រដ្ឋមន្ត្រីសង្គមកិច្ច៖ កម្លាំងសេវាសង្គម ដើរតួនាទីយ៉ាងសំខាន់ក្នុងការគាំទ្រ និងលើកកម្ពស់សុខុមាលភាពកុមារ គ្រួសារ ក្រុមជនរងគ្រោះ និងងាយរងគ្រោះ

ភ្នំពេញ៖ នារសៀលថ្ងៃទី៧ ខែតុលា ឆ្នាំ២០២៤នេះ ឯកឧត្តម ជា សុមេធី រដ្ឋមន្ត្រីក្រសួងសង្គម អតីតយុទ្ធជន និងយុវនីតិសម្បទា បានអញ្ជើញជាអធិបតីក្នុងពិធីប្រកាសផ្សព្វផ្សាយកម្មវិធីសិក្សា និងផែនការមេសម្រាប់បណ្តុះបណ្តាលកម្លាំងសេវាសង្គម ដោយមានការអញ្ជើញចូលរួមពី ឯកឧត្តម លោកជំទាវ ជារដ្ឋលេខាធិការ អនុរដ្ឋលេខាធិការ ប្រធានយូនីសេហ្វ និងនាយកបេសកកម្មនៃអង្គការ USAID ប្រចាំនៅកម្ពុជា ដៃគូអភិវឌ្ឍន៍​ ព្រមទាំងមន្ត្រីក្រោមឱវាទក្រសួងសរុបប្រមាណជិត​ ៣០០នាក់។

ក្នុងឱកាសនេះ ឯកឧត្តមរដ្ឋមន្ត្រី ជា សុមេធី បានគូសបញ្ជាក់ថា ជាការពិតណាស់កម្លាំងសេវាសង្គមបានដើរតួនាទីយ៉ាងសំខាន់ក្នុងការគាំទ្រ និងលើកកម្ពស់សុខុមាលភាពកុមារ គ្រួសារ ក្រុមជនរងគ្រោះ និងងាយរងគ្រោះ ដោយកាត់បន្ថយបាននូវភាពក្រីក្រ កំណត់ គ្រប់គ្រងហានិភ័យ សម្របសម្រួលការទទួល និងផ្តល់សេវាគាំពារសង្គមកិច្ច ដើម្បីធានាថាបុគ្គលទាំងនោះទទួលបានសេវាសង្គម និងសុខុមាលភាពឆ្លើយតបនឹងតម្រូវការរបស់ពួកគាត់ត្រូវការគ្រប់កាលៈទេសៈ។

ឯកឧត្តមរដ្ឋមន្ត្រី បានបន្តថា ក្នុងន័យនេះ ចំណេះដឹង ជំនាញ និងក្រមសីលធម៌វិជ្ជាជីវៈ គឺជាស្នូលនៃការកសាងកម្លាំងសេវាសង្គមកិច្ច និងក្លាយជាគន្លឹះក្នុងការលើកកម្ពស់យុត្តិធម៌ សង្គម ការកាត់បន្ថយការរើសអើង ការផ្លាស់ប្តូរឥរិយាបទសង្គមដែលមានគ្រោះថ្នាក់ ការការពារ និងឆ្លើយតបចំពោះអំពើហិង្សា ការរំលោភបំពាន ការមិនយកចិត្តទុកដាក់លើកុមារ និងការកេងប្រវ័ញ្ចគ្រប់ទម្រង់ឆ្ពោះទៅសម្រេចបាននូវសង្គមមួយដែលមានបរិយាប័ន្នសម្រាប់កុមារ ជនពិការ និងក្រុមដែលបាត់បង់ឱកាស ហើយថា ស្ថិតនៅក្នុងដំណាក់កាលនៃការវិវឌ្ឍបច្ចុប្បន្ននេះ ក្រសួងបាន និងកំពុងបោះជំហានទៅមុខគួរឱ្យកត់សម្គាល់ និងទទួលបាននូវសមិទ្ធផលថ្មីៗជាច្រើន ដើម្បីជួយដល់ជនរងគ្រោះ និងក្រុមជនងាយរងគ្រោះក្នុងនោះរួមមាន ផែនការយុទ្ធសាស្ត្រស្តីពីកម្លាំងសេវាសង្គមនៅកម្ពុជា ២០២២-២០៣១ ផែនការយុទ្ធសាស្ត្រសម្រាប់ការបណ្តុះបណ្តាលកម្លាំងសេវាសង្គម ផ្តោតលើកិច្ចការពារកុមារ ២០២១-២០២៥ កម្មវិធីសិក្សា និងផែនការមេសម្រាប់បណ្តុះបណ្តាលកម្លាំងសេវាសង្គមដែលបាន និងកំពុងប្រកាសផ្សព្វផ្សាយនាពេលនេះ។

ឯកឧត្តមរដ្ឋមន្ត្រី ជា សុមេធី បានថ្លែងអំណរគុណយ៉ាងជ្រាលជ្រៅដល់ក្រុមការងារបច្ចេកទេសចម្រុះ ជាពិសេសវិទ្យាស្ថានជាតិសង្គមកិច្ច អង្គភាពជំនាញរបស់ក្រសួង អង្គការយូនីសេហ្វ និងអង្គការដៃគូពាក់ព័ន្ធ ដែលបានរួមចំណែកគាំទ្រទាំងផ្នែកបច្ចេកទេស និងថវិកាក្នុងការបង្កើតកម្មវិធីសិក្សា និងផែនការមេសម្រាប់ បណ្តុះបណ្តាលកម្លាំងសេវាសង្គមនេះឡើង និងបានបញ្ជាក់ថា ក្រសួងសង្គមកិច្ច អតីតយុទ្ធជន និងយុវនីតិសម្បទាបានសហការជាមួយអង្គការយូនីសេហ្វ ធ្វើការត្រួតពិនិត្យឡើងវិញលើការអនុវត្តការងារសង្គមកិច្ច ដោយផ្តោតលើសុខុមាលភាពកុមារ និងសុខុមាលភាពសាធារណៈតាំងពីឆ្នាំ២០១៤ ៕