំនោះទេ ដើម្បីទុកលទ្ធភាពឱ្យអតិថិជនស្តារប្រវត្តិរបស់ខ្លួនឡើងវិញ ងាយស្រួលក្នុងការស្នើសុំឥណទានលើកក្រោយ៕
