សម្តេច ហ៊ុន សែន អាចមានលទ្ធភាពធ្វើជា «មេធាវីខ្លួនឯង ដើម្បីការពារអ្នកក្រ» ពេលដកខ្លួនពីនយោបាយ

ភ្នំពេញ៖ ពេលចូលនិវត្តពីនយោបាយក្នុងថ្ងៃអនាគត តើសម្តេច ហ៊ុន សែន ដែលបច្ចុប្បន្នជាប្រធានព្រឹទ្ធសភា និងជាប្រធានគណបក្សកាន់អំណាច នឹងធ្វើអ្វីបន្ត? លទ្ធភាពមួយរបស់សម្តេច ប្រហែលជាចូលបំពេញវិជ្ជាជីវៈមេធាវី។

សម្តេចបង្ហើបពីលទ្ធភាពនាពេលអនាគតនេះ ក្នុងពិធីសួរសុខទុក្ខកុមារី និងយុវតីនៅមជ្ឈមណ្ឌលបណ្ដុះបណ្ដាលវិជ្ជាជីវៈ និងស្ដារនីតិសម្បទាយុវនារី (អាហ្វេស៊ីប) កាលពីចុងខែកញ្ញា ឆ្នាំ២០២៤។

ក្នុងពិធីនោះសម្តេចប្រធានព្រឹទ្ធសភា បានសួរយុវតីជានិស្សិតម្នាក់ ដែលរស់នៅក្នុងអង្គការអាហ្វេស៊ីប និងរៀនផ្នែកច្បាប់នៅសាកលវិទ្យាល័យថា ចង់ធ្វើអ្វីក្នុងពេលអនាគត? ហើយនាងក៏ជម្រាបសម្តេចថា ចង់ធ្វើជាមេធាវី។

សម្តេចលើកទឹកចិត្តថា ការសម្រេចចិត្តរបស់និស្សិតវ័យក្មេងរូបនោះ ដែលចង់ធ្វើជាមេធាវី គឺជារឿងត្រឹមត្រូវ ព្រោះនាងរៀនផ្នែកច្បាប់។ ក្នុងពេលនោះ សម្តេចក៏សួរទៅនិស្សិតនោះវិញ តើដឹងថា សម្តេចជាមេធាវី ម្នាក់ឬទេដែរ? នាងឆ្លើយថាដឹង។ បន្ទាប់មក អតីតនាយករដ្ឋមន្រ្តីកម្ពុជាជាងបីទសវត្សរ៍ បានថ្លែងយ៉ាងដូច្នេះថា៖«បើសិនជាតាលាលែងពីនយោបាយ តាមានលទ្ធភាពចូលទៅបំពេញមុខងារវិជ្ជាជីវៈមេធាវី ដើម្បីការពារក្តីជូនអ្នកក្រីក្រ»។

គួរដឹងថា តាមពិតបច្ចុប្បន្ន សម្តេច ហ៊ុន សែន គឺជាមេធាវីពេញសិទ្ធិរួចទៅហើយ ហើយក៏ជាសមាជិកគណៈមេធាវីកម្ពុជាផងដែរ។ សម្តេចបានស្បថចូលធ្វើជាមេធាវី តាំងពី២០ឆ្នាំមុនមកម្ល៉េះ គឺនៅថ្ងៃទី១៥ ខែកញ្ញា ឆ្នាំ២០០៤។ ប៉ុន្តែ សម្តេចជាមេធាវីមិនប្រកបវិជ្ជាជីវៈ ដែលមានន័យថា មានឈ្មោះជាមេធាវី តែមិនបំពេញការងារជាមេធាវី។ យោងតាមច្បាប់ បើទោះជាសម្តេចចង់បំពេញការងារជាមេធាវីក៏មិនអាចដែរ ព្រោះមានវិសមិតភាពជាមួយមុខងារជាសមាជិកព្រឹទ្ធសភា។ វិសមិតភាព ចង់សំដៅថា បុគ្គលម្នាក់ មិនអាចធ្វើជាសមាជិកព្រឹទ្ធសភាផង និងធ្វើជាមេធាវីផង ក្នុងពេលតែមួយឡើយ។

ផ្នែកតាមប្រសាសន៍របស់សម្តេចក្នុងពិធីសំណេះសំណាលខាងលើ សម្តេចអាចមានលទ្ធភាពចូលបំពេញវិជ្ជាជីវៈមេធាវី លុះត្រាសម្តេចលាលែងពីនយោបាយជាមុនសិន។ យ៉ាងណា សម្តេចប្រធានគណបក្សកាន់អំណាច មិនទាន់ប្រកាសនោះទេ នឹងដកខ្លួនចេញពីស្ថាប័ននយោបាយ ឬឈប់ធ្វើការងារនយោបាយនៅពេលណា។ តាំងពីនៅធ្វើជានាយករដ្ឋមន្រ្តីមកម្ល៉េះ សម្តេចបានបង្កើតក្រុមមេធាវីមួយ ដែលមានឯកឧត្ដម គី តិច ជាប្រធាន ដើម្បីការពារក្តីជូនអ្នកក្រីក្រដោយមិនយកប្រាក់។

ឯកឧត្ដម គី តិច ធ្លាប់ធ្វើជាប្រធានគណៈមេធាវីកម្ពុជា ហើយក្នុងជំនាន់ឯកឧត្ដមធ្វើជាប្រធាននេះហើយ ដែលសម្តេច ហ៊ុន សែន ត្រូវទទួលស្គាល់ឱ្យធ្វើជាមេធាវី និងជាសមាជិកគណៈមេធាវី។ ក្រៅពីសម្តេច ហ៊ុន សែន នៅមានឥស្សរជនផ្សេងទៀត ដូចជា សម្តេចឧបនាយករដ្ឋមន្រ្តី ស ខេង អតីតរដ្ឋមន្រ្តីក្រសួងមហាផ្ទៃ និងបច្ចុប្បន្នជាឧត្តមទីប្រឹក្សាព្រះមហាក្សត្រ ជាដើមក៏ជាមេធាវីមិនប្រកបវិជ្ជាជីវៈដែរ៕