ឯកឧត្តម វង សូត ជួបសំណេះសំណាលជាមួយប្រជាកសិករដាំម្រេច ស្វាយចន្ទី កៅស៊ូ កាហ្វេ ស្វាយ ទុរេន និងស្រូវ នៅក្រុមហ៊ុន សិលាផិបភើរ ខូអិលធីឌី

ភ្នំពេញ៖ បន្ទាប់ពីជួបសំណេះសំណាលជាមួយក្រុមប្រឹក្សាស្រុក ក្រុមប្រឹក្សាឃុំ និងប្រធានភូមិ រួចមក ឯកឧត្តម វង សូត អនុប្រធានទី២រដ្ឋសភា អមដំណើរដោយ ឯកឧត្តម លោកជំទាវ ជាសមាជិក សមាជិការដ្ឋសភាមណ្ឌលត្បូងឃ្មុំ បានអញ្ជើញជួបសំណេះសំណាលជាមួយប្រជាសហគមន៍ដាំម្រេច ស្វាយចន្ទី កៅស៊ូ កាហ្វេ ស្វាយ ធូរ៉េន និងស្រូវ ព្រមទាំងពិនិត្យមើលខ្សែសង្វាក់ផលិតកម្មរបស់ក្រុមហ៊ុនផលិតម្រេចស្អាត “សិលាផិបភើរ ខូអិលធីឌី” ជាក្រុមហ៊ុនផលិត និងនាំផលិតផលម្រេច ចេញទៅក្រៅប្រទេស ដែលមានទីតាំងស្ថិតនៅភូមិជីប៉េះ ឃុំមេមត់ ស្រុកមេមត់ ខេត្តត្បូងឃ្មុំ។

ឯកឧត្តមអនុប្រធានទី២រដ្ឋសភា បានសំណេះសំណាលប្រកបដោយភាពស្និទ្ធស្នាល ដើម្បីស្វែងយល់អំពីសុខទុក្ខរបស់បងប្អូនប្រជាកសិករ ភាពជោគជ័យ និងបញ្ហាប្រឈមផ្សេងៗ ក្នុងការបង្កបង្កើនផលកសិកម្មរបស់បងប្អូន។

ឯកឧត្តម បានផ្តល់អនុសាសន៍ដល់បងប្អូនប្រជាកសិករ ឱ្យបន្តសហការគ្នាឱ្យបានល្អជាសហគមន៍ក្នុងការបង្កបង្កើនកសិផលរបស់ខ្លួន និងត្រូវស្វែងយល់ពីទីផ្សារកសិផលឱ្យបានច្បាស់លាស់ ព្រមទាំងស្វែងរកដៃគូទទួលទិញកសិផលឱ្យបានល្អ ដើម្បីរក្សាបាននូវស្ថិរភាពថ្លៃ និងចំណូលរបស់បងប្អូន។

បន្ទាប់ពីសំណេះសំណាលជាមួយប្រជាកសិកររួចមក ឯកឧត្តមអនុប្រធានទី២រដ្ឋសភាបានអញ្ជើញពិនិត្យមើលខ្សែសង្វាក់ផលិតកម្មក្រុមហ៊ុន សិលាផិបភើរ ខូអិលធីឌី។

ជាមួយគ្នានោះ ឯកឧត្តម ក៏បានសំណូមពរដល់ក្រុមហ៊ុន “សិលាផិបភើរ” បន្តជួយគាំទ្រប្រជាកសិករដាំម្រេចនៅក្នុងសហគមន៍ តាមរយៈការបង្កើនផលិតកម្មរបស់ខ្លួន បង្កើនប្រមូលទិញម្រេចពីកសិករក្នុងមូលដ្ឋាន និងការផ្តល់ស្តង់ដារបច្ចេកទេសដាំដុះដល់ប្រជាកសិករជាដើម។

ឯកឧត្តម ក៏បានកោតសរសើរ និងអរគុណដល់ថ្នាក់ដឹកនាំក្រុមហ៊ុន ដែលមានទស្សនវិស័យប្រកបដោយក្តីស្រលាញ់ក្នុងការផលិត និងកែច្នៃផលិតផលម្រេចរបស់កម្ពុជា ប្រកបដោយស្តង់ដារអនាម័យខ្ពស់ លក់ក្នុងស្រុក និងនាំចេញទៅក្រៅប្រទេសទៀតផង៕