អគ្គនាយករង ប.ស.ស. ចូលរួមកិច្ចប្រជុំជាមួយអាជ្ញាធរសវនកម្មជាតិ ស្ដីពី “ការធ្វើសវនកម្មលើរបាយកាណ៍ហិរញ្ញវត្ថុរបស់បេឡាជាតិសន្តិសុខសង្គមសម្រាប់ការិយបរិច្ឆេទ ២០២៣ និងឆ្នាំពាក់ព័ន្ធ”
ភ្នំពេញ៖ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង ប.ស.ស. តំណាងឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្ដុះបណ្ដាលវិជ្ជាជីវៈ បានដឹកនាំនាយកដ្ឋានជំនាញ ចូលរួមកិច្ចប្រជុំជាមួយអាជ្ញាធរសវនកម្មជាតិ ស្ដីពី “ការធ្វើសវនកម្មលើរបាយកាណ៍ហិរញ្ញវត្ថុរបស់បេឡាជាតិសន្តិសុខសង្គមសម្រាប់ការិយបរិច្ឆេទ ២០២៣ និងឆ្នាំពាក់ព័ន្ធ” នារសៀលថ្ងៃទី២២ ខែសីហា ឆ្នាំ២០២៤នៅសាលប្រជុំនាយកដ្ឋានរដ្ឋបាល និងគ្រប់គ្រងធនធានមនុស្ស នៃ ប.ស.ស. ដោយមានការចូលរួមពីថ្នាក់ដឹកនាំ និងមន្ត្រីជំនាញនៃនាយកដ្ឋានរដ្ឋបាលនិងគ្រប់គ្រងធនធានមនុស្ស, នាយកដ្ឋានគ្រប់គ្រងថវិកា ហិរញ្ញវត្ថុ និងគណនេយ្យ និងអង្គភាពសវនកម្មផ្ទៃក្នុងនៃ ប.ស.ស. សរុបប្រមាណជាង២០រូប។
ក្នុងឱកាសនោះ ឯកឧត្តមបណ្ឌិតអគ្គនាយករង ប.ស.ស. បានស្វាគមន៍យ៉ាងកក់ក្ដៅចំពោះគណៈប្រតិភូសវនកម្ម នៃអាជ្ញាធរសវនកម្មជាតិ ដែលបានអញ្ជើញមក ប.ស.ស. ដើម្បីធ្វើសវនកម្មលើរបាយកាណ៍ហិរញ្ញវត្ថុរបស់បេឡាជាតិសន្តិសុខសង្គមសម្រាប់ការិយបរិច្ឆេទ ២០២៣ និងឆ្នាំពាក់ព័ន្ធ។
បន្ថែមពីលើនេះទៅទៀត ឯកឧត្តមបណ្ឌិតអគ្គនាយករង ប.ស.ស. ក៏បានស្នើសុំនាយកដ្ឋានជំនាញទាំងពីរ និងអង្គភាពសវនកម្មផ្ទៃក្នុងនៃប.ស.ស. ចូលរួមសហការ ជាមួយគណៈប្រតិភូសវនកម្ម នៃអាជ្ញាធរសវនកម្មជាតិ ក្នុងការផ្តល់ទីកន្លែង ឯកសារ ព័ត៌មានពាក់ព័ន្ធផ្សេងៗ ឱ្យបានទាន់ពេលវេលា ដើម្បីឱ្យការធ្វើសវនកម្មនេះ ដំណើរទៅយ៉ាងរលូន និងសម្រេចបានជោគជ័យ។
សូមបញ្ជាក់ថា អាជ្ញាធរសវនកម្មជាតិ មានកាតព្វកិច្ចធ្វើសវនកម្មលើគ្រប់ក្រសួង-ស្ថាប័ន រាជធានី-ខេត្ត និងរដ្ឋបាលមូលដ្ឋាន គ្រឹះស្ថានសាធារណៈ និងសហគ្រាសសាធារណៈ ហើយធ្វើរបាយការណ៍ ជូនទៅរដ្ឋសភា ព្រឹទ្ធសភា និងផ្តល់ព័ត៌មានជូនដល់រាជរដ្ឋាភិបាល ៕
