ឯកឧត្តម កែវ រតនៈ៖ ចេករបស់ខេត្តកំពង់ចាម ត្រូវបាននាំចេញទៅប្រទេសជប៉ុន និងចិនដោយមានការពេញនិយមជាខ្លាំង
ភ្នំពេញ៖ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល បានលើកឡើងថា ចេករបស់ខេត្តកំពង់ចាម ត្រូវបាននាំចេញទៅប្រទេសជប៉ុន និងចិនដោយមានការពេញនិយមជាខ្លាំង។
ការលើកឡងរបស់ឯកឧត្តមរដ្ឋមន្ត្រី បានធ្វើឡើងនៅក្នុង ឱកាសអញ្ជើញពិនិត្យសង្វាក់ផលិតកម្មដំណាំចេក និងជួបសំណេះសំណាលជាមួយបុគ្គលិក កម្មករ ក្រុមហ៊ុន «ឡុងស្រេង» ប្រមាណ១.៥៧០នាក់ ស្ថិតនៅក្នុងឃុំបឹងកេត ស្រុកស្ទឹងត្រង់ ខេត្តកំពង់ចាម នៅថ្ងៃទី២៧ ខែសីហា ឆ្នាំ២០២៤។
ឆ្លៀតនាឱកាសនោះ ឯកឧត្តម រដ្ឋមន្រ្តី បានគូសរំលេចថា ក្រុមហ៊ុនលោកឧកញ៉ា ហេង ឡុង បានផ្តល់ការងារដោយផ្ទាល់ចំនួនជាង ៧០០០កន្លែង ដោយគិតជាប្រាក់ខែជាង ២,៦លានដុល្លារ ដែលជាការជួយសេដ្ឋកិច្ចបងប្អូនអ្នកស្រុកយ៉ាងច្រើន។ រាជរដ្ឋាភិបាលគាំទ្រផ្នែកទីផ្សារផង និងផ្តល់អគ្គិសនីបៃតងក្នុងអត្រាពិសេសក្នុងផ្នែកកសិកម្មដែលត្រឹម ៤៨០៛ ក្នុង១គីឡូវ៉ាត់ម៉ោង។
ឯកឧត្តមរដ្ឋមន្រ្តី ជំរុញឱ្យក្រុមហ៊ុនបន្តពង្រីកអាជីវកម្មដើម្បីជួយបង្កើតការងារថ្មីៗ និងអំពាវនាវអ្នកមានទុនឯទៀតៗជួយវិនិយោគក្នុងវិស័យកសិកម្មដែលនឹងទទួលបានអគ្គិសនីថ្លៃអនុគ្រោះជាពិសេស។
ឯកឧត្តមរដ្ឋមន្រ្តី បានលើកទឹកចិត្តឲ្យបុគ្គលិកកម្មករទាំងអស់ ខិតខំប្រឹងប្រែងធ្វើការងារទាំងអស់គ្នា ដើម្បីជួយជ្រោងក្រុមហ៊ុន ឱ្យមានដំណើរការល្អ ធ្វើឱ្យផលិតផលរបស់យើងកាន់តែទូលាយ នាំចេញទៅកាន់ទីផ្សារ ពិភពលោក ដែលទាំងនេះ ជាគោលដៅការពារការងារ និងពង្រីកការងាររបស់បងប្អូន ដើម្បីទទួលបានការលើងប្រាក់ខែខ្ពស់។
តាមលោកឧកញ៉ា ហេង ឡុង ប្រធានក្រុមហ៊ុន ឡុង ស្រេង បានឲ្យដឹងថា ក្រុមហ៊ុនមានផ្ទៃដីសរុបជិត ៧០០០ហិកតា ក្នុងនោះផ្ទៃដីចម្ការ កៅស៊ូ ជាង ៣០០០ ហិចតា ផ្ទៃដីចំការចេក មានជាង ២០០០ហិកតា ផ្ទៃដីដាំធុរេនមានជាង ៥០០ ហិចតា ផ្ទៃដីចម្ការតាង៉ែន ២០០ ហិកតា និងផ្ទៃដីដាំកហរូចថ្លុងមាន ៧០ហិកតា។ ទន្ទឹមនឹងនេះ ការនាំចេញកៅស៊ូបានប្រមាណជា ៤៥០០តោន និងចេក ៩ម៉ឺនតោន ក្នុង១ឆ្នាំ ៕
