មនុស្ស ១១នាក់ស្លាប់ និង១៧នាក់រងរបួស ក្នុងការវាយប្រហារតាមអាកាសរបស់អ៊ីស្រាអែល លើប្រទេសលីបង់
បេរូត៖ ទីភ្នាក់ងារព័ត៌មានចិនស៊ិនហួ បានចុះផ្សាយនៅថ្ងៃទី៦ ខែតុលា ថា មនុស្ស១១នាក់បានស្លាប់ និង១៧នាក់ផ្សេងទៀតបានរងរបួស កាលពីល្ងាចថ្ងៃអាទិត្យ នៅក្នុងការវាយប្រហារតាមអាកាសរបស់អ៊ីស្រាអែល សំដៅលើតំបន់ផ្សេងៗគ្នា ក្នុងប្រទេសលីបង់ នេះបើយោងតាមប្រភពពីមន្ត្រី និងយោធាលីបង់។
យោងតាមក្រសួងសុខាភិបាល មនុស្ស ៦នាក់បានស្លាប់ និង ១៣នាក់ផ្សេងទៀតបានរងរបួសនៅក្នុងការវាយប្រហារតាមអាកាសរបស់អ៊ីស្រាអែលទៅលើអគារលំនៅដ្ឋានមួយកន្លែងនៅក្នុងភូមិ Kayfoun ក្នុងស្រុក Aley អភិបាល Mount Lebanon។
ការវាយប្រហារតាមផ្លូវអាកាសមួយទៀតរបស់អ៊ីស្រាអែលបានសម្លាប់មនុស្ស ៥នាក់ និងរបួស ៤នាក់ទៀតនៅពេលដែលយន្តហោះគ្មានមនុស្សបើករបស់អ៊ីស្រាអែលបានបាញ់មីស៊ីលពីអាកាសទៅដីនៅលើម៉ូតូដែលកំពុងធ្វើដំណើរនៅច្រកចូលភាគខាងជើងទៅកាន់ទីក្រុង Marjeyoun ភាគខាងកើតនៃប្រទេសលីបង់ភាគខាងត្បូង។
យោងតាមប្រភពយោធាដែលសុំមិនបញ្ចេញឈ្មោះបានឲ្យដឹងថា ការវាយប្រហារតាមអាកាសរបស់អ៊ីស្រាអែលបានបំផ្លាញវិហារអ៊ីស្លាមមួយនៅក្នុងភូមិ Yaroun ក្នុងផ្នែកកណ្តាលនៃតំបន់ព្រំដែននៅរសៀលនេះ។
កងទ័ពអ៊ីស្រាអែលបាននិងកំពុងធ្វើប្រតិបត្តិការយ៉ាងទូលំទូលាយនៅក្នុងទឹកដីលីបង់ក្នុងគោលបំណងកាត់បន្ថយសមត្ថភាពយោធារបស់ក្រុម Hezbollah និងជួយសម្រួលដល់ការវិលត្រឡប់របស់ជនជាតិអ៊ីស្រាអែលទៅកាន់តំបន់ភាគខាងជើងនៃប្រទេសតាមបណ្តោយព្រំដែនជាមួយប្រទេសលីបង់។
ចាប់តាំងពីថ្ងៃទី៨ ខែតុលា ឆ្នាំ២០២៣ មក ក្រុមហេសបូឡា និងកងទ័ពអ៊ីស្រាអែល បាននិងកំពុងបាញ់ប្រហារគ្នាឆ្លងព្រំដែនលីបង់-អ៊ីស្រាអែល។
