ផ្ទុះអាវុធជាច្រើនគ្រាប់នៅកាស៊ីណូ ដាយអឺមិន ស្ថិតក្នុងឃុំក្អមសំណ ស្រុកលើកដែក បណ្ដាលឱ្យសន្ដិសុខម្នាក់រងរបួស
ភ្នំពេញ៖ នៅរសៀលថ្ងៃទី២៦ ខែកញ្ញា ឆ្នាំ២០២៤ មានស្នូរកាំភ្លើងជាច្រើនគ្រាប់លាន់ឮផ្ទុះចេញពីទីតាំងកាស៊ីណូយីហោ ដាយអឺមិន (Diamond) ស្ថិតក្នុងឃុំក្អមសំណ ស្រុកលើកដែក ខេត្តកណ្តាល បណ្ដាលឱ្យបុរសជាសន្ដិសុខម្នាក់រងរបួសដៃ ខណៈខ្មាន់កាំភ្លើងព្យាយាមធ្វើសកម្មភាពបាញ់ស្រោចពីខាងក្រៅ ចូលទៅក្នុងបរិវេណខាងក្នុងនៃកាស៊ីណូ។
បើតាមលោក អាំ ធូ អធិការនៃអធិការដ្ឋាននគរបាលស្រុកលើកដែក បានឱ្យដឹងថា ពិតជាមានករណីផ្ទុះអាវុធពិតប្រាកដមែន ប៉ុន្តែអាវុធដែលជនសង្ស័យប្រើប្រាស់មិនមែនជារបស់ពិតទេ ដោយរូបលោកបន្ថែមថា ជាប្រភេទអាវុធសម្រាប់ថតកុនប៉ុណ្ណោះ ពោលគឺជាក្បាលគ្រាប់ផ្លាស្ទិក ដែលមិនអាចគ្រោះថ្នាក់ដល់អាយុជីវិតមនុស្សឡើយ។
ទោះបីជាយ៉ាងណា ជុំវិញហេតុការណ៍ផ្ទុះអាវុធខាងលើនេះ លោកអធិការនគរបាលស្រុក មិនទាន់អាចបញ្ជាក់លម្អិតបាននៅឡើយ ខណៈបច្ចុប្បន្ន កម្លាំងជំនាញនៃអធិការដ្ឋាននគរបាលស្រុក បានចុះទៅដល់ទីតាំងកើតហេតុ និងបានហ៊ុមព័ទ្ធខ្សែហាមឃាត់មិនឱ្យមានការចេញចូលស៊េរី ដើម្បីធ្វើការស្រាវជ្រាវលើករណីនេះបន្ថែម។
សូមរំឭកថា កាលពីកំលុងឆ្នាំ២០១៧ ទីតាំងខាងលើ ក៏ធ្លាប់កើតមានឡើងនូវករណីស្រដៀងគ្នានេះដែរ ពោលគឺនៅយប់ឈានចូលថ្ងៃទី២១ ខែវិច្ឆិកា ឆ្នាំ២០១៧ ដែលពីមុនដាក់ឈ្មោះថា កាស៊ីណូ «ថ្មពេជ្យ» ស្ថិតក្នុងភូមិក្អមសំណរក្រោម ឃុំក្អមសំណរ ស្រុកលើកដែក ខេត្តកណ្តាល មានករណីកើតឡើង ដោយតំណាងកាស៊ីណូអះអាងថា មានបុរស ម្នាក់កាន់កាំភ្លើងខ្លី១ដើម ចូលទៅភ្ជង់ប្លន់ក្នុងកាស៊ីណូ«ថ្មពេជ្យ»នោះផងដែរ ប៉ុន្តែក្រោយមកដំណឹងនោះត្រូវបានស្ងាប់រលត់ទៅវិញយ៉ាងអាថ៌កម្បាំង ខណៈពេលនេះ មានខ្មាន់កាំភ្លើងជាថ្មីបានបាញ់ប្រហាររហូតបុរសសន្តិសុខម្នាក់រងរបួស តែសមត្ថកិច្ចបញ្ជាក់ថា ជាគ្រាប់កាំភ្លើងថតកុនទៅវិញ៕
