សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចាត់តំណាងចុះសួរសុខទុក្ខ និងនាំយកថវិកា ១០លានរៀល រួមជាមួយអំណោយមនុស្សធម៌មួយចំនួនទៀតផ្តល់ជូនស្ត្រីម្នាក់មានជំងឺដុំគីសសុដន់ធ្ងន់ធ្ងរ

ភ្នំពេញ៖ អ្នកស្រី នឿន សុខជាន អាយុ ៣៤ឆ្នាំ មានជំងឺដុំគីសសុដន់ខាងស្តាំធ្ងន់ធ្ងរ រស់នៅភូមិត្រពាំងល្ពៅ ឃុំជយោ ស្រុកចំការលើ ខេត្តកំពង់ចាម មានស្វាមីធ្វើជាកម្មករសំណង់នៅភ្នំពេញ និងមានកូន ៤នាក់ក្នុងបន្ទុក។ គាត់មានជំងឺនេះរយៈពេល ៥ឆ្នាំហេីយ ដោយបានព្យាបាលដោយថ្នាំបុរាណខ្មែរ ប៉ុន្តែស្ថានភាពជំងឺកាន់តែធ្ងន់ធ្ងរទៅៗ ស្រែកដង្ហេីយតាមបណ្តាញសង្គមសុំឱ្យសប្បុរសជនជួយ។

ដោយក្តីអាណិតអាសូរ បន្ទាប់ពីឃេីញព័ត៌មានខាងលេីនេះ ក្នុងនាមជាអ្នកម្តាយមួយរូប សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន កាកបាទក្រហមកម្ពុជា និងជាឥស្សរជនឆ្នេីមថ្នាក់ជាតិនៃផែនការសកម្មភាពរួមអគ្គលេខាធិការ អង្គការសហប្រជាជាតិ ដេីម្បីសុខភាពស្ត្រីនិងកុមារ នាល្ងាចថ្ងៃចន្ទ ទី ១៦ ខែកញ្ញា ឆ្នាំ២០២៤នេះ បានចាត់ឱ្យលោកជំទាវ ម៉ែន នារីសោភ័គ អគ្គលេខាធិការរងទី ១ និងសហការី ចុះសួរសុខទុក្ខ និងនាំយកថវិកា ១០លានរៀល រួមជាមួយអំណោយមនុស្សធម៌មួយចំនួនទៀតផ្តល់ជូនស្ត្រីរងគ្រោះខាងលេី ដែលកំពុងសម្រាកព្យាបាលនៅមន្ទីរពេទ្យកាល់ម៉ែត។

នៅក្នុងឱកាសនោះ លោកជំទាវ អគ្គលេខាធិការរងទី១ បានពាំនាំនូវប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញើសួរសុខទុក្ខ ក្តីអាណិតអាសូរ និងលេីកទឹកចិត្តចំពោះអ្នកស្រី នឿន សុខជាន និងសូមផ្តាំផ្ញេីឱ្យអនុវត្តឱ្យបានខ្ជាប់ខ្ជួនតាមការណែនាំរបស់គ្រូពេទ្យ ជាពិសេសបរិភោគអាហារបំប៉នឱ្យបានគ្រប់គ្រាន់ ពង្រឹងស្មារតីឱ្យបានរឹងមាំ ព្រោះសុខភាពផ្លូវចិត្តមានសារសំខាន់ណាស់ដែលជំរុញឱ្យជំងឺឆាប់បានជាសះស្បើយឡើងវិញ។

អ្នកស្រី នឿន សុខជាន និងម្តាយដែលនៅមេីលថែទាំ បានថ្លែងអំណរគុណយ៉ាងជ្រាលជ្រៅបំផុតចំពោះ អ្នកម្តាយមនុស្សធម៌ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានយកចិត្តទុកដាក់ លើកទឹកចិត្ត និងផ្តល់អំណោយជួយសម្រាលការលំបាកផ្នែកជីវភាពខណៈដែល កំពុងព្យាបាលនេះ និងសូមថ្លែងអំណរគុណយ៉ាងជ្រាលជ្រៅចំពោះក្រុមគ្រូពេទ្យដែលបានយកចិត្តទុកដាក់ជួយព្យាបាលនេះផងដែរ។

អំណោយដែលបានផ្តល់ជូនរួមមាន ៖ អង្ករសុខភាព ១កេស, ទឹកភេសជ្ជៈតែបំប៉នកម្លាំង ២កេស, ទឹកត្រឡាច ១កេស, ក្រូចពោធិ៍សាត់, ឃីត (មុង ភួយ សារុង ក្រមា) ១កញ្ចប់ និងថវិកា ១០លានរៀល។

សូមបញ្ជាក់ថា ចំពោះករណីខាងលេីនេះ កាលពីថ្ងៃទី១២ ខែកញ្ញាកន្លងទៅ អាជ្ញាធរមូលដ្ឋានបានផ្តល់បណ្ណសមធម៌ជូនគាត់ ហើយភ្លាមៗនោះ បានរៀបចំបញ្ជូនគាត់ទៅមន្ទីរពេទ្យបង្អែកស្រុក ចាក់ថ្នាំបន្ថយការឈឺចាប់ ហើយតាមរយៈមន្ទីរសុខាភិបាលខេត្ត និងការជួយជ្រោមជ្រែងពី ឯកឧត្តម អ៊ុន ចាន់ដា អភិបាលនៃគណៈអភិបាលខេត្ត ក៏បានសហការបញ្ជូន អ្នកជំងឺ មកមន្ទីរពេទ្យកាល់ម៉ែត ដេីម្បីជួយសង្រ្គោះបន្ទាន់៕