សម្តេច ម៉ែន សំអន៖ វត្តមានរបស់ធនាគារ BIDC ១៥ឆ្នាំ នៅកម្ពុជា បានទាក់ទាញវិនិយោគមកកម្ពុជាមានការរីកចម្រើន

ភ្នំពេញ៖ សម្តេចកិត្តិសង្គហបណ្ឌិត ម៉ែន សំអន សមាជិកឧត្តមប្រឹក្សាផ្ទាល់ព្រះមហាក្សត្រ បានអញ្ជើញជាអធិបតីក្នុងពិធីអបអរសាទរ ខួប១៥ឆ្នាំ នៃការបង្កើតធនាគារវិនិយោគ និងអភិវឌ្ឍន៍កម្ពុជា ដែលហៅកាត់ថា BIDC នៅសណ្ឋាគារសូហ្វីតែលភ្នំពេញ នាថ្ងៃសុក្រ ៤កើត ខែភទ្របទ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៦ ខែកញ្ញា ឆ្នាំ២០២៤។

ថ្លែងក្នុងឱកាសនោះ សម្តេចកិត្តិសង្គហបណ្ឌិត ក៏បានកោតសរសើរ និងអបអរសាទរដោយស្មោះ ចំពោះសមិទ្ធផលគួរជាទីមោទនៈ ដែលធនាគារ BIDC និង ថ្នាក់ដឹកនាំ BIDV សម្រេចបានក្នុងរយៈពេលកន្លងមកនេះ។ ក្នុងរយៈពេល១៥ឆ្នាំនៃប្រតិបត្តិការ BIDC បានធ្វើសមាហរណកម្ម និងកសាងកេរ្តិ៍ឈ្មោះដ៏រឹងមាំនៅក្នុងទីផ្សារកម្ពុជា អនុវត្តការងារអាជីវកម្មរបស់ខ្លួនប្រកបដោយស្ថិរភាព បង្កើនចំណែកទីផ្សារ និងបានរួមចំណែកជាវិជ្ជមានសម្រាប់ការអភិវឌ្ឍសេដ្ឋកិច្ចកម្ពុជា។ តាមរយៈការជួយជ្រោមជ្រែងចំពោះសកម្មភាព សន្តិសុខសង្គម មនុស្សធម៌ សុខាភិបាល ការអប់រំ និងបណ្តុះបណ្តាល ការលុបបំបាត់ភាពអត់ឃ្លាន និងការកាត់បន្ថយភាពក្រីក្រ ការអភិវឌ្ឍជនបទ ដូចជាឧបត្ថម្ភសាងសង់សាលារៀន ឧបត្ថម្ភអាហារូបករណ៍ដល់និស្សិត ឧបត្ថម្ភដល់ប្រជាពលរដ្ឋដែលរងគ្រោះដោយគ្រោះធម្មជាតិ ឧបត្ថម្ភកាកបាទក្រហមកម្ពុជា ឧបត្ថម្ភដល់មន្ទីរពេទ្យ និងផ្តល់ថ្លៃពិនិត្យព្យាបាលដល់អ្នកជំងឺក្រីក្រ អ្នកជំងឺនៅតំបន់ដាច់ស្រយាល ។ល។ សមិទ្ធផលទាំងអស់នោះ បង្ហាញឱ្យឃើញពីស្មារតីនៃទំនួលខុសត្រូវ និងឆន្ទៈក្នុងការធ្វើអាជីវកម្មផ្សារភ្ជាប់ជាមួយនឹងទំនួលខុសត្រូវសង្គម និងផ្សារភ្ជាប់ទំនាក់ទំនងដ៏រឹងមាំរវាងប្រទេសទាំងពីរ ព្រមទាំងបានចូលរួមចំណែកក្នុងការគាំទ្រ និងលើកកម្ពស់ជីវភាពរស់នៅរបស់ប្រជាជនកម្ពុជាផងដែរ។

ទន្ទឹមនឹងនេះផងដែរ សម្តេចកិត្តិសង្គហបណ្ឌិត ក៏បានស្នើឲ្យ BIDC ក៏ដូចជាសាខាពាណិជ្ជកម្មរបស់ BIDV ផ្សេងទៀតគោរពនូវរាល់បទប្បញ្ញត្តិ ច្បាប់របស់កម្ពុជាក្នុងការធ្វើប្រតិបត្តិការ ហើយសកម្ម និងជាគំរូក្នុងការអនុវត្តគោលនយោបាយ ទិសដៅ និងការណែនាំរបស់រាជរដ្ឋាភិបាល និងស្ថាប័នពាក់ព័ន្ធនៅកម្ពុជា។

សម្តេចកិត្តិសង្គហបណ្ឌិត ស្នើឱ្យ BIDV/BIDC បន្តរក្សាតួនាទី ឈានមុខគេ ក្នុងចំណោមសហគ្រាសវៀតណាមដែលកំពុងធ្វើសកម្មភាពអាជីវកម្មនៅកម្ពុជា បន្តលើកកម្ពស់ទំនាក់ទំនងសកម្មភាពសេដ្ឋកិច្ច ពាណិជ្ជកម្ម និងវិនិយោគរវាងប្រទេសទាំងពីរ ៕