ឯកឧត្ដម មាន ចាន់យ៉ាដា៖ ការទទួលដំណើរទស្សនកិច្ចរបស់ព្រះធម្មវនវាសី ចន្ទ មុនី យ៉ាងច្រើនកុះករក្នុងខេត្តឧត្តរមានជ័យ បានបង្ហាញពីការរស់នៅយ៉ាងសុខសាន្ត ក្រោមម្លប់សុខសន្តិភាព

ភ្នំពេញ៖ ឯកឧត្ដម មាន ចាន់យ៉ាដា អភិបាលខេត្តឧត្តរមានជ័យ បានបញ្ជាក់ថា ការទទួលដំណើរទស្សនកិច្ចរបស់ព្រះធម្មវនវាសី ចន្ទ មុនី យ៉ាងច្រើនកុះករក្នុងខេត្តឧត្តរមានជ័យ បានបង្ហាញពីការរស់នៅយ៉ាងសុខសាន្ត ក្រោមម្លប់សុខសន្តិភាព។

តាមរយៈបណ្ដាញសង្គមនៅថ្ងៃទី២៤ ខែសីហា ឆ្នាំ២០២៤នេះ ឯកឧត្ដម មាន ចាន់យ៉ាដា បានបញ្ជាក់ថា “ យើងខ្ញុំករុណាជាថ្នាក់ដឹកនាំ មន្ត្រីរាជការ និងប្រជាពលរដ្ឋក្នុងខេត្តឧត្តរមានជ័យ បានទទួលស្វាគមន៍ចំពោះដំណើរទស្សនកិច្ចរបស់ព្រះធម្មវនវាសី ចន្ទ មុនី នៅខេត្តឧត្តរមានជ័យ បន្ទាប់ពីខេត្តព្រះវិហារ និងខេត្តមួយចំនួនទៀតតាមបន្ទាត់ព្រំដែន។ បន្ទាប់ពីការសម្តែងធម្មទេសនាក្នុងវត្តជ័យទឹកជុំ នៅស្រុកអន្លង់វែង ព្រះអង្គបានបន្តនិមន្តទៅពិនិត្យផ្ទាល់ទីតាំងបង្គោលព្រំដែនទី១ រវាងខេត្តជាប់ព្រំទាំងពីរនៃព្រះរាជាណាចក្រកម្ពុជា-ថៃ។

ការទទួលដំណើរទស្សនកិច្ចរបស់ព្រះអង្គយ៉ាងច្រើនកុះករ បានបង្ហាញពីការរស់នៅយ៉ាងសុខសាន្ត ក្រោមម្លប់សុខសន្តិភាព ដែលកំពុងមាន និងបន្តចង់បានពីសំណាក់បងប្អូនប្រជាពលរដ្ឋខេត្តឧត្តរមានជ័យ ដូចគ្នាជាមួយប្រជាពលរដ្ឋរស់នៅខេត្តជាប់ព្រំដែនដទៃទៀត ក៏ដូចជាខេត្តជាប់ព្រំដែនទាំង៤ ក្រចេះ ស្ទឹងត្រែង រតនគីរី មណ្ឌលគីរី នៃតំបន់អភិវឌ្ឍន៍ត្រីកោណ កម្ពុជា ឡាវ វៀតណាម CLV-DTA។

សូមសេចក្តីសុខ សេចក្តីចម្រើនទាំងឡាយទាំងពួង កើតមានដល់បងប្អូនប្រជាពលរដ្ឋទូទាំងខេត្តឧត្តរមានជ័យ”៕